ಹೈದರಾಬಾದ್: ತೆಲಂಗಾಣದ 1,864 ಸರ್ಕಾರಿ ಶಾಲೆಗಳಲ್ಲಿ ಒಬ್ಬೇ ಒಬ್ಬ ವಿದ್ಯಾರ್ಥಿಯೂ ಇಲ್ಲ ಎಂಬ ಕಳವಳಕಾರಿ ಮಾಹಿತಿ ಬಹಿರಂಗವಾಗಿದೆ. ಇನ್ನು 26,287 ಸರ್ಕಾರಿ ಶಾಲೆಗಳ ಪೈಕಿ ಕೇವಲ 5,367 ಶಾಲೆಗಳಲ್ಲಿ (20.41%) ಮಾತ್ರ 100 ಕ್ಕಿಂತ ಹೆಚ್ಚು ವಿದ್ಯಾರ್ಥಿಗಳಿದ್ದಾರೆ ಎಂದು ಶಿಕ್ಷಣ ಇಲಾಖೆಯ ಇತ್ತೀಚಿನ ಅಂಕಿ ಅಂಶಗಳು ತಿಳಿಸಿವೆ.
ರಾಜ್ಯ ಸರ್ಕಾರವು ಶಾಲಾ ನೈರ್ಮಲ್ಯದ ಜವಾಬ್ದಾರಿಯನ್ನು ಅಮ್ಮ ಆದರ್ಶ ಶಾಲಾ ಸಮಿತಿಗಳಿಗೆ ವಹಿಸಿದೆ. ಈ ನೈರ್ಮಲ್ಯ ಕಾರ್ಯಗಳಿಗಾಗಿ ಆಯಾ ಶಾಲೆಗಳ ವಿದ್ಯಾರ್ಥಿಗಳ ಸಂಖ್ಯೆಯನ್ನು ಆಧರಿಸಿ ಧನಸಹಾಯ ನೀಡಲಾಗುತ್ತದೆ. ಜಿಲ್ಲಾ ಖನಿಜ ಪ್ರತಿಷ್ಠಾನ ಟ್ರಸ್ಟ್ (ಡಿಎಂಎಫ್ಟಿ) ನಿಂದ ನೈರ್ಮಲ್ಯ ಕಾರ್ಯಗಳಿಗಾಗಿ ಹಣ ಒದಗಿಸಲಾಗುತ್ತದೆ.
ಶಿಕ್ಷಣ ಇಲಾಖೆಯು ಶಾಲಾ ವಿದ್ಯಾರ್ಥಿಗಳ ಜಿಲ್ಲಾವಾರು ದತ್ತಾಂಶವನ್ನು ಗಣಿ ಇಲಾಖೆಗೆ ಒದಗಿಸಿದ್ದು, ಅದರ ಆಧಾರದ ಮೇಲೆ ಗಣಿ ನಿರ್ದೇಶಕ ಬಿಆರ್ವಿ ಸುಶೀಲ್ ಕುಮಾರ್ ಅವರು ಸಿಂಗರೇಣಿ ಕೊಲಿಯರೀಸ್ ಸಿಎಂಡಿಗೆ ಪತ್ರ ಬರೆದು ಡಿಎಂಎಫ್ಟಿ ಅಡಿ ಮೂರು ತಿಂಗಳಿಗೆ 40.83 ಕೋಟಿ ರೂ.ಗಳನ್ನು ಬಿಡುಗಡೆ ಮಾಡುವಂತೆ ಕೋರಿದ್ದಾರೆ.
ಹೆಚ್ಚಾಗುತ್ತಿದೆ ವಿದ್ಯಾರ್ಥಿಗಳಿಲ್ಲದ ಶಾಲೆಗಳ ಸಂಖ್ಯೆ: ಈ ವರ್ಷದ ಆರಂಭದಲ್ಲಿ, ರಾಜ್ಯ ಸರ್ಕಾರವು ಸಮಗ್ರ ಶಿಕ್ಷೆ ಯೋಜನೆಗಾಗಿ ಕೇಂದ್ರ ಶಿಕ್ಷಣ ಇಲಾಖೆಗೆ ವರದಿ ಸಲ್ಲಿಸಿದ್ದು, 2023-24ರ ಶೈಕ್ಷಣಿಕ ವರ್ಷದಲ್ಲಿ 1,213 ಶಾಲೆಗಳಲ್ಲಿ ವಿದ್ಯಾರ್ಥಿಗಳಿಲ್ಲ ಎಂದು ಹೇಳಿದೆ. ಆದಾಗ್ಯೂ, ಇತ್ತೀಚಿನ ಅಂಕಿ - ಅಂಶಗಳ ಪ್ರಕಾರ 1,864 ಶಾಲೆಗಳಲ್ಲಿ ಒಬ್ಬನೇ ವಿದ್ಯಾರ್ಥಿಯೂ ಇಲ್ಲ ಎಂಬುದು ಕಂಡು ಬಂದಿದೆ.
ಉತ್ತರ ಸಿಗದ ಪ್ರಶ್ನೆಗಳು: ಮಕ್ಕಳಿಲ್ಲದ ಈ ಶಾಲೆಗಳು ಮಕ್ಕಳು ಶಾಲೆಗೆ ಬರಲು ಬಯಸದ ಪ್ರದೇಶಗಳಲ್ಲಿವೆಯೇ ಅಥವಾ ಶಾಲಾ ವಯಸ್ಸಿನ ಮಕ್ಕಳೇ ಆ ಪ್ರದೇಶದಲ್ಲಿ ಇಲ್ಲವೇ ಎಂಬುದು ಸ್ಪಷ್ಟವಾಗಿಲ್ಲ. ಒಟ್ಟಾರೆಯಾಗಿ ಹೆಚ್ಚುತ್ತಿರುವ ವಿದ್ಯಾರ್ಥಿ-ರಹಿತ ಶಾಲೆಗಳ ಸಂಖ್ಯೆಯು ಎಲ್ಲರಿಗೂ ಶಿಕ್ಷಣ ಎಂಬ ಮೂಲಭೂತ ನೀತಿಗೆ ಹಲವಾರು ಸವಾಲುಗಳನ್ನು ಹುಟ್ಟು ಹಾಕಿದೆ.
ಇದನ್ನೂ ಓದಿ : 'ಕೇಜ್ರಿವಾಲ್ ಮಂಗಳವಾರ ರಾಜೀನಾಮೆ ನೀಡುವುದು ಖಚಿತ': ದೆಹಲಿ ಆರೋಗ್ಯ ಸಚಿವ ಭಾರದ್ವಾಜ್ ಸ್ಪಷ್ಟನೆ - Arvind Kejriwal Resignation
