ಅಂಬಿಕಾಪುರ, ಛತ್ತೀಸ್ಗಢ: ಭಾರತೀಯ ಸೇನೆಯ ಶೌರ್ಯ ಟಿ55 ಟ್ಯಾಂಕ್ ಛತ್ತೀಸ್‌ಗಢದ ಅಂಬಿಕಾಪುರದಲ್ಲಿರುವ ಸೈನಿಕ ಶಾಲೆಯಲ್ಲಿ ಬುಧವಾರ ಸ್ಥಾಪಿಸಲಾಗಿದೆ. ಭಾರತೀಯ ಸೇನೆಯ ನಿವೃತ್ತ ಯುದ್ಧ ಟ್ಯಾಂಕ್ ಇದಾಗಿದೆ. ಅಂಬಿಕಾಪುರ ಶಾಸಕ ರಾಜೇಶ್ ಅಗರ್ವಾಲ್ ಮತ್ತು ಶಾಲೆಯ ಉಪ ಪ್ರಾಂಶುಪಾಲ ಪಿ ಶ್ರೀನಿವಾಸ್ ಅಧಿಕೃತವಾಗಿ ಶಾಲೆಯ ಮುಖ್ಯ ದ್ವಾರದಲ್ಲಿ ಈ ಟಾಂಕರ್ ಅನಾವರಣಗೊಳಿಸಿದರು.
ದೇಶಪ್ರೇಮದ ಭಾವನೆ ಹೆಚ್ಚಿಸಲು ಅಳವಡಿಕೆ : ಅಂಬಿಕಾಪುರದ ಸೈನಿಕ ಶಾಲೆಯಲ್ಲಿ ಟಿ 55 ಟ್ಯಾಂಕ್ ಅಳವಡಿಸುವುದರಿಂದ ಜನರಲ್ಲಿ ದೇಶಪ್ರೇಮದ ಭಾವನೆ ಹೆಚ್ಚುತ್ತದೆ. ಇದರೊಂದಿಗೆ ಈ ಭಾಗದ ಯುವಕರು ಸೇನೆ ಸೇರಲು ಸ್ಫೂರ್ತಿ ಆಗಲಿದೆ. ಅಂಬಿಕಾಪುರ ಮತ್ತು ಸುರ್ಗುಜಾದ ಜನರು ಈ ಟ್ಯಾಂಕ್ ನೋಡುವ ಮೂಲಕ ಸೈನ್ಯದ ನೆನಪುಗಳು ಮತ್ತು ಆಗಿನ ಸಾಹಸಗಾಥೆಗಳನ್ನು ಕೇಳಿ ತಿಳಿದುಕೊಳ್ಳಲು ಇದು ಸಹಕಾರಿ ಆಗಲಿದೆ. ಈ ಶಾಲೆಯಲ್ಲಿ ಟ್ಯಾಂಕ್ ಅಳವಡಿಕೆಯಾದ ಮೇಲೆ ಎಲ್ಲ ಸೈನಿಕ ಶಾಲೆಯ ಕೆಡೆಟ್‌ಗಳು, ಸ್ಥಳೀಯ ಜನರು ಮತ್ತು ಸಾರ್ವಜನಿಕ ಪ್ರತಿನಿಧಿಗಳು ಟಿ 55 ಟ್ಯಾಂಕ್ ನೋಡಿ ಖುಷಿ ಪಟ್ಟರು.
T 55 ಟ್ಯಾಂಕ್ ಗಿದೆ ಅದ್ಭುತ ಇತಿಹಾಸ: T 55 ಟ್ಯಾಂಕ್‌ಗೆ ಭಾರತೀಯ ಸೇನೆಯಲ್ಲಿ ಭವ್ಯ ಇತಿಹಾಸವಿದೆ. 1971ರ ಭಾರತ-ಪಾಕಿಸ್ತಾನ ಯುದ್ಧದಲ್ಲಿ ಈ ಟ್ಯಾಂಕ್ ಅದ್ಭುತ ಪಾತ್ರ ವಹಿಸಿತ್ತು. ಈ ಟ್ಯಾಂಕ್ನ ಸಹಾಯದಿಂದ ಭಾರತೀಯ ಸೇನೆಯು ಬಾಂಗ್ಲಾದೇಶ ವಿಮೋಚನಾ ಯುದ್ಧದಲ್ಲಿ ಪಾಕಿಸ್ತಾನಿ ಸೈನಿಕರನ್ನು ಶರಣಾಗುವಂತೆ ಮಾಡುವಲ್ಲಿ ಗಮನಾರ್ಹ ಕೊಡುಗೆ ನೀಡಿದೆ. ಈ ಯುದ್ಧ ಟ್ಯಾಂಕರ್ನ ಭವ್ಯ ಇತಿಹಾಸದ ಕಥೆಗಳನ್ನು ಕೇಳಿದರೆ ಜನರ ಎದೆಯಲ್ಲಿ ಹೆಮ್ಮೆ ಮೂಡದೇ ಇರದು. ಈ ಟ್ಯಾಂಕ್ 72 ಆರ್ಮರ್ ರೆಜಿಮೆಂಟ್‌ಗೆ ಸೇರಿದ್ದಾಗಿದೆ. ಈ ರೆಜಿಮೆಂಟ್ ಚಾಮ್ ಕದನದಲ್ಲಿ ಭಾಗವಹಿಸಿತ್ತು. ಈ ಟ್ಯಾಂಕ್ ನ ಫೈರಿಂಗ್ ರೇಂಜ್ 14 ಕಿಲೋಮೀಟರ್ ಎಂಬುದು ಗಮನಾರ್ಹ.
ಇದು ಸೋವಿಯತ್ ರಷ್ಯಾದ ಮೂಲದ್ದು: 1950 ರ ನಂತರ ಭಾರತೀಯ ಸೇನೆಗೆ ಸೇರಿದ ಈ ಟ್ಯಾಂಕ್, ಅನೇಕ ಕಾರ್ಯಾಚರಣೆಗಳಲ್ಲಿ ಪಾಲ್ಗೊಂಡು ತನ್ನ ಸಾಮರ್ಥ್ಯ ತೋರಿಸಿದೆ. ಈ ಟ್ಯಾಂಕ್ ಅನ್ನು ಸೈನಿಕ್ ಸ್ಕೂಲ್ ಅಂಬಿಕಾಪುರಕ್ಕೆ ನೀಡಲಾಗಿದೆ. ಇದು ಛತ್ತೀಸ್ಗಢ ರಾಜ್ಯದ ಮೊದಲ T55 ಟ್ಯಾಂಕ್ ಆಗಿದೆ. ವಾಸ್ತವವಾಗಿ ಇದು ರಾಜ್ಯದ ಎರಡನೇ ಟ್ಯಾಂಕ್ ಕೂಡಾ ಹೌದು. ಇದರ ತೂಕ 36 ಟನ್‌ಗಳು, ಈ ಟ್ಯಾಂಕರ್ ಗೆ ಕಮಾಂಡರ್, ಗನ್ನರ್, ಲೋಡರ್ ಮತ್ತು ಡ್ರೈವರ್ ಇದ್ದಾರೆ. ಇದರ ಗರಿಷ್ಠ ವೇಗ ಗಂಟೆಗೆ 54 ಕಿಲೋಮೀಟರ್ ಎಂದು ಅಂಬಿಕಾಪುರ ಸೈನಿಕ ಶಾಲೆಯ ಉಪ ಪ್ರಾಚಾರ್ಯ ಪಿ ಶ್ರೀನಿವಾಸ್ ಹೇಳಿದ್ದಾರೆ.
ಈ ಟ್ಯಾಂಕ್ ಅನೇಕ ಪ್ರಮುಖ ಕಾರ್ಯಾಚರಣೆಗಳನ್ನು ಮಾಡಿದೆ. ಅದರಲ್ಲಿ ಪ್ರಮುಖವಾದದ್ದು 1971 ರಲ್ಲಿ ನಡೆದ ಚಾಮ್ ಕದನ. ಈ ಟ್ಯಾಂಕ್ ಬಾಂಗ್ಲಾದೇಶ ವಿಮೋಚನಾ ಯುದ್ಧದಲ್ಲಿ ಬಳಸಲಾಗಿತ್ತು. 30 ವರ್ಷಗಳ ಕಾಲ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿದೆ. ಇದನ್ನು 1997 ರಲ್ಲಿ ಸ್ಥಗಿತಗೊಳಿಸಲಾಯಿತು ಮತ್ತು ಈಗ ಅದು ಅಂಬಿಕಾಪುರದಲ್ಲಿದೆ - ಅನ್ಶ್ ಸಿನ್ಹಾ, ವೈಸ್ ಕ್ಯಾಪ್ಟನ್,ಸೈನಿಕ್ ಸ್ಕೂಲ್ ಅಂಬಿಕಾಪುರ .
ಅಂಬಿಕಾಪುರದ ಸೈನಿಕ ಶಾಲೆಯಲ್ಲಿ ಈ ಟ್ಯಾಂಕ್ ಸ್ಥಾಪನೆಯಿಂದ ಜನರು ಸಂತಸಗೊಂಡಿದ್ದಾರೆ. ವಿದ್ಯಾರ್ಥಿಗಳು, ಸಾರ್ವಜನಿಕರು ಮತ್ತು ಸ್ಥಳೀಯರು ಈ ಟ್ಯಾಂಕ್ ಬಗ್ಗೆ ಅದ್ಭುತ ಕ್ರೇಜ್ ಹೊಂದಿದ್ದು, ಈ ಬಗ್ಗೆ ತಿಳಿದುಕೊಳ್ಳಲು ಮುಗಿಬಿದ್ದಿದ್ದಾರೆ.
ಇದನ್ನು ಓದಿ: ಸಂಧ್ಯಾ ಥಿಯೇಟರ್ ಕಾಲ್ತುಳಿತ ಪ್ರಕರಣ; ಸಾಮಾಜಿಕ ಜಾಲತಾಣದಲ್ಲಿ ತಪ್ಪು ಮಾಹಿತಿ ಹರಿಬಿಟ್ಟರೆ ಕಠಿಣ ಕ್ರಮದ ಎಚ್ಚರಿಕೆ
