ರಾಜಸ್ಥಾನ ಸಚಿವರ ಸೋದರಳಿಯನಿಂದ ಹೋಟೆಲ್​ನಲ್ಲಿ ದಾಂಧಲೆ: ಸಿಸಿಟಿವಿ ವಿಡಿಯೋ

ಜೈಪುರ್​ (ರಾಜಸ್ಥಾನ) : ರಾಜ್ಯ ಸಚಿವ ಪ್ರತಾಪ್​ ಸಿಂಗ್​ ಖಚರಿಯಾವಾಸ್​ ಅವರ ಸೋದರಳಿಯ ಜೈಪುರದಲ್ಲಿರುವ ಹೋಟೆಲ್​ನಲ್ಲಿ ದಾಂಧಲೆ ನಡೆಸಿದ್ದಾರೆ. ಇಲ್ಲಿನ ಹೋಟೆಲೊಂದರಲ್ಲಿ ಮಂಗಳವಾರ ತಡರಾತ್ರಿ  ಘಟನೆ ನಡೆದಿದೆ. ಸಚಿವರ ಸೋದರಳಿಯ ಮತ್ತು ಆತನ ಸ್ನೇಹಿತರು ಹೋಟೆಲ್​ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಹೇಳಲಾಗಿದೆ. ಇಡೀ ಘಟನೆ ಹೋಟೆಲ್​ನ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ವಿಡಿಯೋದಲ್ಲಿ, ಸಚಿವರ ಸೋದರಳಿಯ ಹರ್ಷದೀಪ್​ ಖಚರಿಯಾವಾಸ್ ಮೊದಲು ಹೋಟೆಲ್​ನ ಮುಂಭಾಗದ ಕೌಂಟರ್​ನಲ್ಲಿ ಇರಿಸಿದ್ದ ನೀರಿನ ಬಾಟಲಿಗಳನ್ನು ಕೈಯಿಂದ ಚೆಲ್ಲಾಪಿಲ್ಲಿ ಮಾಡಿದ್ದಾರೆ. ಈ ವೇಳೆ ಜೊತೆಗಿದ್ದ ಗೆಳೆಯರು ಆತನನ್ನು ತಡೆಯಲು ಮುಂದಾಗಿದ್ದಾರೆ. ಜಗಳ ತಡೆಯಲು ಬಂದ ಹೋಟೆಲ್​ ಸಿಬ್ಬಂದಿ ಜೊತೆಗೆ ಮಾತಿನ ಚಕಮಕಿ ನಡೆದಿದೆ.

ಮಾತಿಗೆ ಮಾತು ಬೆಳೆದು ಹರ್ಷದೀಪ್​ ಹೋಟೆಲ್​ ಸಿಬ್ಭಂದಿ ಮೇಲೂ ಹಲ್ಲೆ ಮಾಡಿದ್ದಾರೆ. ಸಿಬ್ಬಂದಿ ಪೊಲೀಸರಿಗೆ ಮಾಹಿತಿ ನೀಡಿದ್ದು, ಆರೋಪಿಗಳು ಪೊಲೀಸರ ಮುಂದೆಯೂ ಹಲ್ಲೆಗೆ ನಡೆಸಿದ್ದಾರೆ ಎನ್ನಲಾಗಿದೆ. ಅಲ್ಲದೇ ಹೋಟೆಲ್​ನಲ್ಲಿದ್ದ ವಸ್ತುಗಳನ್ನು ಪುಡಿಗೈದಿದ್ದಾರೆ. ಸಿಸಿಟಿವಿ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಇದನ್ನೂ ಓದಿ : ಇಬ್ಬರು ಭಯೋತ್ಪಾದಕ ಶಂಕಿತರನ್ನು ಬಂಧಿಸಿದ ಪುಣೆ ಪೊಲೀಸರು!