ಏಷ್ಯಾ ಕಪ್​​ನಲ್ಲಿ ಪಾಕ್​ ವಿರುದ್ಧ ಸೆಣಸಾಟ: ಕೆ ಎಲ್‌ ರಾಹುಲ್​ ಹೇಳಿದ್ದಿಷ್ಟು..

ಏಷ್ಯಾಕಪ್​ ಟಿ20 ಕ್ರಿಕೆಟ್ ಟೂರ್ನಿಯಲ್ಲಿ ಆಗಸ್ಟ್​​​ 28ರಂದು ಭಾರತ-ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗಲಿವೆ. ಉಭಯ ತಂಡಗಳ ಆಟಗಾರರು ಈಗಾಗಲೇ ನೆಟ್ಸ್​​ನಲ್ಲಿ ಬೆವರು ಹರಿಸುತ್ತಿದ್ದಾರೆ. ಸುದ್ದಿಗೋಷ್ಠಿಯಲ್ಲಿ ಭಾಗಿಯಾಗಿ ಮಾತನಾಡಿದ ಟೀಂ ಇಂಡಿಯಾ ಉಪನಾಯಕ ಕೆ ಎಲ್ ರಾಹುಲ್, ಐಸಿಸಿ ಹೊರತುಪಡಿಸಿ ಬೇರಾವುದೇ ಟೂರ್ನಿಗಳಲ್ಲಿ ನಾವು ಆಡಲ್ಲ. ಹೀಗಾಗಿ, ಯಾವಾಗಲೂ ಉಭಯ ತಂಡಗಳು ಮೈದಾನದಲ್ಲಿ ಮುಖಾಮುಖಿಯಾಗುವುದನ್ನು ಎದುರು ನೋಡಲಾಗುತ್ತದೆ. ಪಾಕ್​ ವಿರುದ್ಧ ಸ್ಪರ್ಧಿಸಲು ನಾವು ಉತ್ಸುಕರಾಗಿದ್ದೇವೆ ಎಂದರು. ಮಾತು ಮುಂದುವರೆಸಿ​, 2021ರ ಟಿ20 ವಿಶ್ವಕಪ್​​ನಲ್ಲಿ ಪಾಕ್​ ವಿರುದ್ಧ ಸೋಲಿನ ಬಗ್ಗೆ ಪ್ರತಿಕ್ರಿಯಿಸಿ, ನಾವು ಎಷ್ಟು ಬಾರಿ ಆಡಿದ್ದೇವೆ ಮತ್ತು ಎಷ್ಟು ಸಲ ಗೆದ್ದಿದ್ದೇವೆ ಎಂಬುದರ ಇತಿಹಾಸವಿರಬಹುದು. ಆದರೆ, ಯಾವುದಕ್ಕೂ ಲೆಕ್ಕವಿಲ್ಲ. ಯಾವಾಗಲೂ ಸೊನ್ನೆಯಿಂದಲೇ ಅಭಿಯಾನ ಪ್ರಾರಂಭವಾಗುತ್ತದೆ. ಏಷ್ಯಾ ಕಪ್​​ನಲ್ಲಿ ಉತ್ತಮ ಆರಂಭ ಪಡೆದುಕೊಳ್ಳುವ ತವಕದಲ್ಲಿದ್ದೇವೆ ಎಂದರು.