ಶಾಸಕ ಶರತ್ ಬಚ್ಚೇಗೌಡ ಹುಟ್ಟುಹಬ್ಬದ ಆಚರಣೆ : ಹೂವಿನ ಜೊತೆ ನೋಟುಗಳ ಮಳೆ ಸುರಿಸಿದ ಅಭಿಮಾನಿಗಳು

ಹೊಸಕೋಟೆ (ಬೆಂಗಳೂರು) : ಶಾಸಕ ಶರತ್ ಬಚ್ಚೇಗೌಡರ ಹುಟ್ಟುಹಬ್ಬವನ್ನು ಅವರ ಅಭಿಮಾನಿಗಳು ಅದ್ಧೂರಿಯಾಗಿ ಆಚರಿಸಿದರು. ಈ ವೇಳೆ ಅಭಿಮಾನಿಗಳು ಶಾಸಕರ ಮೇಲೆ ಹೂ ಮಳೆ ಸುರಿಸುವುದರ ಜೊತೆಗೆ ನೋಟುಗಳ ಸುರಿಮಳೆಯನ್ನೇ ಹರಿಸಿದ್ದಾರೆ.

ಹೊಸಕೋಟೆ ತಾಲೂಕಿನ ಬೆಂಡಿಗಾನಹಳ್ಳಿಯ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಶರತ್ ಬಚ್ಚೇಗೌಡ ತಮ್ಮ ಹುಟ್ಟುಹಬ್ಬವನ್ನು ಆಚರಿಸಿಕೊಂಡರು. ಈ ವೇಳೆ ಆಸ್ಪತ್ರೆಗೆ 30 ಲಕ್ಷದ ಎರಡು ಮಿನಿ ಆಂಬ್ಯುಲೆನ್ಸ್ ಗಳನ್ನು ಉಡುಗೊರೆಯಾಗಿ ನೀಡಿದರು. ಶಾಸಕರು ಕಾರ್ಯಕ್ರಮಕ್ಕೆ ಬಂದ ತಕ್ಷಣ ಬೃಹತ್ ಸೇಬಿನ ಹಾರ ಮೂಲಕ ಸ್ವಾಗತ ಕೋರಲಾಯಿತು. ಬಳಿಕ ಬೆಂಬಲಿಗರು ಶಾಸಕರ ಮೇಲೆ‌ ಹೂ ಮಳೆ ಸುರಿಸಿ‌ ಜೈಕಾರ ಹಾಕಿದರು. ಅಭಿಮಾನಿಗಳು ಹೂವಿನ ಜೊತೆಗೆ ನೋಟುಗಳನ್ನು ಶಾಸಕರ ಮೇಲೆ ತೂರಿದರು. ನೋಟುಗಳು ಕೆಳಗೆ ಬೀಳುತ್ತಲೇ ಎಚ್ಚೆತ್ತ ಶಾಸಕ ಶರತ್ ನೆಲದಲ್ಲಿ ಬಿದ್ದ ನೋಟುಗಳನ್ನು ಸ್ವತಃ ಆಯ್ದರು. ಬಳಿಕ ಹಣ ಹಾಕದಂತೆ ಅಭಿಮಾನಿಗಳಿಗೆ ತಾಕೀತು ಮಾಡಿದರು.

ಮುತ್ಸಂದ್ರ ಮತ್ತು ಸೂಲಿಬೆಲೆ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಈ ಎರಡು ಆ್ಯಂಬುಲೆನ್ಸ್​ಗಳನ್ನು ಶಾಸಕ ಶರತ್ ಬಚ್ಚೇಗೌಡ ಉಚಿತವಾಗಿ ನೀಡಿದರು. ಶಾಸಕರಿಂದ ಕೀ ಪಡೆದ ಟಿಹೆಚ್ಒ ವೀಣಾ ಅವರು ತಾವೇ ಆ್ಯಂಬುಲೆನ್ಸ್​ ತೆಗೆದುಕೊಂಡು ಹೋದರು.

ಇದನ್ನೂ ಓದಿ : ಗಂಗಾವತಿ: ರಾತ್ರೋರಾತ್ರಿ ಹೊತ್ತಿ ಉರಿದ ಜ್ಯುವೆಲರಿ, ಅಪಾರ ಪ್ರಮಾಣದ ಚಿನ್ನ ಸುಟ್ಟು ಕರಗಿರುವ ಶಂಕೆ