ಪುಲ್ವಾಮಾ(ಜಮ್ಮು ಮತ್ತು ಕಾಶ್ಮೀರ): ಭಾಗಶಃ ರಸಗೊಬ್ಬರ ಮತ್ತು ಕೀಟನಾಶಕ ಔಷಧಿಗಳನ್ನೇ ನಂಬಿಕೊಂಡಿರುವ ಕೋಟ್ಯಂತರ ರೈತರ ನಡುವೆ ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾ ಜಿಲ್ಲೆಯ ಬಂಗುಂಡ್ ಎಂಬ ಕುಗ್ರಾಮ ಸಾವಯವ ಕೃಷಿಯಲ್ಲಿ ವಿಶೇಷ ಸಾಧನೆ ಮಾಡಿದೆ. ಈಗಾಗಲೇ ಕಣಿವೆಯಲ್ಲಿ ವಿವಿಧ ರೀತಿಯ ತರಕಾರಿಗಳನ್ನು ಬೆಳೆದ ಈ ಗ್ರಾಮವು ಕಾಶ್ಮೀರದ ಮೊದಲ 'ಸಾವಯವ ಗ್ರಾಮ'ವಾಗಿ ಗಮನ ಸೆಳೆದಿತ್ತು. ಇದೀಗ ಸಾವಯವ ಕೃಷಿ ಪದ್ಧತಿಯನ್ನು ಮತ್ತಷ್ಟು ವಿಸ್ತರಿಸಿಕೊಂಡು ತಾನು ಬೆಳೆದ ಬೆಳೆಗಳನ್ನು ಕೇವಲ ಕಣಿವೆ ನಾಡಿಗೆ ಮಾತ್ರವಲ್ಲದೇ, ಹೊರರಾಜ್ಯಗಳಿಗೂ ಸರಬರಾಜು ಮಾಡುವ ಶಕ್ತಿ ಕೇಂದ್ರವಾಗಿ ಹೊರಹೊಮ್ಮಿದೆ.
ಹಾಲು ಉತ್ಪಾದನೆಯಲ್ಲಿ ಮುಂಚೂಣಿಯಲ್ಲಿರುವ ಪುಲ್ವಾಮಾ ಜಿಲ್ಲೆ ಇದೀಗ ಹಣ್ಣು ಮತ್ತು ತರಕಾರಿಗಳ ಕೃಷಿಯಲ್ಲಿಯೂ ಒಂದು ಹೊಸ ಹೆಜ್ಜೆ ಇಟ್ಟಿದೆ. ಸಾಂಪ್ರದಾಯಿಕ ಕೃಷಿಯತ್ತ ಮುಖ ಮಾಡಿರುವ ಬಂಗುಂಡ್ ಗ್ರಾಮದಲ್ಲಿ ಯಾವುದೇ ರಸಗೊಬ್ಬರ ಮತ್ತು ಇತರ ರಾಸಾಯನಿಕಗಳ ಔಷಧಿ ಬಳಸದೇ ಹತ್ತು ಹಲವು ರೀತಿಯ ತರಕಾರಿಗಳನ್ನು ಬೆಳೆಯಲಾಗುತ್ತದೆ. ಸಮೃದ್ಧವಾಗಿ ಬೆಳೆದ ತರಕಾರಿಗಳನ್ನು ಕಣಿವೆ ಅಷ್ಟೇ ಅಲ್ಲದೇ ಕಣಿವೆಯ ಹೊರಗೂ ಮಾರಾಟ ಮಾಡಲಾಗುತ್ತದೆ. ಸಾವಯವ ಹಾಗೂ ಸಮಗ್ರ ಕೃಷಿಯಿಂದ ಆದಾಯವಷ್ಟೇ ಅಲ್ಲ ಆರೋಗ್ಯಕರ ಬದುಕೂ ಸಿಗಲಿದೆ ಎಂಬುದಕ್ಕೆ ಗ್ರಾಮ ಉತ್ತಮ ಉದಾಹರಣೆ.
"ಕಾಶ್ಮೀರದ ಮೊದಲ 'ಸಾವಯವ ಗ್ರಾಮ' ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಬಂಗುಂಡ್ ಗ್ರಾಮ ಸುಮಾರು 72 ಕುಟುಂಬಗಳನ್ನು ಹೊಂದಿದ್ದು 400 ಕನಲ್ ಭೂಮಿಯಲ್ಲಿ ತರಕಾರಿ ಬೆಳೆಯುತ್ತಿದೆ. 2018ರಿಂದ ಗ್ರಾಮದಲ್ಲಿ ಸಾವಯವ ಕೃಷಿಯಾಧಾರಿತ ಪದ್ಧತಿ ಅನುಸರಿಸಲಾಗುತ್ತಿದೆ. ತರಹೇವಾರು ತರಕಾರಿ ಬೆಳೆದು ಸಂತೃಪ್ತಿ ಜೀವನ ನಡೆಸಲಾಗುತ್ತದೆ" ಎನ್ನುತ್ತಾರೆ ಸ್ಥಳೀಯ ರೈತ ಬಶೀರ್ ಅಹಮದ್.
"ಕಣಿವೆ ಅಷ್ಟೇ ಅಲ್ಲದೇ ಹೊರಗಿನ ಜನರು ಕೂಡ ತರಕಾರಿಗಳನ್ನು ಖರೀದಿಸಲು ನಮ್ಮ ಬಳಿಗೆ ಬರುತ್ತಾರೆ. ಈ ಕೃಷಿ ನಮಗೆ ಸಾಕಷ್ಟು ಲಾಭ ತಂದು ಕೊಡುತ್ತಿದೆ. ಮಾರುಕಟ್ಟೆಗೆ ತರಕಾರಿಗಳನ್ನು ಸಾಗಿಸಲು ಸರ್ಕಾರ ವಾಹನ ಒದಗಿಸಿದಲ್ಲಿ ರೈತರಿಗೆ ತುಂಬಾ ಮತ್ತಷ್ಟು ಅನುಕೂಲವಾದೀತು. ಸಾವಯವ ಕೃಷಿಯಿಂದ ಸ್ಥಳೀಯರಲ್ಲಿ ಉದ್ಯೋಗಾವಕಾಶಗಳು ಕೂಡ ಹೆಚ್ಚಿವೆ. ಸರ್ಕಾರದಿಂದ ಇನ್ನೂ ಹೆಚ್ಚಿನ ಬೆಂಬಲ ದೊರೆತರೆ ಉತ್ಪಾದನೆಯಲ್ಲಿ ಇಳುವರಿ ಕಾಣಬಹುದು" ಎಂದು ರೈತ ಬಶೀರ್ ತಿಳಿಸಿದರು.
"ಆಧುನಿಕ ಕೃಷಿಯಿಂದ ನಮಗೆ ಯಾವುದೇ ಪ್ರಯೋಜನವಿಲ್ಲ. ಆದರೆ, ಆಧುನಿಕ ಮಿಶನರಿಗಳನ್ನು ಹೆಚ್ಚಿಸುವ ಕೆಲಸವಾಗಬೇಕು. ಇದರಿಂದ ಸಾವಯವ ಕೃಷಿಕರಿಗೆ ಹೆಚ್ಚು ಪ್ರಯೋಜನ. ಜನ ಹಳ್ಳಿಗಳತ್ತ ಅಷ್ಟಾಗಿ ಗಮನ ಹರಿಸದಿರುವುದು ನೋವಿನ ವಿಚಾರ. ಆದರೆ, ಕಾಶ್ಮೀರದಲ್ಲಿ ಸಾವಯವ ಕೃಷಿ ಗಂಭೀರ ಪ್ರಯತ್ನವಾಗಿ ಬೆಳೆಯುತ್ತಿದೆ" ಎಂದು ರೈತ ಮಹಿಳೆಯೊಬ್ಬರು ಹೇಳಿದರು.
ಕಾಶ್ಮೀರದಲ್ಲಿ ಸಾವಯವ ಕೃಷಿಯನ್ನು ಪ್ರೋತ್ಸಾಹಿಸುವ ಪ್ರಯತ್ನದಲ್ಲಿ ಜಮ್ಮು ಮತ್ತು ಕಾಶ್ಮೀರ ಸರ್ಕಾರವು ಬಂಗುಂಡ್ ಗ್ರಾಮವನ್ನು 2018ರಲ್ಲಿಯೇ ಕಾಶ್ಮೀರದ ಮೊದಲ ಸಾವಯವ ಕೃಷಿ ಗ್ರಾಮವೆಂದು ಘೋಷಿಸಿದೆ. ರಾಸಾಯನಿಕ ಗೊಬ್ಬರ ಬಳಕೆಯಿಂದ ಕೃಷಿ ಜಮೀನಷ್ಟೇ ಅಲ್ಲದೆ ಮನುಷ್ಯನ ಆರೋಗ್ಯವೂ ಹಾಳಾಗುತ್ತಿದೆ. ಅದರ ಬದಲು ಸಾವಯವ ಪದ್ಧತಿ ಅಳವಡಿಸಿಕೊಂಡರೆ ಮಣ್ಣಿನ ಫಲವತ್ತತೆ ಹೆಚ್ಚುವುದರ ಜತೆಗೆ ಸಾವಯವ ಪದ್ಧತಿಯಿಂದ ಬೆಳೆದ ಆಹಾರ ಪದಾರ್ಥಗಳ ಸೇವನೆ ಆರೋಗ್ಯವನ್ನು ವೃದ್ಧಿಸಲಿದೆ. ಇದನ್ನರಿತ ಈ ಗ್ರಾಮ ಆಗಿನಿಂದಲೂ ರಾಸಾಯನಿಕಗಳು ಮತ್ತು ಕೀಟನಾಶಕಗಳಿಲ್ಲದೆ ತರಕಾರಿ ಬೆಳೆಯುತ್ತದೆ.
ಇದನ್ನೂ ಓದಿ: ಕಿರುಧಾನ್ಯ ಬೆಳೆಯಲ್ಲಿ ಆವಿಷ್ಕಾರ: ವಿಲೇಜ್ ಇನ್ನೋವೇಶನ್ ಪ್ರಶಸ್ತಿಗೆ ಭಾಜನರಾದ ಯುವ ವಿಜ್ಞಾನಿ
