ಕೊಚ್ಚಿ: ದೇವಾಲಯದ ಉತ್ಸವಗಳಲ್ಲಿ ಆನೆಗಳ ಬಳಕೆಯ ವಿಚಾರದಲ್ಲಿ ಕೇರಳ ಹೈಕೋರ್ಟ್ ನ ಮಾರ್ಗಸೂಚಿಗಳನ್ನು ಪಾಲಿಸಿದ್ದೇ ಆದಲ್ಲಿ ದೇವಾಲಯಗಳಲ್ಲಿನ ಉತ್ಸವಗಳನ್ನು ಈ ಹಿಂದಿನಂತೆ ಆಚರಿಸಿಕೊಂಡು ಹೋಗುವುದು ಸಾಧ್ಯವೇ ಇಲ್ಲ ಎಂದು ಕೇರಳ ಕಂದಾಯ ಸಚಿವ ಕೆ.ರಾಜನ್ ಶುಕ್ರವಾರ ಹೇಳಿದ್ದಾರೆ. ಸಂಪ್ರದಾಯದ ನೆಪದಲ್ಲಿ ರಾಜ್ಯದ ದೇವಾಲಯಗಳಲ್ಲಿ ಆನೆಗಳ ಬಳಕೆಗೆ ಕೇರಳ ಹೈಕೋರ್ಟ್ ಕೆಲ ಕಠಿಣ ಮಾರ್ಗಸೂಚಿಗಳನ್ನು ವಿಧಿಸಿದ ನಂತರ ಸಚಿವರು ಈ ಹೇಳಿಕೆ ನೀಡಿರುವುದು ಗಮನಾರ್ಹ.
ಕೇರಳದಲ್ಲಿ ಸೆರೆಹಿಡಿದ ಆನೆಗಳನ್ನು ದೇವಾಲಯಗಳು ಮತ್ತು ಉತ್ಸವಗಳಲ್ಲಿ ಪ್ರದರ್ಶಿಸುವ ಮೂಲಕ ಅವುಗಳ ಮೇಲೆ ಎಸಗಲಾಗುತ್ತಿರುವ ಕ್ರೌರ್ಯವನ್ನು ತಡೆಗಟ್ಟುವಂತೆ ಕೋರಿ ಸಲ್ಲಿಸಲಾಗಿದ್ದ ರಿಟ್ ಅರ್ಜಿಗಳ ವಿಚಾರಣೆ ನಡೆಸಿದ ಕೋರ್ಟ್, ದೇವಾಲಯಗಳ ಉತ್ಸವಗಳಲ್ಲಿ ಆನೆಗಳನ್ನು ಬಳಸಲು ಹೊಸ ಮಾರ್ಗಸೂಚಿಗಳನ್ನು ಜಾರಿಗೊಳಿಸಿ ಗುರುವಾರ ತಡರಾತ್ರಿ ತೀರ್ಪು ನೀಡಿದೆ.
"ಈ ಹೊಸ ಮಾರ್ಗಸೂಚಿಗಳನ್ನು ಜಾರಿಗೆ ತಂದರೆ ಈವರೆಗೆ ನಡೆಯುತ್ತಿದ್ದ ದೇವಾಲಯದ ಉತ್ಸವಗಳನ್ನು ಮುಂದುವರಿಸಿಕೊಂಡು ಹೋಗಲು ಸಾಧ್ಯವಾಗದು. ವಿವಿಧ ದೇವಾಲಯಗಳು ಇದೇ ಮಾತನ್ನು ಹೇಳಿದ್ದು, ಅದು ನಿಜ. ನ್ಯಾಯಾಲಯದ ಹೊಸ ಆದೇಶದ ವಿಚಾರದಲ್ಲಿ ರಾಜ್ಯ ಸರ್ಕಾರ ಮುಂದೇನು ಮಾಡಬಹುದು ಎಂಬುದನ್ನು ಪರಿಶೀಲಿಸಲಾಗುವುದು" ಎಂದು ತ್ರಿಶೂರ್ ಮೂಲದ ರಾಜನ್ ಹೇಳಿದರು.
ದೇವಾಲಯದ ಆಡಳಿತವನ್ನು ನಡೆಸುತ್ತಿರುವ ರಾಜ್ಯದ ವಿವಿಧ ದೇವಾಲಯಗಳ ದೇವಸ್ವಂಗಳಿಗೆ ಆಘಾತ ತಂದ ನ್ಯಾಯಾಲಯದ ತೀರ್ಪಿನ ಒಕ್ಕಣೆ ಹೀಗಿದೆ: "ಹಬ್ಬಗಳಲ್ಲಿ ಆನೆಗಳನ್ನು ಕಡ್ಡಾಯವಾಗಿ ಬಳಸಲೇಬೇಕೆಂದು ಯಾವುದೇ ಧರ್ಮದಲ್ಲಿ ಯಾವುದೇ ಅಗತ್ಯ ಧಾರ್ಮಿಕ ಆಚರಣೆ ಇದೆ ಎಂಬುದನ್ನು ನಾವು ಒಪ್ಪುವುದಿಲ್ಲ. ಬೇರೆ ರೀತಿಯಲ್ಲಿ ಹೇಳುವುದಾದರೆ, ಈ ವಿಷಯದಲ್ಲಿ ಪ್ರಾಣಿಯನ್ನು ವ್ಯಾಪಾರದ ಸರಕಾಗಿ ನೋಡಲಾಗುತ್ತಿದೆ. ಆನೆಯ ಮಾಲೀಕರು ಅಥವಾ ರಕ್ಷಕರು ಆನೆಯಿಂದ ತಮಗೆ ಬರಬಹುದಾದ ವಾಣಿಜ್ಯ ಆದಾಯದ ಬಗ್ಗೆ ಮಾತ್ರ ಕಾಳಜಿ ವಹಿಸುತ್ತಾರೆ. ವರದಿಗಳ ಪ್ರಕಾರ, ಕೇರಳದ ಉತ್ಸವಗಳು ಈಗ ಎಷ್ಟು ವಾಣಿಜ್ಯೀಕರಣಗೊಂಡಿವೆಯೆಂದರೆ, ಹಬ್ಬಕ್ಕೆ ಮುಂಚಿತವಾಗಿಯೇ, ಮೆರವಣಿಗೆ ಮಾಡುವ ಆನೆಗಳ ಸಂಖ್ಯೆ ಮತ್ತು ಮೆರವಣಿಗೆ ಮಾಡುವ ನಿರ್ದಿಷ್ಟ ಆನೆಗಳು / ಆನೆಗಳ ಖ್ಯಾತಿಯ ಬಗ್ಗೆ ಉತ್ಸವಗಳನ್ನು ನಡೆಸುವ ದೇವಾಲಯ ಸಮಿತಿಗಳ ನಡುವೆ ಪೈಪೋಟಿ ಅಥವಾ ಒಂದು ರೀತಿಯ ಸ್ಪರ್ಧೆ ಇದೆ."
2018-2024 ರ ನಡುವೆ, 160 ಸೆರೆಹಿಡಿದ ಆನೆಗಳು ಸಾವನ್ನಪ್ಪಿವೆ ಅಥವಾ ಬೇರೆ ರೀತಿಯಲ್ಲಿ ಹೇಳುವುದಾದರೆ, ಕೇರಳದಲ್ಲಿ, 2018-2024 ವರ್ಷಗಳಲ್ಲಿ, ದಾಖಲಾದ ಒಟ್ಟು ಸೆರೆಹಿಡಿದ ಆನೆಗಳ ಸಂಖ್ಯೆಯ ಸುಮಾರು 33 ಪ್ರತಿಶತದಷ್ಟು (2018 ರಲ್ಲಿ 509) ಈ ಅಲ್ಪಾವಧಿಯಲ್ಲಿ ಸಾವನ್ನಪ್ಪಿವೆ ಎಂದು ನ್ಯಾಯಾಲಯಕ್ಕೆ ತಿಳಿಸಲಾಯಿತು.
ಈ ಎಲ್ಲಾ ಅಂಶಗಳನ್ನು ಪರಿಗಣಿಸಿದ ನ್ಯಾಯಾಲಯವು, ಇನ್ನು ಮುಂದೆ, ಉತ್ಸವದ ಸಂಘಟಕರು ಉತ್ಸವಕ್ಕೆ ಕನಿಷ್ಠ ಒಂದು ತಿಂಗಳ ಮೊದಲು ಸಂಬಂಧಪಟ್ಟ ಅಧಿಕಾರಿಗಳಿಗೆ ಎಲ್ಲಾ ಸಂಬಂಧಿತ ವಿವರಗಳೊಂದಿಗೆ ಅರ್ಜಿಗಳನ್ನು ಸಲ್ಲಿಸಬೇಕು ಎಂದು ಆದೇಶ ಹೊರಡಿಸಿದೆ.
ಇದಲ್ಲದೆ, ಎರಡು ಉತ್ಸವಗಳಿಗೆ ನಡುವೆ ಮೂರು ದಿನಗಳಿಗೆ ಕಡಿಮೆ ಇಲ್ಲದಂತೆ ಆನೆಗಳಿಗೆ ವಿಶ್ರಾಂತಿ ಅವಧಿ ಸಿಗಬೇಕು ಎಂದು ನ್ಯಾಯಾಲಯವು ಸಂಬಂಧಪಟ್ಟ ಅಧಿಕಾರಿಗಳಿಗೆ ನಿರ್ದೇಶನ ನೀಡಿದೆ. ಇದಲ್ಲದೆ, ಪ್ರದರ್ಶಕರು ಆನೆಗಳಿಗೆ ಸಾಕಷ್ಟು ಆಹಾರ, ಕುಡಿಯುವ ನೀರಿನ ನಿರಂತರ ಪೂರೈಕೆ ಮತ್ತು ಶುದ್ಧ ಮತ್ತು ವಿಶಾಲವಾದ ತಾತ್ಕಾಲಿಕ ಟೆಥರಿಂಗ್ ಸೌಲಭ್ಯವನ್ನು ಒದಗಿಸುವುದನ್ನು ಖಚಿತಪಡಿಸಿಕೊಳ್ಳಬೇಕಿದೆ.
ಕಟ್ಟುನಿಟ್ಟಾಗಿ ಪಾಲಿಸಬೇಕಾದ ಹೊಸ ಷರತ್ತುಗಳಲ್ಲಿ ಆನೆಗಳನ್ನು ಬೆಳಿಗ್ಗೆ 9 ರಿಂದ ಸಂಜೆ 5 ರವರೆಗೆ ಸಾರ್ವಜನಿಕ ರಸ್ತೆಗಳಲ್ಲಿ ಮೆರವಣಿಗೆ ಮಾಡಬಾರದು ಮತ್ತು ರಾತ್ರಿ 10 ರಿಂದ ಬೆಳಿಗ್ಗೆ 4 ರವರೆಗೆ ಅವುಗಳನ್ನು ಸಾಗಿಸಬಾರದು ಮತ್ತು ಆನೆಗಳು ಸತತ 24 ಗಂಟೆಗಳ ಅವಧಿಯಲ್ಲಿ ಕನಿಷ್ಠ ಎಂಟು ಗಂಟೆಗಳ ವಿಶ್ರಾಂತಿ ಪಡೆಯಬೇಕು ಎಂದು ತಿಳಿಸಲಾಗಿದೆ.
ಈ ಮಾರ್ಗಸೂಚಿಗಳು ವಿಶ್ವಪ್ರಸಿದ್ಧ ತ್ರಿಶೂರ್ ಪೂರಂ ಉತ್ಸವದ ಮೇಲೆ ಹೆಚ್ಚು ಪರಿಣಾಮ ಬೀರಲಿದೆ ಎಂದು ತಿರುವಂಬಾಡಿ ದೇವಸ್ವಂ ಕಾರ್ಯದರ್ಶಿ ಕೆ.ಗಿರೀಶ್ ಕುಮಾರ್ ಹೇಳಿದರು.
"ನಮ್ಮ ಉತ್ಸವವು 36 ಗಂಟೆಗಳ ಕಾಲ ನಡೆಯುತ್ತದೆ ಮತ್ತು ಒಂದು ಸಮಯದಲ್ಲಿ ನಮಗೆ 150 ಆನೆಗಳು ಬೇಕಾಗುತ್ತವೆ. ಹೀಗಿರುವಾಗ ಹೊಸ ಮಾರ್ಗಸೂಚಿಗಳು ಜಾರಿಗೆ ಬಂದರೆ, ನಮ್ಮ ಪೂರಂನಲ್ಲಿ ಈ ಹಿಂದಿನಂತೆ ಆಚರಣೆಗಳನ್ನು ಮುಂದುವರಿಸಲು ಸಾಧ್ಯವಾಗದು. ನಾವು ಈ ಪ್ರಕರಣದಲ್ಲಿ ಮೇಲ್ಮನವಿ ಸಲ್ಲಿಸಲಿದ್ದೇವೆ" ಎಂದು ಕುಮಾರ್ ಹೇಳಿದರು.
ಇದನ್ನೂ ಓದಿ : ದೆಹಲಿಯಲ್ಲಿ ಉಸಿರಾಡುವುದೂ ಕಷ್ಟ! ಕಳಪೆ ವರ್ಗದಲ್ಲೇ ಮುಂದುವರೆದ ವಾಯು ಗುಣಮಟ್ಟ
