ನವದೆಹಲಿ: ಸಂಸತ್ತಿನಲ್ಲಿ ಅಪರಿಚಿತರು ನುಸುಳಿ ಭದ್ರತಾ ಲೋಪ ಉಂಟಾಗುವುದನ್ನು ತಡೆಯಲು ದೆಹಲಿ ಪೊಲೀಸರು ಹೊಸ ಪ್ಲಾನ್ ಮಾಡಿದ್ದಾರೆ. ಸಂಸತ್ ಭವನದ ಹೊರಗೆ ಭದ್ರತೆಗೆ ಇರುವ ಸಿಬ್ಬಂದಿಗೆ 'ವಿಶೇಷ ಡ್ಯೂಟಿ ಕಾರ್ಡ್'ಗಳನ್ನು ವಿತರಿಸಲಾಗಿದೆ. ಅದರಲ್ಲಿ ತುರ್ತು ಸಂದರ್ಭಗಳಲ್ಲಿ ಏನು ಮಾಡಬೇಕು ಎಂಬ ಬಗ್ಗೆ ವಿವರಿಸಲಾಗಿದೆ.
ಲೋಕಸಭೆ ಚುನಾವಣೆಗೂ ಮೊದಲು ನಡೆದ ಅಧಿವೇಶನದ ವೇಳೆ ಇಬ್ಬರು ಪ್ರತಿಭಟನಾಕಾರರು ಸಂಸತ್ನೊಳಕ್ಕೆ ನುಗ್ಗಿ ಕಲರ್ ಗ್ಯಾಸ್ ಸಿಡಿಸಿ, ಭಾರೀ ಆತಂಕ ಸೃಷ್ಟಿಸಿದ್ದರು. ಈ ಭದ್ರತಾ ಲೋಪ ದೆಹಲಿ ಪೊಲೀಸರ ಕಾರ್ಯನಿರ್ವಹಣೆಯ ಮೇಲೆ ಕಪ್ಪು ಮಸಿ ಬಳಿದಿತ್ತು. ಇದರಿಂದ ಎಚ್ಚೆತ್ತುಕೊಂಡಿರುವ ಇಲಾಖೆ, ಸಿಬ್ಬಂದಿಗೆ ಕರ್ತವ್ಯ ನಿರ್ವಹಣೆಯ ಮಾರ್ಗಸೂಚಿ ಕಾರ್ಡ್ ನೀಡಿದೆ.
ಕರ್ತವ್ಯ ನಿರ್ವಹಣೆಯ ಮಾರ್ಗಸೂಚಿಗಳು: ಸಂಸತ್ತಿನ ಸುತ್ತಲೂ ಭದ್ರತೆ ಕಾಪಾಡಲು ದೆಹಲಿ ಪೊಲೀಸರು ಸ್ಟ್ಯಾಂಡರ್ಡ್ ಆಪರೇಟಿಂಗ್ ಪ್ರೊಸೀಜರ್ (ಎಸ್‌ಒಪಿ) ಹೊರಡಿಸಿದ್ದಾರೆ. ಆಯಕಟ್ಟಿನ ಸ್ಥಳಗಳಿಂದ ಒಳನುಸುಳುವಿಕೆ, ಪ್ರತಿಭಟನೆಗಳು ಸೇರಿದಂತೆ ಯಾವುದೇ ಪರಿಸ್ಥಿತಿಯನ್ನು ಎದುರಿಸಲು ಸಿಬ್ಬಂದಿಯ ಪಾತ್ರಗಳನ್ನು ಡ್ಯೂಟಿ ಕಾರ್ಡ್ನಲ್ಲಿ ನಮೂದಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಸಂಸತ್ತಿನ ಸುತ್ತಲೂ ನಿಯೋಜಿಸಲಾದ ದೆಹಲಿ ಪೊಲೀಸ್ ಸಿಬ್ಬಂದಿ ಈ ವಿಶೇಷ ಡ್ಯೂಟಿ ಕಾರ್ಡ್ ಅನ್ನು ತಮ್ಮ ಕುತ್ತಿಗೆಗೆ ಧರಿಸುತ್ತಾರೆ. ಇಂಗ್ಲಿಷ್ ಮತ್ತು ಹಿಂದಿಯಲ್ಲಿ ಮಾರ್ಗಸೂಚಿಗಳನ್ನು ಬರೆಯಲಾಗಿದೆ. ಸಂಸತ್ ಆವರಣದಲ್ಲಿ ವಾಹನಗಳ ನುಗ್ಗುವಿಕೆ ಪ್ರಯತ್ನ, ಪ್ರತಿಭಟನೆಗಳು, ಸಭೆಗಳು ಅಥವಾ ಯಾವುದೇ ಅನುಮಾನಾಸ್ಪದ ಚಟುವಟಿಕೆಯಂತಹ ವಿವಿಧ ಸನ್ನಿವೇಶಗಳನ್ನು ಹೇಗೆ ಎದುರಿಸಬೇಕು ಎಂಬ ಬಗ್ಗೆ ವಿವರಿಸಲಾಗಿದೆ ಎಂದರು.
ಯಾವೆಲ್ಲಾ ತಂಡಗಳಿಗೆ ಕಾರ್ಡ್?: ಸಂಸತ್ ಭದ್ರತೆಗೆ ಇರುವ ಸ್ಟಾಟಿಕ್, ಮೂವಿಂಗ್, ರೂಫ್ಟಾಪ್, ಕ್ಯೂಆರ್ಟಿ, ಆ್ಯಂಟಿ ಸಬೋಟೆಗ್ ಚೆಕಿಂಗ್ ಪಾಯಿಂಟ್ ತಂಡಗಳಿಗೆ ಕಾರ್ಡ್ ನೀಡಲಾಗಿದೆ. ವಿವಿಧ ಸ್ಥಳಗಳಲ್ಲಿ ನಿಯೋಜಿಸಲಾದ ಆಯಾ ತಂಡವು ನಿರ್ವಹಿಸಬೇಕಾದ ಕರ್ತವ್ಯಗಳ ಬಗ್ಗೆ ನಿರ್ದೇಶನ ನೀಡುತ್ತವೆ ಎಂದು ಪೊಲೀಸ್ ಅಧಿಕಾರಿ ತಿಳಿಸಿದರು.
ನವದೆಹಲಿ ಡಿಸಿಪಿ ದೇವೇಶ್ ಕುಮಾರ್ ಮಹ್ಲಾ ಮಾತನಾಡಿ, "ಡ್ಯೂಟಿ ಕಾರ್ಡ್ಗಳನ್ನು ಕರ್ತವ್ಯದಲ್ಲಿರುವ ಸಿಬ್ಬಂದಿಗೆ ನೀಡಲಾಗಿದೆ. ಇದೇ ಮೊದಲ ಬಾರಿಗೆ ಇಂತಹ ಕ್ರಮ ವಹಿಸಲಾಗಿದೆ. ಪೊಲೀಸ್ ಕಮಿಷನರ್ ಸಂಜಯ್ ಅರೋರಾ ಅವರಿಂದ ಅನುಮೋದನೆ ಪಡೆದ ನಂತರ ಇವುಗಳನ್ನು ಬಳಸಲಾಗುತ್ತಿದೆ. ಆಯಾ ಸ್ಥಳಗಳ ಅಗತ್ಯತೆಗಳ ಆಧಾರದ ಮೇಲೆ ಮಾರ್ಗಸೂಚಿ ನಿಗದಿ ಮಾಡಲಾಗಿದೆ. ಸಿಬ್ಬಂದಿ ತಮ್ಮ ಕರ್ತವ್ಯದ ವೇಳೆ ಈ ಕಾರ್ಡ್ಗಳನ್ನು ಕೊಂಡೊಯ್ಯಬೇಕು" ಎಂದು ಹೇಳಿದರು.
ಹಳೆಯ ಮತ್ತು ಹೊಸ ಸಂಸತ್ತಿನ ಕಟ್ಟಡಗಳು ಮತ್ತು ಅವುಗಳಿಗೆ ಸಂಬಂಧಿಸಿದ ಕಟ್ಟಡಗಳನ್ನು ಹೊಂದಿರುವ ಸಂಕೀರ್ಣದ ಆಂತರಿಕ ಭದ್ರತೆಯನ್ನು ಕೇಂದ್ರೀಯ ಕೈಗಾರಿಕಾ ಭದ್ರತಾ ಪಡೆ (CISF) ನಿರ್ವಹಿಸುತ್ತದೆ. ಕಳೆದ ವರ್ಷ ನಡೆದ ಭದ್ರತಾ ಉಲ್ಲಂಘನೆಯ ಘಟನೆಯ ನಂತರ ಕೇಂದ್ರ ಮೀಸಲು ಪೊಲೀಸ್ ಪಡೆಯಿಂದ (ಸಿಆರ್‌ಪಿಎಫ್) ಭದ್ರತಾ ವ್ಯವಸ್ಥೆಯನ್ನು ಸಿಐಎಸ್‌ಎಫ್ಗೆ ನೀಡಲಾಗಿದೆ. ಅದಕ್ಕೂ ಮೊದಲು, ಸಿಆರ್‌ಪಿಎಫ್, ದೆಹಲಿ ಪೊಲೀಸರು (ಸುಮಾರು 150 ಸಿಬ್ಬಂದಿ) ಮತ್ತು ಸಂಸತ್ತಿನ ಭದ್ರತಾ ಸಿಬ್ಬಂದಿ (ಪಿಎಸ್‌ಎಸ್) ಜಂಟಿಯಾಗಿ ಸಂಸತ್ತಿಗೆ ಭದ್ರತೆ ಒದಗಿಸುತ್ತಿದ್ದರು.
ಇದನ್ನೂ ಓದಿ: ಹೊರಗೆ ಪೇಪರ್ ಸೋರಿಕೆ, ಸಂಸತ್ತಿನೊಳಗೆ ಮಳೆ ನೀರು ಸೋರಿಕೆ: ಕಾಂಗ್ರೆಸ್ ಟೀಕೆ - Water Leakage In Parliament
