ಲಖನೌ (ಉತ್ತರಪ್ರದೇಶ): ಲೋಕಸಭೆ ಚುನಾವಣೆ ಹೊತ್ತಲ್ಲೇ, ಉತ್ತರಪ್ರದೇಶದ ಲಖನೌನ ಕಾಕೋರಿ ಎಂಬಲ್ಲಿ ಬಿಜೆಪಿ ಮುಖಂಡನ ಮೇಲೆ ಗುಂಡಿನ ದಾಳಿ ನಡೆದಿದೆ. ಘಟನೆಯಲ್ಲಿ ಬಿಜೆಪಿ ಮುಖಂಡ ತೀವ್ರ ಗಾಯಗೊಂಡಿದ್ದರೆ, ಆತನ ಸಹಚರ ಹತ್ಯೆಗೀಡಾಗಿದ್ದಾರೆ. ದಾಳಿಕೋರರ ಪತ್ತೆಗೆ ಪೊಲೀಸರು 5 ತಂಡಗಳನ್ನು ರಚಿಸಿದ್ದಾರೆ.
ಬಿಜೆಪಿ ಮುಖಂಡ, ಕಾಕೋರಿ ಬ್ಲಾಕ್ ಮಾಜಿ ಮುಖ್ಯಸ್ಥ ರಾಮ್ ಬಿಲಾಸ್ ರಾವತ್ ಅವರು ತೇಜ್ ಕಿಶಾನಖೇಡ ಗ್ರಾಮದಲ್ಲಿ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಬಳಿಕ ವಾಪಸ್ ತೆರಳುತ್ತಿದ್ದರು. ಈ ವೇಳೆ ಬೆನ್ನಟ್ಟಿ ಬಂದ ದಾಳಿಕೋರರ ಗುಂಪು ಅವರ ಮೇಲೆ ಗುಂಡಿನ ದಾಳಿ ಮಾಡಿದೆ. ರಾಮ್ ಬಿಲಾಸ್ ಅವರ ಜೊತೆಗೆ ಇದ್ದ ಅನಂತ್ ರಾಮ್ ಯಾದವ್ (65) ಗುಂಡೇಟಿಗೆ ಬಲಿಯಾಗಿದ್ದಾರೆ. ಜೈಕರನ್ ಯಾದವ್ ಮತ್ತು ಅಮಿತ್ ಅಲಿಯಾಸ್ ಛೋಟು ಗಾಯಗೊಂಡು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ಘಟನೆಯು ಶುಕ್ರವಾರ ರಾತ್ರಿ 10 ಗಂಟೆ ವೇಳೆಗೆ ನಡೆದಿದೆ. ರಾಮ್ ಬಿಲಾಸ್ ಅವರ ಹೊಟ್ಟೆಗೆ ಗುಂಡು ತಗುಲಿದ್ದರೆ, ಅನಂತ್ ರಾಮ್ ಯಾದವ್ ಕುತ್ತಿಗೆಗೆ ಹಾಗೂ ಜೈಕರಣ್ ಅವರ ತಲೆಗೆ ಗುಂಡುಗಳು ತಾಕಿವೆ. ಅಮಿತ್ ಕೈಗೆ ಪೆಟ್ಟಾಗಿದೆ. ಅನಂತ್ ರಾಮ್ ಯಾದವ್ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ಗಂಭೀರವಾಗಿ ಗಾಯಗೊಂಡ ರಾಮ್ ಬಿಲಾಸ್ ಅವರನ್ನು ಅಪೋಲೋ ಮೆಡಿಕಲ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಅವರ ಸ್ಥಿತಿಯೂ ಚಿಂತಾಜನಕವಾಗಿದೆ ಎಂದು ತಿಳಿದುಬಂದಿದೆ. ಘಟನೆಯ ಮಾಹಿತಿ ತಿಳಿದ ನಂತರ ಪೊಲೀಸ್ ಅಧಿಕಾರಿಗಳು ಘಟನಾ ಸ್ಥಳಕ್ಕೆ ಆಗಮಿಸಿ, ಬಳಿಕ ಗಾಯಾಳುಗಳನ್ನು ಭೇಟಿ ಮಾಡಿ ವಿಚಾರಿಸಿದ್ದಾರೆ.
ದಾಳಿಕೋರರ ಪತ್ತೆಗೆ ತಂಡ ರಚನೆ: ಆಸ್ತಿ ಡೀಲರ್ ಮೋನು ರಾವತ್, ಮೋನು ಅವರ ಸಹೋದರ ಅಖಿಲೇಶ್ ರಾವತ್, ಗಿಯಾನಿ ಲೋಧಿ, ಶ್ರೀಕೃಷ್ಣ ರಾವತ್, ಬಬ್ಲು ಲೋಧಿ ಮತ್ತು ರಿಂಕು ಲೋಧಿ ಇವರನ್ನು ಆರೋಪಿಗಳು ಎಂದು ಅನುಮಾನಿಸಲಾಗಿದೆ. ಪೊಲೀಸರು ದಾಳಿಕೋರರ ಪತ್ತೆಗೆ 5 ತಂಡಗಳನ್ನು ರಚಿಸಿಕೊಂಡು ಜಾಲಾಡುತ್ತಿದ್ದಾರೆ. ಆರೋಪಿಗಳು ಸದ್ಯ ನಾಪತ್ತೆಯಾಗಿದ್ದಾರೆ.
ಬಿಜೆಪಿ ಮುಖಂಡ ರಾಮ್ ಬಿಲಾಸ್ ರಾವತ್ ಅವರು ಕೇಂದ್ರ ಸಚಿವ ಕೌಶಲ್ ಕಿಶೋರ್ ಅವರ ನಿಕಟವರ್ತಿಯಾಗಿದ್ದಾರೆ. ಭಾರತೀಯ ಜನತಾ ಪಕ್ಷದಿಂದ ಉನ್ನಾವೋದ ಮೋಹನ್ ವಿಧಾನಸಭಾ ಕ್ಷೇತ್ರದಿಂದ ಚುನಾವಣೆಗೆ ಸ್ಪರ್ಧಿಸಲು ತಯಾರಿ ನಡೆಸಿದ್ದರು. ಕೆಲವು ದಿನಗಳ ಹಿಂದೆ ದಾಳಿಕೋರ ಆರೋಪಿ ಮೋನು ರಾವತ್ ಸಹೋದರನನ್ನು ಬಿಜೆಪಿ ಮುಖಂಡ ರಾಮ್ ಬಿಲಾಸ್ ಅವರು ಅತ್ಯಾಚಾರ ಪ್ರಕರಣದಲ್ಲಿ ಜೈಲಿಗೆ ಕಳುಹಿಸಿದ್ದ. ಇದು ಇಬ್ಬರ ನಡುವೆ ವೈಷಮ್ಯ ಮೂಡಿಸಿತ್ತು. ದ್ವೇಷದ ಹಿನ್ನೆಲೆಯಲ್ಲಿ ಈ ದಾಳಿ ನಡೆದಿದೆ ಎಂದು ಅನುಮಾನಿಸಲಾಗಿದೆ. ಘಟನಾ ಸ್ಥಳದ ಸಮೀಪದಲ್ಲಿ ಅಳವಡಿಸಲಾಗಿರುವ ಸಿಸಿಟಿವಿ ದೃಶ್ಯಾವಳಿಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ಈ ಬಗ್ಗೆ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ: ವಿಜಯಪುರ: ಕಾರು - ಟ್ರಕ್ ನಡುವೆ ಭೀಕರ ಅಪಘಾತ: ಸ್ಥಳದಲ್ಲೇ ನಾಲ್ವರ ದುರ್ಮರಣ - VIJAYAPURA ACCIDENT
