ಜೈಪುರ, ರಾಜಸ್ಥಾನ: ಕ್ಯಾನ್ಸರ್ ಚಿಕಿತ್ಸೆಗೆ ಸರ್ಕಾರಿ ಆಸ್ಪತ್ರೆಗೆ ದಾಖಲಾಗಿದ್ದ 10 ವರ್ಷದ ಬಾಲಕನ ಕಾಲ್ಬೆರಳಿಗೆ ಇಲಿ ಕಡಿತದ ಪರಿಣಾಮ ಸಾವನ್ನಪ್ಪಿರುವ ದಾರುಣ ಘಟನೆ ಜೈಪುರದಲ್ಲಿ ನಡೆದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ರಾಜ್ಯ ಕ್ಯಾನ್ಸರ್ ಸಂಸ್ಥೆಯಲ್ಲಿ ಬಾಲಕ ಚಿಕಿತ್ಸೆಗೆಂದು ಡಿಸೆಂಬರ್ 11ರಂದು ದಾಖಲಾಗಿದ್ದ. ಬಾಲಕನಿಗೆ ಇಲಿ ಕಚ್ಚಿದೆ ಆದರೆ, ಬಾಲಕನ ಸಾವಿಗೆ ಸೆಪ್ಟಿಸೆಮಿಯಾ ಶಾಕ್ ಮತ್ತು ಹೈ ಇನ್ಫೆಕ್ಷನ್ ಕಾರಣ ಎಂದು ಸರ್ಕಾರದ ಸಮಿತಿ ತಿಳಿಸಿದೆ. ಇಲಿ ಕಡಿತ ಪ್ರಕರಣ ಸಂಬಂಧ ತನಿಖೆಗೆ ಸರ್ಕಾರ ತಂಡ ರಚಿಸಿದ್ದು, ಈ ತಂಡ ಬಾಲಕನ ಸಾವಿಗೆ ಇಲಿ ಕಡಿತ ಕಾರಣವಲ್ಲ ಎಂದಿದೆ.
ಈ ಘಟನೆ ಕುರಿತು ಮಾತನಾಡಿರುವ ಆಸ್ಪತ್ರೆಯ ಸೂಪರಿಟೆಂಡೆಂಟ್ ಡಾ ಸಂದೀಪ್ ಜಸುಜಾ, ಮಗು ಜ್ವರ ಮತ್ತು ನ್ಯೂಮೋನಿಯಾದಿಂದ ಬಳಲುತ್ತಿದ್ದು, ಇದರ ಪರಿಣಾಮ ಹೆಚ್ಚಿನ ಸೋಂಕು ಮತ್ತು ಸೆಪ್ಟಿಸೆಮಿಯಾ ಆಘಾತ ಉಂಟಾಗಿದೆ ಎಂದಿದ್ದಾರೆ.
ಈ ಪ್ರಕರಣ ಸಂಬಂಧ ವೈದ್ಯಕೀಯ ಶಿಕ್ಷಣ ಕಾರ್ಯದರ್ಶಿ ಅಂಬರೀಶ್ ಕುಮಾರ್, ರಾಜ್ಯ ಕ್ಯಾನ್ಸರ್ ಸಂಸ್ಥೆಗೆ ಸಂಬಂಧಿಸಿದ ಸವಾಯಿ ಮಾನ್ ಸಿಂಗ್ (ಎಸ್‌ಎಂಎಸ್) ವೈದ್ಯಕೀಯ ಕಾಲೇಜಿನ ಪ್ರಾಂಶುಪಾಲರಿಂದ ವರದಿ ಕೇಳಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ,
ಈ ಪ್ರಕರಣ ಸಂಬಂಧ ವರದಿ ಮಾಡಿದ ಸ್ಥಳೀಯ ಪತ್ರಿಕೆಗಳು, ಆಸ್ಪತ್ರೆಗೆ ದಾಖಲಾದ ಸ್ವಲ್ಪ ಸಮಯದ ಬಳಿಕ ಮಗು ಅಳಲು ಆರಂಭಿಸಿತು. ಕುಟುಂಬ ಸದಸ್ಯರು ಆತನಿಗೆ ಹೊದಿಸಿದ್ದ ಹೊದಿಕೆಯನ್ನು ತೆಗೆದಾಗ, ಇಲಿ ಕಡಿತದಿಂದ ಆತನ ಕಾಲ್ಬೆರಳುಗಳಿಂದ ರಕ್ತ ಸೋರುವುದನ್ನು ಗಮಿಸಿದರು. ತಕ್ಷಣಕ್ಕೆ ಅಲ್ಲಿದ್ದ ನರ್ಸ್ಗಳಿಗೆ ತಿಳಿಸಿ, ಪ್ರಾಥಮಿಕ ವೈದ್ಯಕೀಯ ಚಿಕಿತ್ಸೆ ನಡೆಸಲಾಯಿತು ಎಂದು ತಿಳಿಸಿದ್ದವು.
ಇಲಿ ಕಚ್ಚಿದ ಮಾಹಿತಿ ಬಂದ ಕೂಡಲೇ ಮಗುವಿಗೆ ಚಿಕಿತ್ಸೆ ನೀಡಿದ್ದೇವೆ. ಆಸ್ಪತ್ರೆ ಆವರಣದಲ್ಲಿ ಶುಚಿತ್ವ ಕಾಪಾಡಲು ನಿರ್ದೇಶನ ನೀಡಲಾಗಿದೆ ಎಂದು ಜಸುಜಾ ತಿಳಿಸಿದ್ದಾರೆ.
ಇದನ್ನೂ ಓದಿ: ಎಸಿ ಕೋಣೆಯಲ್ಲಿ ಇಲಿ ಪಾಷಾಣ: ಇಬ್ಬರು ಮಕ್ಕಳು ಸಾವು
