ನವದೆಹಲಿ: ರಾಜ್ಯಸಭೆಯಲ್ಲಿ ಗೃಹ ಸಚಿವ ಅಮಿತ್ ಶಾ ಅವರು ಅಂಬೇಡ್ಕರ್ ಅವರ ಬಗ್ಗೆ ನೀಡಿದ ಹೇಳಿಕೆಯು ಇಂದು ಸಂಸತ್ ಭವನದ ಮುಂದೆ ರಣಾಂಗಣ ಸೃಷ್ಟಿಸಿದೆ. ಕಾಂಗ್ರೆಸ್ ಮತ್ತು ಬಿಜೆಪಿ ಸಂಸದರ ಪ್ರತಿಭಟನೆಯಲ್ಲಿ ತಮ್ಮ ಜೊತೆ ಅನುಚಿತವಾಗಿ ವರ್ತಿಸಿ, ಹಲ್ಲೆ ನಡೆಸಲಾಗಿದೆ ಎಂದು ಮಹಿಳಾ ಸಂಸದೆಯರು ಆರೋಪಿಸಿದ್ದಾರೆ. ಈ ಬಗ್ಗೆ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ.
ನಾಗಾಲ್ಯಾಂಡ್ನ ಬಿಜೆಪಿ ಸಂಸದೆ ಫಾಂಗ್ನಾನ್ ಕೊನ್ಯಾಕ್ ಅವರು ವಿಪಕ್ಷ ನಾಯಕ ರಾಹುಲ್ ಗಾಂಧಿ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ. "ಕಾಂಗ್ರೆಸ್ ನಾಯಕ ನನ್ನೊಂದಿಗೆ ಅನುಚಿತವಾಗಿ ವರ್ತಿಸಿ ತಳ್ಳಿದರು. ಇದು ನನಗೆ ಮುಜುಗರ ತರಿಸಿತು" ಎಂದು ದೂರಿದ್ದಾರೆ.
#WATCH | Delhi: BJP Rajya Sabha MP Phangnon Konyak says, " lop rahul gandhi came close... i did not like it and he started shouting...whatever happened today is very sad, this should not happen. we did not like the way they threatened...i have also complained to the chairman..." https://t.co/d83HUvwQFl pic.twitter.com/oGtaja66le
— ANI (@ANI) December 19, 2024
"ಸಂಸತ್ ಭವನದ ಮಕರ ದ್ವಾರದ ಬಳಿ ನಿಂತಿದ್ದಾಗ ರಾಹುಲ್ ಗಾಂಧಿ ನನ್ನ ಹತ್ತಿರಕ್ಕೆ ಬಂದರು. ಏರುಧ್ವನಿಯಲ್ಲಿ ಕೂಗಾಡಿದರು. ದೈಹಿಕವಾಗಿ ತೀರಾ ಸಮೀಪಕ್ಕೆ ಬಂದರು. ಒಬ್ಬ ಮಹಿಳೆಯಾಗಿ ನಾನು ತೀವ್ರ ಮುಜುಗರ ಅನುಭವಿಸಿದೆ" ಎಂದು ಆರೋಪಿಸಿದ್ದಾರೆ.
"ದ್ವಾರದ ಬಳಿಯಿಂದ ನನ್ನನ್ನು ಬಲವಂತವಾಗಿ ತಳ್ಳಲಾಯಿತು. ಇದರಿಂದ ತೀವ್ರ ವ್ಯಥೆಯಿಂದ ನಾನು ಅಲ್ಲಿಂದ ಹೊರನಡೆದೆ. ಮಹಿಳಾ ಸಂಸದರ ಜೊತೆ ಯಾರೂ ಹೀಗೆ ನಡೆದುಕೊಳ್ಳಬಾರದು. ಇದು ಪ್ರಜಾಪ್ರಭುತ್ವದ ಅಣಕ" ಎಂದು ರಾಜ್ಯಸಭಾ ಸಭಾಧ್ಯಕ್ಷ ಜಗದೀಪ್ ಧನಕರ್ ಅವರಿಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ.
ಇದರ ವಿರುದ್ಧ ಪ್ರತಿಭಟನೆ ನಡೆಸಿದ ಬಿಜೆಪಿ, ತಮ್ಮ ಸಂಸದರ ಮೇಲೆ ವಿಪಕ್ಷಗಳ ಸಂಸದರು ಹಲ್ಲೆ ಮಾಡಿದ್ದಾರೆ. ಮಹಿಳಾ ಸಂಸದೆಯರ ಜೊತೆ ಅನುಚಿತವಾಗಿ ನಡೆದುಕೊಂಡಿದ್ದಾರೆ ಎಂದು ಆರೋಪಿಸಿ, ಅನುರಾಗ್ ಠಾಕೂರ್ ಮತ್ತು ಬಾನ್ಸುರಿ ಸ್ವರಾಜ್ ಅವರು ರಾಹುಲ್ ಗಾಂಧಿ ಸಂಸತ್ ಭವನ ರಸ್ತೆಯ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.
ಕಾಂಗ್ರೆಸ್ನಿಂದಲೂ ಪ್ರತಿ ದೂರು: ಪ್ರತಿಭಟನೆಯ ವೇಳೆ ತಮ್ಮ ಮೇಲೂ ಹಲ್ಲೆ ನಡೆಸಲಾಗಿದೆ ಎಂದು ಆರೋಪಿಸಿ ಕಾಂಗ್ರೆಸ್ ಕೂಡ ದೂರು ನೀಡಿದೆ. ಮಹಿಳಾ ಸಂಸದೆಯರು ಪೊಲೀಸ್ ಠಾಣೆಯವರೆಗೆ ಘೋಷಣೆಗಳೊಂದಿಗೆ ಮೆರವಣಿಗೆ ನಡೆಸಿದರು. ವಿಪಕ್ಷಗಳ ಸಂಸದರ ಮೇಲೆ ಆಡಳಿತಾರೂಢ ಎನ್ಡಿಎ ಸಂಸದರು ದೈಹಿಕ ಹಿಂಸೆ, ಹಲ್ಲೆ ಮಾಡಿದರು ಎಂದು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.
ಇನ್ನೂ, ಭವನದ ಮುಂದೆ ನಡೆದ ತೀವ್ರ ತಿಕ್ಕಾಟದಲ್ಲಿ ಬಿಜೆಪಿಯ ಸಂಸದರಾದ ಪ್ರತಾಪ್ ಚಂದ್ರ ಸಾರಂಗಿ ಮತ್ತು ಮುಖೇಶ್ ರಜಪೂತ್ ಅವರು ಗಾಯಗೊಂಡಿದ್ದಾರೆ. ರಕ್ತ ಗಾಯವಾದ ಕಾರಣ ಅವರನ್ನು ತಕ್ಷಣವೇ ಆಂಬ್ಯುಲೆನ್ಸ್ ಮೂಲಕ ಆಸ್ಪತ್ರೆಗೆ ದಾಖಲಿಸಲಾಗಿದೆ.
"ರಾಹುಲ್ ಗಾಂಧಿ ತಳ್ಳಿದರು. ಇದರಿಂದಾಗಿ ನಾನು ನೆಲಕ್ಕೆ ಬಿದ್ದೆ. ಹಣೆಯ ಭಾಗಕ್ಕೆ ಗಾಯವಾಯಿತು" ಎಂದು ಪ್ರತಾಪ್ ಚಂದ್ರ ಸಾರಂಗಿ ಅವರು ಮಾಧ್ಯಮಗಳ ಎದುರು ದೂರಿದರು. ಗಾಯಗೊಂಡ ಸಂಸದರ ಬಳಿ ರಾಹುಲ್ ಗಾಂಧಿ ಅವರು ಹೋಗಿ ಪರಿಶೀಲಿಸಿದರು.
ಆರೋಪ ನಿರಾಕರಿಸಿದ ರಾಹುಲ್ ಗಾಂಧಿ: ಬಳಿಕ ತಮ್ಮ ವಿರುದ್ಧ ಮಾಡಲಾದ ಎಲ್ಲ ಆರೋಪಗಳನ್ನು ವಿಪಕ್ಷ ನಾಯಕ ರಾಹುಲ್ ಗಾಂಧಿ ನಿರಾಕರಿಸಿದರು. "ವಾಸ್ತವವಾಗಿ, ನಾವೆಲ್ಲರೂ ಸಂಸತ್ತಿನ ಒಳಗೆ ಪ್ರವೇಶಿಸುತ್ತಿದ್ದಾಗ ಬಿಜೆಪಿ ಸಂಸದರು ತಡೆದು, ನಮ್ಮನ್ನೇ ತಳ್ಳಿದರು" ಎಂದು ಪ್ರತ್ಯಾರೋಪ ಮಾಡಿದರು.
ಇದನ್ನೂ ಓದಿ: ಅಂಬೇಡ್ಕರ್ ಕುರಿತು ಶಾ ಹೇಳಿಕೆ; ಸಂಸತ್ ಭವನದಲ್ಲಿ ಕಾಂಗ್ರೆಸ್ - ಬಿಜೆಪಿ ಪರಸ್ಪರ ಪ್ರತಿಭಟನೆ
