ಹೈದರಾಬಾದ್: ಕಾರಿನೊಳಗಡೆ ಕಾಲಿನಡಿ ಬಿಸಾಡಲಾದ ನೀರಿನ ಬಾಟಲಿಗಳಿಂದ ಅದೇನು ಆಗುತ್ತೆ ಎಂದು ಅಸಡ್ಡೆ ಮಾಡಬೇಡಿ, ಅದೇನೂ ಮಾಡೀತು ಅಂತಾ ಭಾವಿಸಿದರೆ ಅದು ತಪ್ಪಾದೀತು ಜೋಕೆ! ಅವು ನಿಮ್ಮ ಪ್ರಾಣಕ್ಕೂ ಕುತ್ತು ತರಬಲ್ಲವು ಎಂಬುದು ಗೊತ್ತಿರಲಿ. ಅದು ಹೇಗೆಂದು ನೋಡೋಣ ಬನ್ನಿ.
ಆಸನಗಳ ಕೆಳಗೆ ಅಥವಾ ನೆಲದ ಮೇಲೆ ಸಡಿಲವಾಗಿ ಬಿಟ್ಟಾಗ ಬಾಟಲಿಗಳು ಪೆಡಲ್ ಗಳ ಕೆಳಗೆ ಉರುಳಿ ಬರಬಹುದು. ಒಂದೊಮ್ಮೆ ಹೀಗಾದಲ್ಲಿ ಆ ಬಾಟಲಿ ಆಕ್ಸಿಲರೇಟರ್, ಬ್ರೇಕ್ ಅಥವಾ ಕ್ಲಚ್ ಪೆಡಲ್ ಗಳ ಕಾರ್ಯನಿರ್ವಹಣೆಗೆ ಅಡ್ಡಿಯಾಗಬಹುದು. ಇದರಿಂದ ಚಾಲಕ ಡ್ರೈವಿಂಗ್ ಮೇಲೆ ನಿಯಂತ್ರಣ ಕಳೆದುಕೊಳ್ಳಬಹುದು ಮತ್ತು ಮಾರಣಾಂತಿಕ ಅಪಘಾತವೂ ಸಂಭವಿಸಬಹುದು.
ಅಖಿಲ ಭಾರತ ಮೋಟಾರು ಸಾರಿಗೆ ಕಾಂಗ್ರೆಸ್ ಹೇಳುವುದಿಷ್ಟು: ಈ ಬಗ್ಗೆ ಮಾಹಿತಿ ನೀಡಿದ ಅಖಿಲ ಭಾರತ ಮೋಟಾರು ಸಾರಿಗೆ ಕಾಂಗ್ರೆಸ್ ನ ಪ್ರಧಾನ ಕಾರ್ಯದರ್ಶಿ ನವೀನ್ ಗುಪ್ತಾ, "ನಾವು ಎಲ್ಲಾ ಸುರಕ್ಷತಾ ಕ್ರಮಗಳನ್ನು ಪರಿಶೀಲಿಸಬೇಕು ಮತ್ತು ಚಾಲನೆಯ ಸಮಯದಲ್ಲಿ ಅಡೆತಡೆಗಳನ್ನು ಉಂಟುಮಾಡುವ ವಸ್ತುಗಳನ್ನು ತೆರವುಗೊಳಿಸಬೇಕು. ವಿಶೇಷವಾಗಿ ಚಾಲಕನ ಆಸನದ ಬಳಿಯ ಖಾಲಿ ಬಾಟಲಿಗಳು ಮತ್ತು ಬಟ್ಟೆಗಳನ್ನು ತೆರವುಗೊಳಿಸಬೇಕು" ಎಂದು ಹೇಳಿದರು.
ಬ್ರೇಕ್ ಕೆಳಗೆ ವಾಟರ್ ಬಾಟಲ್ ಸಿಲುಕಿ ಇತ್ತೀಚೆಗೆ ಸಂಭವಿಸಿತ್ತು ಭಾರಿ ಅಪಘಾತ: ಉತ್ತರಾಖಂಡದ ಡೆಹ್ರಾಡೂನ್ ನಲ್ಲಿ ನವೆಂಬರ್ 12 ರಂದು ಟೊಯೊಟಾ ಇನ್ನೋವಾ ಕಾರು ಅಪಘಾತಕ್ಕೀಡಾಗಿ ಆರು ಯುವಕರು ಪ್ರಾಣ ಕಳೆದುಕೊಂಡ ನಂತರ ಪ್ರಯಾಣಿಕರ ಜೀವಕ್ಕೆ ಅಪಾಯವನ್ನುಂಟುಮಾಡುವ ಬಾಟಲಿ ಸೇರಿದಂತೆ ಇಂಥ ಸಡಿಲವಾಗಿ ಚಲಿಸುವ ವಸ್ತುಗಳ ಬಗೆಗಿನ ಚರ್ಚೆ ಮುನ್ನೆಲೆಗೆ ಬಂದಿದೆ.
ಸಾಮಾನ್ಯವಾಗಿ ಇದನ್ನು ಡೆಹ್ರಾಡೂನ್ ಇನ್ನೋವಾ ಅಪಘಾತ ಎಂದು ಕರೆಯಲಾಗುತ್ತಿದೆ. ಕಾರಿನಲ್ಲಿ ಬಿಸಾಡಿದ್ದ ನೀರಿನ ಬಾಟಲ್ವೊಂದು ಬ್ರೇಕ್ ಪೆಡಲ್ ಅಡಿಯಲ್ಲಿ ಸಿಲುಕಿದ್ದು, ಇದರಿಂದ ಅಕ್ಸಿಲರೇಟರ್ ಫೇಲ್ ಆಗಿ ಅಪಘಾತ ಸಂಭವಿಸಿರಬಹುದು ಎಂದು ಪೊಲೀಸ್ ತನಿಖೆಯಲ್ಲಿ ತಿಳಿದು ಬಂದಿದೆ. ಟೊಯೊಟಾ ಇಂಡಿಯಾದ ತಂಡವು ನಡೆಸಿದ ತಾಂತ್ರಿಕ ತನಿಖೆಯನ್ನು ಪೊಲೀಸರು ಉಲ್ಲೇಖಿಸಿದ್ದಾರೆ. ಅತಿಯಾದ ವೇಗ ಮತ್ತು ಅದರ ಪರಿಣಾಮವಾಗಿ ಅಪಘಾತಕ್ಕೆ ಕಾರಣವಾದ ಸಂದರ್ಭಗಳನ್ನು ಟೊಯೊಟಾ ಇಂಡಿಯಾ ತಂಡ ಬಹಿರಂಗಪಡಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಅಪಘಾತದ ಬಗ್ಗೆ ಶಾಕಿಂಗ್ ವಿಷಯ ತಿಳಿಸಿದ ಪೊಲೀಸರು: ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿದ ಡೆಹ್ರಾಡೂನ್ ನ ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ (ಎಸ್ಎಸ್ ಪಿ) ಅಜಯ್ ಸಿಂಗ್, ನೀರಿನ ಬಾಟಲಿ ಸಿಲುಕಿ ಬ್ರೇಕಿಂಗ್ ಫೇಲ್ ಆಗಿರಬಹುದು ಮತ್ತು ಇದು ಮಾರಣಾಂತಿಕ ಅಪಘಾತಕ್ಕೆ ಕಾರಣವಾಗಿರಬಹುದು ಎಂದು ಹೇಳಿದರು.
ಕಾರಿನಲ್ಲಿ ಬಾಟಲಿಗಳ ಅಪಾಯ: ದೀರ್ಘ ಪ್ರಯಾಣದ ಸಮಯದಲ್ಲಿ ಕುಡಿಯುವ ನೀರಿನ ಅಗತ್ಯತೆಗಾಗಿ ನೀರಿನ ಬಾಟಲಿಯನ್ನು ಇಟ್ಟುಕೊಳ್ಳುವುದು ಅತ್ಯಗತ್ಯ. ಆದಾಗ್ಯೂ, ಬಾಟಲಿಗಳನ್ನು ಕಾರಿನಲ್ಲಿ ಎಲ್ಲೆಂದರಲ್ಲಿ ಬಿಸಾಕಿದರೆ ಗಂಭೀರ ಅಪಾಯ ಎದುರಾಗುವುದು ಖಂಡಿತ. ಈ ಅಪಾಯದ ಬಗ್ಗೆ ನೀವು ತಿಳಿದುಕೊಳ್ಳಬೇಕಾದ ಮಾಹಿತಿ ಇಲ್ಲಿದೆ. ಇಂಥ ಅಪಘಾತ ತಡೆಗಟ್ಟುವುದು ಹೇಗೆ ಮತ್ತು ಅಂಥ ಅಪಾಯ ಎದುರಾದರೆ ಏನು ಮಾಡಬೇಕು ಎಂಬುದನ್ನು ತಿಳಿಯೋಣ.
ಬಾಟಲಿಯು ಅಪಘಾತಕ್ಕೆ ಹೇಗೆ ಕಾರಣವಾಗಬಹುದು: ಅಸುರಕ್ಷಿತ ನೀರಿನ ಬಾಟಲಿಯು ಕಾರಿನ ಫುಟ್ ಬೋರ್ಡ್ ಮೇಲೆ ಸುಲಭವಾಗಿ ಉರುಳಬಹುದು. ಅದು ಆಕ್ಸಿಲರೇಟರ್ ಅಥವಾ ಬ್ರೇಕ್ ಪೆಡಲ್ ಅಡಿಯಲ್ಲಿ ಸಿಲುಕಿಕೊಂಡರೆ, ಚಾಲಕ ವಾಹನದ ನಿಯಂತ್ರಣವನ್ನು ಕಳೆದುಕೊಳ್ಳಬಹುದು.
ನಿಯಂತ್ರಣದ ನಷ್ಟ: ಬ್ರೇಕ್ ಪೆಡಲ್ ಅಡಿ ಬಾಟಲಿ ಸಿಲುಕಿದರೆ ಪೆಡಲ್ ಅನ್ನು ಸಂಪೂರ್ಣವಾಗಿ ಒತ್ತಲು ಸಾಧ್ಯವಾಗದಿರಬಹುದು. ಇದರಿಂದ ಪಡೆಲ್ ನಿಷ್ಕ್ರಿಯವಾಗಬಹುದು.
ನಿಯಂತ್ರಣದಲ್ಲಿ ವಿಳಂಬ: ಬಾಟಲಿ ಪೆಡಲ್ ಸಿಲುಕಿದಾಗ ಅದನ್ನು ತೆಗೆಯಲು ಪ್ರಯತ್ನಿಸಿದಾಗ ಅಥವಾ ಅದನ್ನು ಮುರಿಯಲು ಪ್ರಯತ್ನಿಸಿದಾಗ ಚಾಲನೆಯ ಮೇಲೆ ನಿಯಂತ್ರಣ ಕಳೆದುಕೊಳ್ಳಲು ಕಾರಣವಾಗಬಹುದು. ಅಪಘಾತ ತಡೆಯಲು ಪ್ರತಿಯೊಂದು ಮಿಲಿಸೆಕೆಂಡ್ ಕೂಡ ಲೆಕ್ಕಕ್ಕೆ ಬರುತ್ತದೆ.
ಈಟಿವಿ ಭಾರತ್ ಜೊತೆ ಮಾತನಾಡಿದ ಸಾರಿಗೆ ವ್ಯವಹಾರದ ಮಾಲೀಕ ಗುಂಜೀತ್ ಸಿಂಗ್ ಸಂಘಾ, "ಚಾಲನೆಯ ಸಮಯದಲ್ಲಿ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು, ಚಾಲಕರು ಎಲ್ಲಾ ವಿಷಯಗಳ ಬಗ್ಗೆ ಜಾಗರೂಕರಾಗಿರಬೇಕು ಮತ್ತು ಬ್ರೇಕ್, ಕ್ಲಚ್ ಅಥವಾ ರೇಸ್ ಲಿವರ್ ಬಳಸಲು ಯಾವುದೇ ಅಡೆತಡೆಗಳನ್ನು ಉಂಟುಮಾಡುವ ಡ್ರೈವಿಂಗ್ ಸೀಟ್ ಬಳಿ ಸಡಿಲವಾದ ವಸ್ತುಗಳನ್ನು ಎಂದಿಗೂ ಇಡಬಾರದು" ಎಂದು ಹೇಳಿದರು.
ನಿಜ ಜೀವನದ ಉದಾಹರಣೆಗಳು: 2024 ರಲ್ಲಿ ಡೆಹ್ರಾಡೂನ್ ಇನ್ನೋವಾ ಅಪಘಾತ: ಇತ್ತೀಚೆಗೆ, ನವೆಂಬರ್ 12 ರಂದು ಮುಂಜಾನೆ 2 ಗಂಟೆ ಸುಮಾರಿಗೆ ಡೆಹ್ರಾಡೂನ್ ನ ಥಾನಾ ಕಂಟೋನ್ಮೆಂಟ್ ಪ್ರದೇಶದಲ್ಲಿ ಒಎನ್ಜಿಸಿ ಜಂಕ್ಷನ್ ಬಳಿ ಟೊಯೊಟಾ ಇನ್ನೋವಾ ಟ್ರಕ್ ಗೆ ಡಿಕ್ಕಿ ಹೊಡೆದ ಪರಿಣಾಮ ಸಂಭವಿಸಿದ ಅಪಘಾತದಲ್ಲಿ ಆರು ಯುವಕರು ಸಾವನ್ನಪ್ಪಿದ್ದಾರೆ ಮತ್ತು ಒಬ್ಬರು ಗಂಭೀರವಾಗಿ ಗಾಯಗೊಂಡಿದ್ದಾರೆ. ಮೃತರು 19 ರಿಂದ 25 ವರ್ಷ ವಯಸ್ಸಿನವರಾಗಿದ್ದಾರೆ.
ತೀವ್ರವಾಗಿ ಹಾನಿಗೊಳಗಾದ ವಾಹನದಿಂದ ಪೊಲೀಸರು ಸಂತ್ರಸ್ತರನ್ನು ಹೊರತೆಗೆದು ಆಸ್ಪತ್ರೆಗೆ ಸಾಗಿಸಿದರು. ಆಸ್ಪತ್ರೆಯಲ್ಲಿ ಆರು ಜನ ಅಸು ನೀಗಿದರು. ಇನ್ನೋವಾ ಕಾರು ಛಿದ್ರವಾಗಿದ್ದು, ಸಂತ್ರಸ್ತರನ್ನು ಹೊರತೆಗೆಯಲು ಕಾರನ್ನು ಕತ್ತರಿಸಬೇಕಾಯಿತು.
2022ರ ಮಂಗಳೂರು ಅಪಘಾತ: 2022 ರಲ್ಲಿ ಕರ್ನಾಟಕದ ಮಂಗಳೂರಿನಲ್ಲಿ ಸಂಭವಿಸಿದ ಅಪಘಾತದಲ್ಲಿ, ಕಾರಿನ ಬ್ರೇಕ್ ಪೆಡಲ್ ಕೆಳಗೆ ಸಿಲುಕಿದ್ದ ನೀರಿನ ಬಾಟಲಿ ಸರಣಿ ಡಿಕ್ಕಿಗಳಿಗೆ ಕಾರಣವಾಯಿತು. 63 ವರ್ಷದ ಚಾಲಕ ವಿವೇಕಾನಂದ ಶೆಣೈ ಇಳಿಜಾರಿನಲ್ಲಿ ಇಳಿಯುವಾಗ ನಿಯಂತ್ರಣ ಕಳೆದುಕೊಂಡ ಪರಿಣಾಮ ಕಾರು ದ್ವಿಚಕ್ರ ವಾಹನ, ನಿಲ್ಲಿಸಿದ್ದ ಎರಡು ಕಾರುಗಳು ಮತ್ತು ಅಂತಿಮವಾಗಿ ಗೋಡೆಗೆ ಡಿಕ್ಕಿ ಹೊಡೆದಿದೆ. ದ್ವಿಚಕ್ರ ವಾಹನ ಸವಾರರು ನೆಲಕ್ಕೆ ಎಸೆಯಲ್ಪಟ್ಟರು, ಆದರೆ ಸಣ್ಣಪುಟ್ಟ ಗಾಯಗಳೊಂದಿಗೆ ಪಾರಾಗಿದ್ದಾರೆ. ಈ ಘಟನೆಯಿಂದ ವಾಹನಕ್ಕೆ ಗಮನಾರ್ಹ ಹಾನಿಯಾಗಿತ್ತು. ಈ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ವೈರಲ್ ಆಗಿದೆ.
ಪೆಡಲ್ ಗಳ ಕೆಳಗೆ ಬಾಟಲಿಗಳು ಉರುಳದಂತೆ ತಡೆಯುವುದು ಹೇಗೆ?:
ನಿಮ್ಮ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಕೆಲವು ಪ್ರಾಯೋಗಿಕ ಸಲಹೆಗಳು ಇಲ್ಲಿವೆ
- ನಿಮ್ಮ ಬಾಟಲಿಗಳನ್ನು ಸುರಕ್ಷಿತವಾಗಿರಿಸಿ
- ಅಂತರ್ ನಿರ್ಮಿತ ಕಪ್ ಹೋಲ್ಡರ್ ಗಳಲ್ಲಿ ಅಥವಾ ಸಣ್ಣ ವಸ್ತುಗಳಿಗಾಗಿ ನಿರ್ದಿಷ್ಟವಾಗಿ ವಿನ್ಯಾಸಗೊಳಿಸಲಾದ ಕಾರ್ ಕಂಪಾರ್ಟ್ ಮೆಂಟ್ ಗಳಲ್ಲಿ ಬಾಟಲಿಗಳನ್ನು ಇಡಿ.
- ಡ್ರೈವರ್ ಅಥವಾ ಪ್ರಯಾಣಿಕರ ಸೀಟಿನ ಕೆಳಗೆ ಬಾಟಲಿಗಳನ್ನು ಇಡುವುದನ್ನು ತಪ್ಪಿಸಿ.
ನಿಮ್ಮ ವಾಹನವನ್ನು ಪರಿಶೀಲಿಸಿ
1. ಫ್ಲೋರ್ ಮ್ಯಾಟ್ ಗಳನ್ನು ಪರಿಶೀಲಿಸಿ:
- ಚಾಪೆಗಳು ಸಡಿಲವಾಗಿಲ್ಲ ಅಥವಾ ಪೆಡಲ್ ಗಳ ಕೆಳಗೆ ಬಿರುಕುಗಳಿಲ್ಲ ಎಂದು ಖಚಿತಪಡಿಸಿಕೊಳ್ಳಿ.
2. ಅನಿಯಂತ್ರಿತ ವಸ್ತುಗಳನ್ನು ತಪ್ಪಿಸಿ:
- ಕಾರಿನ ಡ್ಯಾಶ್ ಬೋರ್ಡ್ ಅಥವಾ ಫುಟ್ ಬೋರ್ಡ್ ಪ್ರದೇಶದಿಂದ ಯಾವುದೇ ಸಡಿಲ ವಸ್ತುಗಳನ್ನು ತೆಗೆದುಹಾಕಿ.
- ಲಗೇಜ್ ಗಾಗಿ ಸುರಕ್ಷತಾ ಪಟ್ಟಿಗಳನ್ನು ಬಳಸಿ
- ನೀವು ಚೀಲಗಳು, ದಿನಸಿ ಅಥವಾ ಇತರ ವಸ್ತುಗಳನ್ನು ಸಾಗಿಸುತ್ತಿದ್ದರೆ, ತೀಕ್ಷ್ಣವಾದ ತಿರುವುಗಳಲ್ಲಿ ಅವು ಹೊರಳಾಡುವುದನ್ನು ತಪ್ಪಿಸಲು ಅವುಗಳನ್ನು ಸ್ಟ್ರಾಪ್ ಗಳಿಂದ ಸುರಕ್ಷಿತವಾಗಿ ಕಟ್ಟಿ.
ಬ್ರೇಕ್ ಪೆಡಲ್ ಅಡಿ ಬಾಟಲಿ ಸಿಲುಕಿಕೊಂಡರೆ ಏನು ಮಾಡಬೇಕು?
- ಡ್ರೈವಿಂಗ್ ಮಾಡುವಾಗ ಬ್ರೇಕ್ ಪೆಡಲ್ ಅಡಿಯಲ್ಲಿ ಯಾವುದಾದರೂ ವಸ್ತು ಸಿಲುಕಿಕೊಂಡರೆ, ಈ ಹಂತಗಳನ್ನು ಅನುಸರಿಸಿ:
- ಶಾಂತವಾಗಿರಿ: ವಾಹನದ ನಿಯಂತ್ರಣವನ್ನು ಕಾಪಾಡಿಕೊಳ್ಳಲು ಭಯಭೀತರಾಗುವುದನ್ನು ತಪ್ಪಿಸಿ.
- ಗೇರ್ ಅನ್ನು ನ್ಯೂಟ್ರಲ್ಗೆ ಬದಲಿಸಿ: ಈ ಕ್ರಿಯೆಯು ವೇಗೋತ್ಕರ್ಷವನ್ನು ನಿಲ್ಲಿಸುತ್ತದೆ ಮತ್ತು ವೇಗವನ್ನು ಕಡಿಮೆ ಮಾಡುತ್ತದೆ.
- ಕ್ರಮೇಣ ಸೈಡ್ ಗೆ ಬನ್ನಿ: ವಾಹನವನ್ನು ಸುರಕ್ಷಿತವಾಗಿ ರಸ್ತೆಯ ಬದಿಗೆ ಸರಿಸಿ ಮತ್ತು ನಿಲ್ಲಿಸಿ.
- ಆಬ್ಜೆಕ್ಟ್ ತೆಗೆದುಹಾಕಿ: ಒಮ್ಮೆ ಪಾರ್ಕ್ ಮಾಡಿದ ನಂತರ, ಬಾಟಲಿ ಅಥವಾ ವಸ್ತುವನ್ನು ಸುರಕ್ಷಿತವಾಗಿ ತೆಗೆದು ಹಾಕಿ.
ಮುಖ್ಯ ವಿಚಾರ: ಡ್ರೈವಿಂಗ್ ಮಾಡುವಾಗ ಬಾಟಲಿಯನ್ನು ಒಡೆಯಲು ಎಂದಿಗೂ ಪ್ರಯತ್ನಿಸಬೇಡಿ. ಹಾಗೆ ಮಾಡುವುದು ಸಮಯ ತೆಗೆದುಕೊಳ್ಳುತ್ತದೆ, ಪ್ರತಿಕ್ರಿಯೆಯ ಸಮಯವನ್ನು ಕಡಿಮೆ ಮಾಡುತ್ತದೆ ಮತ್ತು ಇದು ಅಪಘಾತಕ್ಕೆ ಕಾರಣವಾಗಬಹುದು.
ಸುರಕ್ಷಿತ ಚಾಲನೆಗಾಗಿ ಹೆಚ್ಚುವರಿ ಸಲಹೆಗಳು
- ವಿವಿಧ ವಸ್ತುಗಳನ್ನು ಸಂಗ್ರಹಿಸುವ ಬದಲು ಕಪ್ ಹೋಲ್ಡರ್ ಗಳಂತಹ ಎಲ್ಲಾ ವಾಹನ ವೈಶಿಷ್ಟ್ಯಗಳನ್ನು ಅವುಗಳ ಉದ್ದೇಶಿತ ಉದ್ದೇಶಕ್ಕಾಗಿ ಬಳಸಿ.
- ಯಾವುದೇ ಸಂಭಾವ್ಯ ಅಪಾಯಗಳಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ನಿಮ್ಮ ವಾಹನವನ್ನು ನಿಯಮಿತವಾಗಿ ಪರಿಶೀಲಿಸಿ.
- ಅಸುರಕ್ಷಿತ ವಸ್ತುಗಳ ಅಪಾಯಗಳ ಬಗ್ಗೆ ಪ್ರಯಾಣಿಕರಿಗೆ ಶಿಕ್ಷಣ ನೀಡಿ, ವಿಶೇಷವಾಗಿ ಶೇರ್ಡ್ ವಾಹನಗಳಲ್ಲಿ.
ನಿಮ್ಮ ಕಾರಿನಲ್ಲಿ ನೀರಿನ ಬಾಟಲಿಯನ್ನು ಇಡುವುದು ಅನುಕೂಲಕರವಾಗಿದ್ದರೂ, ಅದನ್ನು ಸರಿಯಾಗಿ ಭದ್ರಪಡಿಸಲು ವಿಫಲವಾದರೆ ಮಾರಣಾಂತಿಕ ಅಪಘಾತಗಳಿಗೆ ಕಾರಣವಾಗಬಹುದು. ಅಪಘಾತಗಳನ್ನು ತಡೆಗಟ್ಟಲು ಮೇಲಿನ ಸಲಹೆಗಳನ್ನು ಅನುಸರಿಸಿ ಮತ್ತು ಯಾವಾಗಲೂ ಅನುಕೂಲಕ್ಕಿಂತ ಸುರಕ್ಷತೆಗೆ ಆದ್ಯತೆ ನೀಡಿ. ಸರಳ ಕ್ರಮಗಳನ್ನು ತೆಗೆದುಕೊಳ್ಳುವ ಮೂಲಕ, ನೀವು ನಿಮ್ಮನ್ನು, ನಿಮ್ಮ ಪ್ರಯಾಣಿಕರನ್ನು ಮತ್ತು ಇತರ ರಸ್ತೆ ಬಳಕೆದಾರರನ್ನು ರಕ್ಷಿಸಬಹುದು.
ಇದನ್ನೂ ಓದಿ : ರಸ್ತೆ ದಾಟುತ್ತಿದ್ದ ದ್ವಿಚಕ್ರ ವಾಹನಕ್ಕೆ ಬಸ್ ಡಿಕ್ಕಿ: ಭೀಕರ ದೃಶ್ಯ ಸಿಸಿ ಕ್ಯಾಮೆರಾದಲ್ಲಿ ಸೆರೆ
