ದಾವಣಗೆರೆ: ರೈಲು ಬರುತ್ತಿದ್ದಾಗ ಹಳಿ ದಾಟಲು ಮುಂದಾದ ವೃದ್ಧ: ಪ್ರಾಣ ಕಾಪಾಡಿದ ಆರ್​ಪಿಎಫ್ ಕಾನ್​ಸ್ಟೇಬಲ್

ದಾವಣಗೆರೆ : ರೈಲು ಬರುವುದನ್ನು ಗಮನಿಸದೆ ಹಳಿ ದಾಟಲು ಮುಂದಾದ ವೃದ್ಧನನ್ನು ಆರ್​ಪಿಎಫ್ ಕಾನ್​ಸ್ಟೇಬಲ್ ಕಾಪಾಡಿರುವ ಘಟನೆ ದಾವಣಗೆರೆ ರೈಲು ನಿಲ್ದಾಣದಲ್ಲಿ ನಡೆದಿದೆ. ಏಕಾಏಕಿ ಆಗಮಿಸಿದ ರೈಲಿನಿಂದ ವೃದ್ಧ ರಂಗಪ್ಪ ಎಂಬುವರನ್ನು ಆರ್​ಪಿಎಫ್ ಕಾನ್​ಸ್ಟೇಬಲ್ ಶಿವಾನಂದ ಕಾಪಾಡಿದ್ದಾರೆ. ಕೊಚುವೇಲಿ ಟು ಹುಬ್ಬಳ್ಳಿ ಎಕ್ಸ್‌ಪ್ರೆಸ್‌ ಟ್ರೈನ್ ಇದಾಗಿದ್ದು, ಕೊಚುವೇಲಿಯಿಂದ ಹುಬ್ಬಳ್ಳಿಗೆ ತೆರಳುವ ಮಾರ್ಗ ಮಧ್ಯೆ ದಾವಣಗೆರೆ ರೈಲು ನಿಲ್ದಾಣಕ್ಕೆ ಆಗಮಿಸುವ ವೇಳೆ ರೈಲನ್ನು ಗಮನಿಸದ ವೃದ್ಧ ರಂಗಪ್ಪ ಅವರು ರೈಲ್ವೆ ಹಳಿ ದಾಟುವ ಸಾಹಸ ಮಾಡಿದ್ದಾರೆ. 

ಇದನ್ನೂ ಓದಿ: ಹುಬ್ಬಳ್ಳಿಯಲ್ಲಿ ಕೂದಲೆಳೆಯ ಅಂತರದಲ್ಲಿ ತಪ್ಪಿದ ದುರಂತ: ಭಯಾನಕ ದೃಶ್ಯ ಸಿಸಿಟಿವಿಯಲ್ಲಿ ಸೆರೆ

ಹಳಿ ದಾಟುತ್ತಿದ್ದ ವೃದ್ಧನನ್ನು ಗಮನಿಸಿದ ಗಸ್ತಿನಲ್ಲಿದ್ದ ಆರ್​ಪಿಎಫ್ ಕಾನ್​ಸ್ಟೇಬಲ್ ಶಿವಾನಂದ ಕೂಡಲೇ ಫ್ಲಾರ್ಟ್​ಫಾರ್ಮ್​ಗೆ ತೆರಳಿ ವೃದ್ಧನನ್ನು ರಕ್ಷಣೆ ಮಾಡಿರುವ ವಿಡಿಯೋ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಕಾನ್​ಸ್ಟೇಬಲ್ ಶಿವಾನಂದ ಅವರ ಸಮಯಪ್ರಜ್ಞೆಗೆ ಸಾರ್ವಜನಿಕ ವಲಯದಲ್ಲಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ವೃದ್ಧ ರಂಗಪ್ಪನನ್ನು ಕಾಪಾಡಿದ ಕಾನ್​ಸ್ಟೇಬಲ್​ ಶಿವಾನಂದ ಅವರನ್ನು ಆರ್​ಪಿಎಫ್ ಹಾಗೂ ರೈಲ್ವೆ ಪೊಲೀಸರು ಅಭಿನಂದಿಸಿದ್ದಾರೆ.

ಇದನ್ನೂ ಓದಿ: ಕಲಬುರಗಿಯಲ್ಲಿ ಚಲಿಸುವ ರೈಲು ಹತ್ತಲು ಹೋಗಿ ಆಯತಪ್ಪಿ ಬಿದ್ದ ಮಹಿಳೆ.. ಪ್ರಾಣ ಕಾಪಾಡಿದ ಇಲಾಖೆ​ ಸಿಬ್ಬಂದಿ