ಹರಿಯಾಣ ಪ್ರವಾಸೋದ್ಯಮ: ಪಿಂಜೋರ್​ನಲ್ಲಿ ಹಾಟ್​ ಏರ್ ಬಲೂನ್​ ಸಫಾರಿಗೆ ಸಿಎಂ ಖಟ್ಟರ್ ಚಾಲನೆ-ವಿಡಿಯೋ

ಪಿಂಜೋರ್(ಹರಿಯಾಣ): ಹರಿಯಾಣದ ಪಂಚಕುಲ್ ಜಿಲ್ಲೆಯ ಪಿಂಜೋರ್ ಪ್ರಮುಖ ಪ್ರವಾಸಿ ತಾಣಗಳಲ್ಲಿ ಒಂದು. ಇಲ್ಲಿ ಹಲವು ಇತಿಹಾಸ ಪ್ರಸಿದ್ಧ ತಾಣಗಳು, ದೇವಾಲಯಗಳು, ಪುರಾಣ ಪ್ರಸಿದ್ಧ ಸ್ಥಳಗಳನ್ನು ಕಾಣಬಹುದು. ಇಲ್ಲಿನ ಪ್ರವಾಸಿ ತಾಣಗಳು ಪ್ರತಿವರ್ಷ ಸಾವಿರಾರು ಪ್ರವಾಸಿಗರನ್ನು ಆಕರ್ಷಿಸುತ್ತಿವೆ.

ಇದಕ್ಕೆ ಪೂರಕವಾಗಿ ಮುಖ್ಯಮಂತ್ರಿ ಮನೋಹರ್ ಲಾಲ್​ ಖಟ್ಟರ್​ ಅವರು ಪಿಂಜೋರ್​ನಲ್ಲಿ ಹಾಟ್​ ಏರ್​ ಬಲೂನ್​ ಸಫಾರಿ ಉದ್ಘಾಟಿಸಿದರು. ಪಿಂಜೋರ್​ ಅನ್ನು ರಾಜ್ಯದ ಪ್ರಮುಖ ಪ್ರವಾಸಿ ತಾಣವಾಗಿ ಮಾರ್ಪಡಿಸುವ ಮುಖ್ಯ ಉದ್ದೇಶದೊಂದಿಗೆ ಹಾಟ್​ ಏರ್​ಬಲೂನ್ ಸಫಾರಿಗೆ ಅವರು ಚಾಲನೆ ನೀಡಿದರು. 

ಈ ವೇಳೆ ಇತರೆ ಸಚಿವರು, ಶಾಸಕರು ಮತ್ತು ಅಧಿಕಾರಿಗಳು ಉಪಸ್ಥಿತರಿದ್ದರು. ಬಳಿಕ ಸಿಎಂ ಮನೋಹರ್ ಖಟ್ಟರ್​ ಅವರು ಹಾಟ್ ಏರ್​ ಬಲೂನ್​ನಲ್ಲಿ ಸಂಚರಿಸಿ ಸಫಾರಿಯ ಅನುಭವ ಪಡೆದುಕೊಂಡರು. ತಮ್ಮ ಬೆಂಬಲಿಗರಿಗೆ ಆಗಸದಿಂದಲೇ ಕೈ ಬೀಸಿದರು.

ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಸಿಎಂ, ಹರಿಯಾಣದಲ್ಲಿಯೂ ಪ್ರವಾಸೋದ್ಯಮಕ್ಕೆ ಸಾಕಷ್ಟು ಅವಕಾಶಗಳಿವೆ. ಇಂದು ಪಿಂಜೋರ್​ನಲ್ಲಿ ಹಾಟ್​ ಏರ್ ಬಲೂನ್​ಗೆ ಚಾಲನೆ ನೀಡಲಾಗಿದೆ. ಈ ಬಗ್ಗೆ ಸಂಸ್ಥೆಯೊಂದಿಗೆ ಮಾತುಕತೆ ನಡೆಸಲಾಗುತ್ತಿತ್ತು. ಆದರೆ ಇದೀಗ ಸಫಾರಿ ಉದ್ಘಾಟಿಸಲಾಗಿದೆ ಎಂದು ಹೇಳಿದರು. ಪಿಂಜೋರ್​ ಪೌರಾಣಿಕ ಹಿನ್ನೆಲೆ ಹೊಂದಿದೆ. ಪಿಂಜೋರ್​ ಮೊದಲು ಪಂಚಪುರ ಎಂದು ಕರೆಯಲ್ಪಡುತ್ತಿತ್ತು. ಇಲ್ಲಿ ಪಾಂಡವರು ತಮ್ಮ ವನವಾಸದ ಸಂದರ್ಭದಲ್ಲಿ ನೆಲೆಸಿದ್ದರು ಎಂದು ಹೇಳಲಾಗುತ್ತದೆ.

ಇದನ್ನೂ ಓದಿ: ಮಲೆಮಹದೇಶ್ವರ ಬೆಟ್ಟ: 28 ದಿನದಲ್ಲಿ ₹2 ಕೋಟಿಗೂ ಅಧಿಕ ಹಣ ಸಂಗ್ರಹ-ವಿಡಿಯೋ