ಶಾಲಾ ಕಟ್ಟಡದ ಗೋಡೆಗಳ ಮೇಲೆ ವರ್ಣರಂಜಿತ ಕಲಾಕೃತಿಗಳ ಕಲರವ

ಹಾವೇರಿ: ಜಿಲ್ಲೆಯ ರಟ್ಟಿಹಳ್ಳಿ ತಾಲೂಕಿನ ಯಡಗೋಡ ಸರ್ಕಾರಿ ಪ್ರೌಢಶಾಲೆ ವರ್ಣಮಯವಾಗಿದೆ. ಚಿತ್ರ ಶಿಕ್ಷಕ ಮತ್ತು ಇತರ ಶಿಕ್ಷಕರು ಶಾಲೆಯ ಗೋಡೆಗಳನ್ನು ವರ್ಲಿ, ನವ ವರ್ಲಿ ಮತ್ತು ಖಾವಿ ಕಲೆಗಳಿಂದ ಅಲಂಕರಿಸಿದ್ದಾರೆ. ವರ್ಲಿ ಕಲೆಯಲ್ಲಿ ಜಾನಪದ ಜೀವನಶೈಲಿಯ ಚಿತ್ರಣಗಳನ್ನು ಅನಾವರಣಗೊಳಿಸಲಾಗಿದೆ. ಶಾಲೆಯ ಚಿತ್ರಶಿಕ್ಷಕ ಪರಮೇಶ್ವರ್​ ಲಾಕ್​ಡೌನ್ ಸಮಯವನ್ನು ಸದುಪಯೋಗ ಪಡಿಸಿಕೊಂಡಿದ್ದು, ಪರಿಣಾಮ ಯಡಗೋಡ ಪ್ರೌಢಶಾಲೆಯು ಯಾವುದೇ ಖಾಸಗಿ ಶಾಲೆಗಳಿಗಿಂತ ಕಡಿಮೆಯಿಲ್ಲ ಎನ್ನುವಂತೆ ರೂಪುಗೊಂಡಿದೆ. ನವ್ಯ ಕಲೆಗಳನ್ನು ಸಹ ಗೋಡೆಗಳ ಮೇಲೆ ಬಿಡಿಸಿರುವುದು ವಿದ್ಯಾರ್ಥಿಗಳನ್ನು ಆಕರ್ಷಿಸುತ್ತಿದೆ.