’ನಾನು ಶೀಘ್ರದಲ್ಲೇ ಮದುವೆಯಾಗಬೇಕು‘; ಸಾರ್ವಜನಿಕ ಸಭೆಯಲ್ಲಿ ತೂರಿಬಂದ ಪ್ರಶ್ನೆಗೆ 53 ವರ್ಷದ ರಾಹುಲ್​ ಗಾಂಧಿ ಉತ್ತರವಿದು! - Jaldi Hai Karni Padigee

ಜಲ್ದಿ ಹೈ ಕರ್ನಿ ಪಡೆಗೀ: ರಾಯ್​​ಬರೇಲಿಯಲ್ಲಿ ನಡೆದ ಸಭೆಯಲ್ಲಿ ಕಾಂಗ್ರೆಸ್​ ನಾಯಕ ರಾಹುಲ್ ಗಾಂಧಿ ತಮ್ಮ ಮದುವೆ ಕುರಿತು ಪ್ರತಿಕ್ರಿಯಿಸಿದ್ದಾರೆ.

ರಾಯ್​​ಬರೇಲಿ (ಉತ್ತರ ಪ್ರದೇಶ): ಲೋಕಸಭಾ ಚುನಾವಣೆ ಹಿನ್ನೆಲೆ ರಾಯ್‌ಬರೇಲಿಯಲ್ಲಿ ಸೋಮವಾರ ನಡೆದ ಸಾರ್ವಜನಿಕ ಸಭೆಯಲ್ಲಿ ಮಾತನಾಡುತ್ತಾ ಕಾಂಗ್ರೆಸ್​ ನಾಯಕ ರಾಹುಲ್​ ಗಾಂಧಿ ತಮ್ಮ ವಿವಾಹದ ಬಗ್ಗೆ ಪ್ರಸ್ತಾಪ ಮಾಡಿದರು. ಸಾರ್ವಜನಿಕ ಸಭೆಯಲ್ಲಿ ನಿಮ್ಮ ಮದುವೆ ಪ್ಲಾನ್‌ ಏನು? ಯಾವಾಗ ಮದುವೆ ಆಗುತ್ತೀರಿ ಎಂಬ ಪ್ರಶ್ನೆ ಗುಂಪಿನಲ್ಲಿ ತೂರಿ ಬಂತು. ಈ ವೇಳೆ ಪ್ರಿಯಾಂಕಾ ಗಾಂಧಿ ವಾದ್ರಾ ಪ್ರತಿಕ್ರಿಯಿಸಲು ಮುಂದಾಗುತ್ತಿದ್ದಂತೆ ಕೊಂಚವೂ ತಡವರಿಸದೇ, ಪ್ರಶ್ನೆಗೆ ಉತ್ತರಿಸಿದ ರಾಹುಲ್​ ಗಾಂಧಿ, "ಜಲ್ದಿ ಹೈ ಕರ್ನಿ ಪಡೆಗೀ" (ನಾನು ಶೀಘ್ರದಲ್ಲೇ ಮದುವೆಯಾಗಬೇಕು) ಎಂದರು.

ಅದಕ್ಕೂ ಮುನ್ನ ಸಾರ್ವಜನಿಕ ಸಭೆ ಉದ್ದೇಶಿಸಿ ಮಾತನಾಡಿದ ಅವರು, ರಾಯ್​​ಬರೇಲಿಯೊಂದಿಗಿನ ನಮ್ಮ ಸಂಬಂಧ 100 ವರ್ಷಗಳಿಗಿಂತ ಹಳೆಯದು. ನನ್ನ ಕುಟುಂಬದವರಾದ ಜವಾಹರಲಾಲ್ ನೆಹರು ತಮ್ಮ ರಾಜಕೀಯ ಜೀವನವನ್ನು ಇಲ್ಲಿಂದಲೇ ಪ್ರಾರಂಭಿಸಿದರು. ಹಾಗಾಗಿ ನಮ್ಮ-ನಿಮ್ಮ ಸಂಬಂಧ ಬಹಳ ವರ್ಷಗಳ ಹಿಂದಿನದ್ದು. ನಾನು ರಾಯ್​ಬರೇಲಿಯಿಂದ ಚುನಾವಣೆಗೆ ಸ್ಪರ್ಧಿಸಲು ಬಲವಾದ ಕಾರಣವೂ ಇದೆ. ನಾವು ಗೆದ್ದರೆ ಸಂವಿಧಾನ ಬದಲಿಸುತ್ತೇವೆಂದು ಬಿಜೆಪಿ ನಾಯಕರು ಹೇಳಿಕೊಂಡು ಬರುತ್ತಿದ್ದಾರೆ. ಅಂತಹ ಘಟನೆ ನಡೆಯಬಾರದು. ಹಾಗಾಗಿ, ಕ್ಷೇತ್ರದ ಜನ ಅವರಿಗೆ ತಕ್ಕ ಉತ್ತರ ನೀಡಬೇಕು ಎಂದು ಕೇಂದ್ರ ಬಿಜೆಪಿ ವಿರುದ್ಧ ರಾಹುಲ್​ ಗಾಂಧಿ ವಾಗ್ದಾಳಿ ನಡೆಸಿದರು.

• Asked about marriage plans during UP rally, Rahul Gandhi says "will have to marry soon"
  
  Read @ANI Story | https://t.co/bxuMlAnVZ4#RahulGandhi #PriyankaGandhi #Congress pic.twitter.com/FSkNdA4bIU

  — ANI Digital (@ani_digital) May 13, 2024

ಇದು ನನ್ನ ಇಬ್ಬರು ತಾಯಂದಿರ ಕೆಲಸದ ಸ್ಥಳವೂ ಹೌದು. ರಾಯ್​​ಬರೇಲಿ ಜನರು ಇಂದು ಬಹಳ ಉತ್ಸಾಹದಿಂದ ಕೂಡಿದ್ದೀರಿ, ಧನ್ಯವಾದಗಳು. ಅಲ್ಲದೇ ನನ್ನ ಪ್ರಚಾರದ ಉದ್ದಕ್ಕೂ ನನ್ನ ಬೆಂಬಲವಾಗಿ ನಿಂತಿರುವ ನನ್ನ ಸಹೋದರಿಗೂ ಧನ್ಯವಾದ ಎಂದರು.

ಸಭೆ ಬಳಿಕ ಅವರು ಮನೆ ಮನೆಗೂ ತೆರಳಿ ಜನರ ಅಭಿಪ್ರಾಯ ಪಡೆದರು. ಈ ವೇಳೆ ಸಹೋದರಿ ಪ್ರಿಯಾಂಕಾ ಗಾಂಧಿ ತಮ್ಮ ಸಹೋದರ ರಾಹುಲ್ ಗಾಂಧಿ ಅವರಿಗೆ ಸಾಥ್​ ನೀಡಿದರು. ನಾಮಪತ್ರ ಸಲ್ಲಿಸಿದ ನಂತರ ರಾಹುಲ್ ಗಾಂಧಿ ಇದೇ ಮೊದಲ ಬಾರಿಗೆ ರಾಯ್​​ಬರೇಲಿಗೆ ಭೇಟಿ ನೀಡಿದ್ದರಿಂದ ಸಾವಿರಾರು ಜನ ಪ್ರಚಾರದಲ್ಲಿ ಭಾಗಿಯಾಗಿದ್ದರು.

ರಾಯ್​​ಬರೇಲಿಗೆ ತೆರಳುವ ಮುನ್ನ ರಾಹುಲ್ ತಮ್ಮ ಅಜ್ಜಿ ಹಾಗೂ ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಅವರಿಗೆ ನಮನ ಸಲ್ಲಿಸಿದರು.

2019ರ ಲೋಕಸಭಾ ಚುನಾವಣೆಯಲ್ಲಿ ತಮ್ಮ ಕುಟುಂಬದ ಕ್ಷೇತ್ರ ಅಮೇಥಿ ಜೊತೆಯಲ್ಲೇ ಕೇರಳದ ವಯನಾಡಿನಿಂದಲೂ ರಾಹುಲ್ ಗಾಂಧಿ ಸ್ಪರ್ಧೆ ಮಾಡಿದ್ದರು. ಈ ಪೈಕಿ ಅಮೇಥಿಯಲ್ಲಿ ಸೋತರೆ, ವಯನಾಡಿನಲ್ಲಿ ಗೆಲುವು ಸಾಧಿಸಿದ್ದರು. 2024ರ ಚುನಾವಣೆಯಲ್ಲಿಯೂ ರಾಹುಲ್​ ಗಾಂಧಿ ಎರಡು ಕ್ಷೇತ್ರಗಳನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ವಯನಾಡಿನ ಜೊತೆಗೆ ರಾಯ್​​ಬರೇಲಿಯಿಂದಲೂ ಕಣಕ್ಕಿಳಿದಿದ್ದು ಭರ್ಜರಿ ಪ್ರಚಾರ ನಡೆಸಿದ್ದಾರೆ. ಅಮೇಥಿ ಕ್ಷೇತ್ರವನ್ನು ತಮ್ಮ ಕುಟುಂಬದ ಆಪ್ತ ಕಿಶೋರಿ ಲಾಲ್ ಶರ್ಮಾ ಅವರಿಗೆ ಬಿಟ್ಟುಕೊಟ್ಟಿದ್ದು ಬಿಜೆಪಿಯಿಂದ ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಕಣಕ್ಕಿಳಿದಿದ್ದಾರೆ.

ಇದನ್ನೂ ಓದಿ: ಪಾಕಿಸ್ತಾನ ಬಳೆ ತೊಟ್ಟಿಲ್ಲ ಅಂದ್ರೆ ಭಾರತ ತೊಡಿಸುತ್ತದೆ: ಫಾರೂಕ್​ ಅಬ್ದುಲ್ಲಾ ಹೇಳಿಕೆಗೆ ಮೋದಿ ತಿರುಗೇಟು - PM Modi