ಚೆನ್ನೈ: ಕೋಮಾ ಸ್ಥಿತಿಯಲ್ಲಿರುವ ವ್ಯಕ್ತಿಯೊಬ್ಬರ ಹೆಸರಿನಲ್ಲಿರುವ 1 ಕೋಟಿ ರೂಪಾಯಿಗೂ ಅಧಿಕ ಮೌಲ್ಯದ ಸ್ಥಿರಾಸ್ತಿಯನ್ನು ಮಾರಾಟ ಮಾಡಲು ಅಥವಾ ಅಡಮಾನ ಇಡಲು ಮತ್ತು ಆ ಹಣವನ್ನು ವೈದ್ಯಕೀಯ ವೆಚ್ಚಗಳಿಗೆ ಬಳಸಲು ಮದ್ರಾಸ್ ಹೈಕೋರ್ಟ್ ಆ ವ್ಯಕ್ತಿಯ ಪತ್ನಿಗೆ ಅನುಮತಿ ನೀಡಿದೆ. ಮಾರಾಟ ಅಥವಾ ಅಡಮಾನದಿಂದ ಬಂದ ಹಣವನ್ನು ಕುಟುಂಬದ ನಿರ್ವಹಣೆಗೂ ಬಳಸಬಹುದು ಎಂದು ನ್ಯಾಯಾಲಯ ಆದೇಶಿಸಿದೆ.
ನ್ಯಾಯಮೂರ್ತಿಗಳಾದ ಜಿ.ಆರ್. ಸ್ವಾಮಿನಾಥನ್ ಮತ್ತು ಪಿ.ಬಿ. ಬಾಲಾಜಿ ಅವರನ್ನೊಳಗೊಂಡ ಮದ್ರಾಸ್ ಹೈಕೋರ್ಟ್ನ ವಿಭಾಗೀಯ ಪೀಠವು ಬುಧವಾರ ಏಕಸದಸ್ಯ ಪೀಠದ ಆದೇಶವನ್ನು ರದ್ದುಗೊಳಿಸಿ ಮೇಲಿನಂತೆ ತೀರ್ಪು ನೀಡಿದೆ. ಈ ವರ್ಷದ ಆರಂಭದಿಂದಲೂ ಅನಾರೋಗ್ಯದಿಂದ ಬಳಲುತ್ತಿರುವ ತನ್ನ ಪತಿ ಎಂ. ಶಿವಕುಮಾರ್ ಅವರ ಪೋಷಕರಾಗಿ ತನ್ನನ್ನು ನೇಮಿಸುವಂತೆ ಕೋರಿ ಚೆನ್ನೈನ ಎಸ್. ಶಶಿಕಲಾ ಎಂಬುವರು ಸಲ್ಲಿಸಿದ್ದ ರಿಟ್ ಅರ್ಜಿಯನ್ನು ಏಕಸದಸ್ಯ ಪೀಠವು ಏಪ್ರಿಲ್ 23 ರಂದು ವಜಾಗೊಳಿಸಿತ್ತು.
ತನ್ನ ಪತಿಯ ಪೋಷಕಳಾಗಿ ತನ್ನನ್ನು ನೇಮಿಸಬೇಕು ಮತ್ತು ಆ ಮೂಲಕ ಆತನ ಬ್ಯಾಂಕ್ ಖಾತೆಗಳನ್ನು ನಿರ್ವಹಿಸಲು ಮತ್ತು ಅಗತ್ಯವಿದ್ದರೆ, ಚೆನ್ನೈ ಸೆಂಟ್ರಲ್ ರೈಲ್ವೆ ನಿಲ್ದಾಣದ ಪಕ್ಕದ ವಾಲ್ ಟಾಕ್ಸ್ ರಸ್ತೆಯಲ್ಲಿರುವ ಆತನ ಒಡೆತನದ ಸ್ಥಿರಾಸ್ತಿಯನ್ನು ಮಾರಾಟ ಮಾಡಲು ಅಥವಾ ಅಡಮಾನ ಇಡಲು ಅನುಮತಿ ನೀಡಬೇಕು ಎಂದು ಅರ್ಜಿದಾರರು ನ್ಯಾಯಾಲಯಕ್ಕೆ ಮನವಿ ಮಾಡಿದ್ದರು.
2017 ರ ಮಾನಸಿಕ ಆರೋಗ್ಯ ಕಾಯ್ದೆಯಲ್ಲಿ ಹಣಕಾಸಿನ ವಿಚಾರದ ಬಗ್ಗೆ ಯಾವುದೇ ನಿಬಂಧನೆಗಳು ಇಲ್ಲವಾದ್ದರಿಂದ ಪೋಷಕರನ್ನು ನೇಮಿಸುವಂತೆ ಕೋರಲಾದ ರಿಟ್ ಅರ್ಜಿಯನ್ನು ಪರಿಗಣಿಸಲಾಗುವುದಿಲ್ಲ ಎಂದು ಏಕಸದಸ್ಯ ಪೀಠದ ನ್ಯಾಯಾಧೀಶರು ತೀರ್ಪು ನೀಡಿದ್ದರು. ಅಲ್ಲದೆ ಪೋಷಕರ ನೇಮಕಾತಿಯ ಆದೇಶಕ್ಕಾಗಿ ಸಿವಿಲ್ ನ್ಯಾಯಾಲಯವನ್ನು ಸಂಪರ್ಕಿಸುವಂತೆ ಅವರು ಅರ್ಜಿದಾರರಿಗೆ ಸೂಚಿಸಿದ್ದರು.
ರಿಟ್ ಅರ್ಜಿದಾರರು ಫೆಬ್ರವರಿ 13 ಮತ್ತು ಏಪ್ರಿಲ್ 4 ರ ನಡುವೆ ಖಾಸಗಿ ಆಸ್ಪತ್ರೆಯಲ್ಲಿ ಪತಿಯ ವೈದ್ಯಕೀಯ ವೆಚ್ಚಕ್ಕಾಗಿ ಈಗಾಗಲೇ ಲಕ್ಷಾಂತರ ರೂಪಾಯಿ ಖರ್ಚು ಮಾಡಿದ್ದನ್ನು ಪರಿಗಣಿಸಿದ ನ್ಯಾಯಮೂರ್ತಿ ಸ್ವಾಮಿನಾಥನ್ ನೇತೃತ್ವದ ಮದ್ರಾಸ್ ಹೈಕೋರ್ಟ್ನ ವಿಭಾಗೀಯ ಪೀಠವು ಏಕಸದಸ್ಯ ಪೀಠದ ಆದೇಶವನ್ನು ತಳ್ಳಿ ಹಾಕಿತು.
ಈಗ ಮನೆಯಲ್ಲಿಯೂ ಸಹ ಕೋಮಾದಲ್ಲಿರುವ ವ್ಯಕ್ತಿಯನ್ನು ನೋಡಿಕೊಳ್ಳಲು ದಾದಿಯರನ್ನು ನೇಮಿಸಿಕೊಳ್ಳಬೇಕಾಗುತ್ತದೆ ಎಂದು ನ್ಯಾಯಾಲಯ ಹೇಳಿತು. ಪ್ರೌಢವಯಸ್ಕರಾದ ಅರ್ಜಿದಾರರ ಮಗ ಮತ್ತು ಮಗಳನ್ನು ಕೂಡ ರಿಟ್ ಮೇಲ್ಮನವಿಯಲ್ಲಿ ಪಕ್ಷಗಾರರನ್ನಾಗಿ ಮಾಡಲಾಯಿತು. ಇಬ್ಬರೂ ಮಕ್ಕಳು ತಮ್ಮ ತಾಯಿಯನ್ನು ತಂದೆಯ ಪೋಷಕರನ್ನಾಗಿ ನೇಮಿಸಲು ಒಪ್ಪಿಗೆ ಸೂಚಿಸಿದರು.
ಏಕ ನ್ಯಾಯಾಧೀಶ ಪೀಠದ ಆದೇಶವನ್ನು ತಳ್ಳಿಹಾಕಿದ ನಂತರ, ವಿಭಾಗೀಯ ಪೀಠವು ಶಶಿಕಲಾ ಅವರನ್ನು ಅವರ ಪತಿಯ ಪೋಷಕರಾಗಿ ನೇಮಿಸಿತು ಮತ್ತು ಅವರ ಆಸ್ತಿಯನ್ನು ನಿರ್ವಹಣೆ ಮಾಡಲು ಅನುಮತಿ ನೀಡಿತು.
ಆಸ್ತಿ ಮಾರಾಟದಿಂದ ಸುಮಾರು 1 ಕೋಟಿ ರೂಪಾಯಿ ಬರುವ ಅಂದಾಜು ಮಾಡಿದ ನ್ಯಾಯಾಲಯ, ಈ ಹಣದಲ್ಲಿನ ಒಂದು ಭಾಗವನ್ನು ಶಿವಕುಮಾರ್ ಹೆಸರಿನಲ್ಲಿ ರಾಷ್ಟ್ರೀಕೃತ ಬ್ಯಾಂಕಿನಲ್ಲಿ 50 ಲಕ್ಷ ರೂ.ಗಳ ಎಫ್ಡಿ ಮಾಡುವಂತೆ ಮತ್ತು ತ್ರೈಮಾಸಿಕವಾಗಿ ಅದರ ಬಡ್ಡಿಯನ್ನು ಹಿಂಪಡೆಯಲು ಅರ್ಜಿದಾರರಿಗೆ ನಿರ್ದೇಶನ ನೀಡಿತು.
ಶಿವಕುಮಾರ್ ಅವರ ನಿಧನದ ನಂತರ ಎಫ್ಡಿಯನ್ನು ಅವರ ಕಾನೂನುಬದ್ಧ ವಾರಸುದಾರರಾದ ಪತ್ನಿ, ಮಗಳು ಮತ್ತು ಮಗನ ಹೆಸರಿನಲ್ಲಿ ಮೂರು ಸಮಾನ ಪಾಲುಗಳಾಗಿ ಹಂಚಿಕೊಳ್ಳಬೇಕೆಂದು ನ್ಯಾಯಾಲಯ ಹೇಳಿದೆ.
ಇದನ್ನೂ ಓದಿ : ಕಲಾಪದ ಅಕ್ರಮ ರೆಕಾರ್ಡಿಂಗ್ ಆರೋಪ: ಸಿಎಂ ಕೇಜ್ರಿವಾಲ್ ಪತ್ನಿಯ ವಿರುದ್ಧ ಹೈಕೋರ್ಟ್ಗೆ ದೂರು - Plea against Sunita Kejriwal
