ಚರ್ಬಾ (ಹಿಮಾಚಲಪ್ರದೇಶ): ಶಿಕ್ಷಕರ ಹುದ್ದೆ ಗೌರವಯುತ ಮತ್ತು ಉನ್ನತವಾದುದು ಎಂದು ಗುರುತಿಸಲಾಗುತ್ತದೆ. ಮಕ್ಕಳ ಮತ್ತು ಸಮಾಜದ ಭವಿಷ್ಯವನ್ನು ರೂಪಿಸುವ ಮಹತ್ತರ ಹೊಣೆಯೂ ಅವರ ಮೇಲಿರುತ್ತದೆ. ಅಂತಹ ಹುದ್ದೆಗೆ ಇಲ್ಲಿನ ಸರ್ಕಾರಿ ಶಾಲೆಯೊಂದು ನೀಡಿದ ಕಿಮ್ಮತ್ತು ಮಾತ್ರ ಕನಿಷ್ಟವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಈ ಪೋಸ್ಟ್ ನಗೆಪಾಟಲಿಗೀಡಾಗಿದೆ.
ಹಿಮಾಚಲ ಪ್ರದೇಶದ ಸರ್ಕಾರಿ ಪ್ರೌಢಶಾಲೆಯೊಂದು ಶಿಕ್ಷಕರ ಹುದ್ದೆಗೆ ಅಧಿಸೂಚನೆ ಹೊರಡಿಸಿದೆ. ಅದರಲ್ಲಿ ಎರಡು ಬೇರೆ ಹುದ್ದೆಗಳಿಗೆ ಅಭ್ಯರ್ಥಿಗಳನ್ನು ಆಹ್ವಾನಿಸಲಾಗಿದೆ. ಒಂದು ಅರೆಕಾಲಿಕ ಶಿಕ್ಷಕ ಹುದ್ದೆಯಾಗಿದ್ದರೆ, ಇನ್ನೊಂದು ವಾಚ್ಮನ್ ಪೋಸ್ಟ್. ವಿಶೇಷವೆಂದರೆ, ಶಿಕ್ಷಕರಿಗಿಂತ ಹೆಚ್ಚಿನ ಸಂಬಳವನ್ನು ವಾಚ್ಮನ್ಗೆ ನೀಡಲಾಗಿದೆ. ಈ ತರ್ಕವೇ ಈಗ ಬಹುಚರ್ಚಿತ ವಿಷಯವಾಗಿದೆ.
ಅರೆಕಾಲಿಕ ಶಿಕ್ಷಕರಿಗೆ ಶೈಕ್ಷಣಿಕ ಅರ್ಹತೆ B.Sc./M.Sc ಇರಬೇಕು ಎಂದು ಸೂಚನೆಯಲ್ಲಿ ನೀಡಲಾಗಿದೆ. ವಾಚ್ಮನ್ ಹುದ್ದೆಗೆ 10 ನೇ ತರಗತಿ ಅರ್ಹತೆಯಾಗಿದೆ. ಶಿಕ್ಷಕರ ಸಂಬಳ 8,450 ರೂಪಾಯಿ ಇದ್ದರೆ, ವಾಚ್ಮನ್ಗೆ 10,630 ರೂಪಾಯಿ ಎಂದು ನಮೂದಿಸಲಾಗಿದೆ. ಎರಡೂ ಹುದ್ದೆಗಳಿಗೆ ಅಕ್ಟೋಬರ್ 20 ರಂದು ಸಂದರ್ಶನ ನಡೆಯಲಿದೆ ಎಂದು ಪ್ರಕಟಣೆ ತಿಳಿಸಿದೆ.
ನರೇಗಾ ಕೂಲಿಗಿಂತ ಕಡಿಮೆ: ರಾಜ್ಯ ಶಿಕ್ಷಣ ಇಲಾಖೆಯಡಿ ಪ್ರಕಟಿಸಲಾದ ಈ ನೇಮಕಾತಿ ಪ್ರಕಟಣೆ ನೋಡಿದವರು ಮುಸಿಮುಸಿ ನಗುವಂತಾಗಿದೆ. ಯಾವ ಪುರುಷಾರ್ಥಕ್ಕಾಗಿ ಕಷ್ಟಪಟ್ಟು ಪದವಿ ಪಡೆಯಬೇಕು ಎಂದು ಪ್ರಶ್ನಿಸುತ್ತಿದ್ದಾರೆ. ವಾಚ್ಮನ್ ಹುದ್ದೆಗಿಂತ ಶಿಕ್ಷಕ ಹುದ್ದೆಯೇ ಕನಿಷ್ಟವಾಯಿತಾ ಎಂದು ಕೆಲವರು ಪ್ರಶ್ನಿಸಿದ್ದಾರೆ. ನರೇಗಾ ಯೋಜನೆಯಡಿ ಕೆಲಸ ಮಾಡಿದಲ್ಲಿ ದಿನಕ್ಕೆ 300 ರೂಪಾಯಿಯಂತೆ ತಿಂಗಳಿಗೆ 9 ಸಾವಿರ ಗಳಿಸಬಹುದು. ಶಿಕ್ಷಕ ಹುದ್ದೆಗೆ ಕೇವಲ 8 ಸಾವಿರ ಘೋಷಿಸಿದ್ದು, ನರೇಗಾ ಕೂಲಿಗಿಂತಲೂ ಕಡಿಮೆಯಾಗಿದೆ.
ಅಧಿಸೂಚನೆ ಬಗ್ಗೆ ಶಿಕ್ಷಕರು ಹೇಳಿದ್ದೇನು?: ಟೀಕೆಗೆ ಗುರಿಯಾದ ಅಧಿಸೂಚನೆಗೆ ಸಂಬಂಧಿಸಿದಂತೆ ಶಾಲೆಯ ಪ್ರಾಂಶುಪಾಲೆ ಅರುಣಾ ಚಡಕ್ ಅವರು ಸ್ಪಷ್ಟನೆ ನೀಡಿದ್ದು, ಅರೆಕಾಲಿಕ ಶಿಕ್ಷಕರ ಪಾಠದ ಸಮಯದ ಮಿತಿ ಕಡಿಮೆ ಇದೆ. ಬೆಳಗ್ಗೆ ಮತ್ತು ಸಂಜೆ ತಲಾ ಒಂದು ಗಂಟೆ ಕಲಿಸಲು ಅವರನ್ನು ನಿಯೋಜಿಸಲಾಗುತ್ತದೆ. ಅರೆಕಾಲಿಕ ಕೆಲಸ ಎಂದು ಜಾಹೀರಾತಿನಲ್ಲಿ ಸ್ಪಷ್ಟವಾಗಿದೆ. ಆದರೆ, ವಾಚ್ಮನ್ ಹುದ್ದೆಯು ಪೂರ್ಣಾವಧಿ ಮತ್ತು ಹೆಚ್ಚಿನ ಕೆಲಸದ್ದಾಗಿದೆ ಎಂದು ಹೇಳಿದ್ದಾರೆ.
ನೆಟ್ಟಿಗರಿಂದ ಟ್ರೋಲ್: ಇನ್ನೂ, ಈ ಅಧಿಸೂಚನೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಶಾಲಾ ಆಡಳಿತ ಮಂಡಳಿ ವಿರುದ್ಧ ಹಲವರು ಛೇಡಿಸಿದರೆ, ಇನ್ನೊಂದಷ್ಟು ಜನರು ಟೀಕಿಸಿದ್ದಾರೆ. ಶಿಕ್ಷಕ ಹುದ್ದೆಗಿಂತ ವಾಚ್ಮನ್ ಕೆಲಸವೇ ಮೇಲು ಎಂದು ತಮಾಷೆ ಮಾಡಲಾಗಿದೆ.
ಟೀಚರ್ ಕೆಲಸದ ಬದಲಿಗೆ ವಾಚ್ಮನ್ ಹುದ್ದೆಗೆ ಅರ್ಜಿ ಹಾಕುವುದೇ ಉತ್ತಮ ಎಂದು ಒಬ್ಬರು ಹೇಳಿದ್ದರೆ, 'ಈ ಶಾಲೆಯಲ್ಲಿ ಎಲ್ಲರೂ ವಾಚ್ಮನ್ಗಳೇ ಇರಬೇಕು, ಯಾವ ಶಿಕ್ಷಕರೂ ಇಲ್ಲಿಗೆ ಬರುವುದಿಲ್ಲ' ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ, ಇನ್ನೊಬ್ಬ ಬಳಕೆದಾರ, ಇದು ತುಂಬಾ ದುಃಖಕರ ವಿಚಾರ. ಶಿಕ್ಷಣವನ್ನು ಕತ್ತು ಹಿಸುಕಲಾಗಿದೆ ಎಂದು ಬೇಸರಿಸಿದ್ದಾರೆ.
ಇದನ್ನೂ ಓದಿ: ಅ.16 ರಂದು ಜಮ್ಮು- ಕಾಶ್ಮೀರ ಸಿಎಂ ಆಗಿ ಒಮರ್ ಅಬ್ದುಲ್ಲಾ ಪದಗ್ರಹಣ: ನಿತೀಶ್, ನಾಯ್ಡುಗೆ ಆಹ್ವಾನ
