ಹೈದರಾಬಾದ್: ಸಿನಿಮಾ ಶೈಲಿಯಲ್ಲಿ ಕಳ್ಳನೊಬ್ಬ ಆಂಬ್ಯುಲೆನ್ಸ್ ಕದ್ದು ಪರಾರಿಯಾಗಿದ್ದ ಘಟನೆ ಹೈದರಾಬಾದ್ನ ಹಯತ್‌ ನಗರದಲ್ಲಿ ನಡೆದಿದೆ. ಕಳ್ಳ ಚಾಪೆ ಕೆಳಗೆ ನುಗ್ಗಿದರೆ ಪೊಲೀಸರು ರಂಗೋಲಿ ಕೆಳಗೆ ನುಗ್ಗಿ, ತಕ್ಷಣವೇ ಕಾರ್ಯಪ್ರವೃತ್ತರಾಗಿ ಆತನ ಹೆಡೆಮುರಿ ಕಟ್ಟುವಲ್ಲಿ ಯಶಸ್ವಿಯಾಗಿದ್ದಾರೆ.
ಕಳ್ಳನ ಪರಾರಿಯಾದ ಮತ್ತು ಆತನ ಸೆರೆಗೆ ಪೊಲೀಸರು ನಡೆಸಿದ ಚೇಸಿಂಗ್ ಚಲನಚಿತ್ರ ದೃಶ್ಯವನ್ನು ಮೀರಿಸುವಂತಿತ್ತು. ಹೈದರಾಬಾದ್ನಿಂದ ಸೂರ್ಯಪೇಟೆಯವರೆಗೆ 100ಕ್ಕೂ ಹೆಚ್ಚು ಕಿಲೋ ಮೀಟರ್ವರೆಗೆ ಪೊಲೀಸರು ಆಂಬ್ಯುಲೆನ್ಸ್ಅನ್ನು ಬೆನ್ನತ್ತಿ ಹಿಡಿದಿದ್ದಾರೆ.
ಪೊಲೀಸರು ಬೆನ್ನು ಹತ್ತಿರುವುದನ್ನು ತಿಳಿದು ಸೈರನ್ ಮೊಳಗಿಸುತ್ತ ವೇಗವಾಗಿ ಓಡಿಸುವ ಭರದಲ್ಲಿ ಕಳ್ಳ ಓರ್ವ ವ್ಯಕ್ತಿಗೆ ಆಂಬ್ಯುಲೆನ್ಸ್ ಡಿಕ್ಕಿ ಹೊಡೆದಿದ್ದು, ಅವರು ತೀವ್ರವಾಗಿ ಗಾಯಗೊಂಡ ಘಟನೆಯೂ ನಡೆದಿದೆ. ಆದರೂ ನಿಲ್ಲಿಸಿದೇ ಏಕಾಏಕಿ ವಿಜಯವಾಡ ರಸ್ತೆಗೆ ಆಂಬ್ಯುಲೆನ್ಸ್ಅನ್ನು ಕಳ್ಳ ಒಯ್ದಿದ್ದಾನೆ.
ಟೋಲ್‌ಗೇಟ್ವೊಂದರಲ್ಲಿ ನುಗ್ಗಿ, ಅಲ್ಲಿನ ಗೇಟ್‌ಗೆ ಡಿಕ್ಕಿ ಹೊಡೆದು ಮುಂದೆ ಸಾಗಿದ್ದನು. ಕಳ್ಳನ ಮುಂದಿನ ನಡೆಯನ್ನು ಊಹಿಸಿದ್ದ ಪೊಲೀಸರು, ಮಾಹಿತಿ ರವಾನಿಸಿ ಸೂರ್ಯಪೇಟೆ ಬಳಿ ಲಾರಿಗಳನ್ನು ರಸ್ತೆಗೆ ಅಡ್ಡಲಾಗಿ ಇರಿಸಿ ಸುತ್ತುವರೆದು ಆತನನ್ನು ಸೆರೆಹಿಡಿದರು.
ಆಂಬ್ಯುಲೆನ್ಸ್ ಕದ್ದಿದ್ದ ಈತ, ಈ ಹಿಂದೆ ಹಲವು ಕಳ್ಳತನ ಪ್ರಕರಣಗಳಲ್ಲಿ ಭಾಗಿಯಾಗಿದ್ದನೆಂದು ತಿಳಿದುಬಂದಿದೆ. ಆಂಬ್ಯುಲೆನ್ಸ್ ಡಿಕ್ಕಿಯಿಂದ ಗಾಯಗೊಂಡಿದ್ದ ವ್ಯಕ್ತಿಯ ಸ್ಥಿತಿ ಗಂಭೀರವಾಗಿದ್ದು, ಹೈದರಾಬಾದ್ನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಇದನ್ನೂ ಓದಿ:ಕುವೈತ್ ಬ್ಯಾಂಕ್ಗೆ 700 ಕೋಟಿ ರೂ. ವಂಚನೆ; ಸಾಲ ಪಡೆದು ದೇಶ ತೊರೆದ 1,425 ಕೇರಳಿಗರು!
