ಮಹಾರಾಷ್ಟ್ರದಲ್ಲಿ 5ನೇ ದಿನದ ಭಾರತ್​ ಜೋಡೋ: ನಾಂದೇಡ್​ನಿಂದ ರಾಹುಲ್​ ನಡಿಗೆ ಆರಂಭ

ಕಾಂಗ್ರೆಸ್​ ಭಾರತ್​ ಜೋಡೋ ಯಾತ್ರೆ ಮಹಾರಾಷ್ಟ್ರದಲ್ಲಿ ಇಂದು ಐದನೇ ದಿನಕ್ಕೆ ಕಾಲಿಟ್ಟಿದೆ. ವರಿಷ್ಠ ನಾಯಕ ರಾಹುಲ್​ ಗಾಂಧಿ ಅವರು ಪಕ್ಷದ ಮುಖಂಡರು ಹಾಗೂ ಕಾರ್ಯಕರ್ತರೊಂದಿಗೆ ಬೆಳಗ್ಗೆ ಅರ್ಧಾಪುರ ನಾಂದೇಡ್​ನಿಂದ ಯಾತ್ರೆ ಪ್ರಾರಂಭಿಸಿದರು. ಇಲ್ಲಿಂದ ಶುರುವಾದ ಯಾತ್ರೆ ನಾಂದೇಡ್ ನಗರ, ದೇಗ್ಲೂರು ಮತ್ತು ಅರ್ಧಾಪುರ ಪ್ರದೇಶಗಳ ಮೂಲಕ ಹಿಂಗೋಲಿ ತಲುಪಲಿದೆ. ಎನ್‌ಸಿಪಿ ನಾಯಕರಾದ ಸುಪ್ರಿಯಾ ಸುಳೆ, ಜಿತೇಂದ್ರ ಅವ್ಹಾದ್ ಮತ್ತು ರಾಜ್ಯ ಘಟಕದ ಅಧ್ಯಕ್ಷ ಜಯಂತ್ ಪಾಟೀಲ್ ಅವರು ದಾರಿಮಧ್ಯೆ ರಾಹುಲ್​ ಅವರನ್ನು ಸೇರಿಕೊಳ್ಳಲು ನಿರ್ಧರಿಸಿದ್ದಾರೆ. ಸಾರ್ವಜನಿಕ ಸಭೆಯಲ್ಲೂ ಭಾಗವಹಿಸಲಿದ್ದಾರೆ. ಮಹಾರಾಷ್ಟ್ರದ ಮಾಜಿ ಸಚಿವ ಮತ್ತು ಶಿವಸೇನೆ ನಾಯಕ ಆದಿತ್ಯ ಠಾಕ್ರೆ ಕೂಡ ಪಾಲ್ಗೊಳ್ಳಲಿದ್ದಾರೆ. ಸೆಪ್ಟೆಂಬರ್​ 7 ರಂದು ತಮಿಳುನಾಡಿನ ಕನ್ಯಾಕುಮಾರಿಯಿಂದ ಪ್ರಾರಂಭವಾದ ಭಾರತ್​ ಜೋಡೋ ಯಾತ್ರೆ ಇಂದಿಗೆ 65ನೇ ದಿನಕ್ಕೆ ತಲುಪಿದೆ.