ಬದರೀನಾಥ್(ಉತ್ತರಾಖಂಡ್): ಭಗವಾನ್ ವಿಷ್ಣುವಿನ ಸನ್ನಿಧಿಯಾಗಿರುವ ಪವಿತ್ರ ಬದರೀನಾಥ ದೇವಾಲಯದ ಬಾಗಿಲುಗಳನ್ನು ಚಳಿಗಾಲದ ಋತುವಿಗಾಗಿ ಭಾನುವಾರ ರಾತ್ರಿ 9:07 ಕ್ಕೆ ಮುಚ್ಚಲಾಗುವುದು. ತೀರ್ಥಯಾತ್ರೆಯ ಋತುವಿನ ಅಂತ್ಯವನ್ನು ಸಾಂಪ್ರದಾಯಿಕ ಗ್ರಹಗಳ ಜೋಡಣೆಗಳ ಆಧಾರದ ಮೇಲೆ ವಿಜಯದಶಮಿಯಂದು ನಿರ್ಧರಿಸಲಾಯಿತು.
ಬದರಿ ವಿಶಾಲ್ ದೇವರ ಆಶೀರ್ವಾದ ಪಡೆಯಲು 10,000 ಕ್ಕೂ ಹೆಚ್ಚು ಭಕ್ತರು ಶನಿವಾರ ದೇವಾಲಯಕ್ಕೆ ಭೇಟಿ ನೀಡಿದ್ದಾರೆ. ಋತುವಿನ ಮುಕ್ತಾಯಯದ ಸೂಚಕವಾಗಿ ನೂರಾರು ಕಿಲೋ ತೂಕದ ಕಾಣಿಕೆಗಳನ್ನು ಸಮರ್ಪಿಸುವ ಮೂಲಕ ಮಹತ್ವದ ಆಚರಣೆಗಳನ್ನು ಕೈಗೊಳ್ಳಲಾಯಿತು.
ದೇವಸ್ಥಾನದ ಬಾಗಿಲು ಮುಚ್ಚುವ ಪ್ರಕ್ರಿಯೆಯ ಮೂರನೇ ದಿನವಾದ ನವೆಂಬರ್ 15 ರ ಶುಕ್ರವಾರ, ವೇದ ಪಠಣ ಎಂದು ಕರೆಯಲ್ಪಡುವ ವೈದಿಕ ಶ್ಲೋಕಗಳ ಪಠಣವನ್ನು ಸಮಾಪ್ತಿಗೊಳಿಸಲಾಯಿತು. ಇದು ದೇವಾಲಯವು ಚಳಿಗಾಲದ ಹಂತಕ್ಕೆ ಪ್ರವೇಶಿಸಿರುವುದನ್ನು ಸೂಚಿಸುತ್ತದೆ. ಈ ಸಾಂಕೇತಿಕ ಕ್ರಿಯೆಯು ವೇದ ಉಪನಿಷತ್ತುಗಳನ್ನು ದೇವಾಲಯದ ರಾವಲ್ (ಮುಖ್ಯ ಅರ್ಚಕ) ಮತ್ತು ಧರ್ಮಾಧಿಕಾರಿ (ಧಾರ್ಮಿಕ ಮುಖ್ಯಸ್ಥ) ಗೆ ಔಪಚಾರಿಕವಾಗಿ ಹಸ್ತಾಂತರಿಸಿದ ನಂತರ ನಡೆಯುತ್ತದೆ.
ನವೆಂಬರ್ 13 ರಂದು ಶ್ರೀ ಗಣೇಶ ದೇವಾಲಯದ ಬಾಗಿಲು ಮುಚ್ಚುವುದರೊಂದಿಗೆ ಒಂದು ವಾರ ಅವಧಿಯ ದೇವಾಲಯದ ದ್ವಾರ ಮುಚ್ಚುವ ಆಚರಣೆಗಳು ಪ್ರಾರಂಭವಾದವು. ಗಣೇಶ ದೇವಾಲಯದ ನಂತರ ಆದಿ ಕೇದಾರೇಶ್ವರ ಮತ್ತು ಆದಿ ಗುರು ಶಂಕರಾಚಾರ್ಯ ದೇವಾಲಯಗಳ ದ್ವಾರಗಳನ್ನು ಮುಚ್ಚಲಾಯಿತು. ಈ ಚಟುವಟಿಕೆಗಳು ದೀರ್ಘ ಚಳಿಗಾಲದ ಅವಧಿಗಾಗಿ ದೇವಾಲಯದ ಸಂಕೀರ್ಣವನ್ನು ಸಿದ್ಧಪಡಿಸುವ ಸಮಗ್ರ ಆಚರಣೆಯಾದ ಪಂಚ ಪೂಜೆಯ ಭಾಗವಾಗಿದೆ.
ಪಂಚ ಪೂಜೆಯ ಮಹತ್ವದ ಭಾಗವಾದ ಖತಗ್ ಪೂಜಾ ಆಚರಣೆ ಶುಕ್ರವಾರ ಪೂರ್ಣಗೊಂಡಿದೆ. ಇದರ ನಂತರ ದೇವಾಲಯದಲ್ಲಿ ಲಕ್ಷ್ಮಿ ದೇವಿಗೆ ಕಡಾಯಿ ಭೋಗ್ ಅರ್ಪಿಸಲಾಯಿತು, ಜೊತೆಗೆ ಭಗವಾನ್ ಬದರೀನಾಥ್ ಗರ್ಭಗುಡಿಗೆ ಸುರಕ್ಷಿತವಾಗಿ ಮರಳಲಿ ಎಂದು ಪ್ರಾರ್ಥನೆ ಸಲ್ಲಿಸಲಾಯಿತು. ದ್ವಾರಗಳ ಮುಚ್ಚುವಿಕೆ ಪ್ರಕ್ರಿಯೆಯು ಉತ್ತರಾಖಂಡದ ಚಾರ್ ಧಾಮ್ ದೇವಾಲಯಗಳಾದ ಗಂಗೋತ್ರಿ, ಯಮುನೋತ್ರಿ, ಕೇದಾರನಾಥ ಮತ್ತು ಬದರೀನಾಥ್ 2024 ರ ತೀರ್ಥಯಾತ್ರೆಯು ಅಂತ್ಯವಾಗಿರುವುದನ್ನು ಸೂಚಿಸುತ್ತದೆ.
ಗಂಗಾ ದೇವಿಗೆ ಸಮರ್ಪಿತವಾದ ಗಂಗೋತ್ರಿ ನವೆಂಬರ್ 2 ರಂದು ಮುಚ್ಚಲ್ಪಟ್ಟಿದೆ. ಯಮುನಾ ದೇವಿಯ ಆವಾಸ ಸ್ಥಾನವಾದ ಯಮುನೋತ್ರಿ ಮತ್ತು ಶಿವನಿಗೆ ಸಮರ್ಪಿತವಾದ ಕೇದಾರನಾಥ ನವೆಂಬರ್ 3 ರಂದು ಭಾಯಿ ದೂಜ್ ಸಂದರ್ಭದಲ್ಲಿ ಮುಚ್ಚಲ್ಪಟ್ಟವು. ಕೊರೆಯುವ ಚಳಿಗಾಲದ ತಿಂಗಳುಗಳಲ್ಲಿ ದೇವಾಲಯಗಳು ಮತ್ತು ಅವುಗಳ ಸುತ್ತಮುತ್ತಲಿನ ಪ್ರದೇಶಗಳನ್ನು ಸಂರಕ್ಷಿಸಲು ಈ ದೇವಾಲಯಗಳನ್ನು ಬಂದ್ ಮಾಡಲಾಗುತ್ತದೆ. ಏಪ್ರಿಲ್ ಅಥವಾ ಮೇ ತಿಂಗಳಲ್ಲಿ ದೇವಾಲಯಗಳು ಮತ್ತೆ ತೆರೆಯಲಿದ್ದು, 2025 ರ ತೀರ್ಥಯಾತ್ರೆಗೆ ಭಕ್ತರನ್ನು ಸ್ವಾಗತಿಸಲು ಸಿದ್ಧವಾಗುತ್ತವೆ.
ಇದನ್ನೂ ಓದಿ : ಭಾರತ ಮತ್ತಷ್ಟು ಭದ್ರ: ಮೊದಲ 'ಲಾಂಗ್ ರೇಂಜ್ ಹೈಪರ್‌ಸಾನಿಕ್ ಕ್ಷಿಪಣಿ' ಪರೀಕ್ಷೆ ಯಶಸ್ವಿ; ಇತಿಹಾಸ ಸೃಷ್ಟಿಸಿದ DRDO
