ಗಾಳಿ, ಮಳೆಗೆ ತತ್ತರಿಸಿದ ಮಲೆನಾಡು: ಸೂಕ್ತ ಪರಿಹಾರ ನೀಡುವಂತೆ ಗ್ರಾಮಸ್ಥರ ಆಗ್ರಹ

ಶಿವಮೊಗ್ಗ ಜಿಲ್ಲೆ ಸೊರಬ ತಾಲೂಕಿನ ಶಕುನವಳ್ಳಿ, ಶಂಕರಿಕೊಪ್ಪದಲ್ಲಿ ಬಿರುಗಾಳಿ ಸಮೇತ ಮಳೆಯಾಗಿದ್ದು, ಸಾಕಷ್ಟು ಹಾನಿಯಾಗಿದೆ. ನಿನ್ನೆ ಸಂಜೆ ಬಂದ ಗಾಳಿ- ಮಳೆಗೆ ತೆಂಗಿನಮರ, ಮಾವಿನ‌ಮರ ಮುರಿದು ಬಿದ್ದಿವೆ. ಜೋರಾದ ಗಾಳಿಗೆ ವಿದ್ಯುತ್ ಕಂಬವೊಂದು ಮನೆಯ ಮೇಲೆ ಬಿದ್ದಿದ್ದು, ಗ್ರಾಮದ ವಿಶ್ವನಾಥ್ ನಾಡಿಗೇರ್ ಎಂಬುವರ ಮನೆಯ ಶೀಟ್​ಗಳು ಹಾರಿ ಹೋಗಿವೆ. ಕೆಲವೊಂದು ಶೀಟ್​ಗಳು ಕಾರಿನ ಮೇಲೆ ಬಿದ್ದು ಕಾರು ಸಹ ನಜ್ಜುಗುಜ್ಜಾಗಿದೆ. ವಿಪರೀತ ಗಾಳಿ, ಮಳೆಗೆ ಗ್ರಾಮದಲ್ಲಿ ಸಾಕಷ್ಟು ಹಾನಿ ಉಂಟಾಗಿದ್ದು, ಕಂದಾಯ ಇಲಾಖೆ ತಕ್ಷಣ ಸಮೀಕ್ಷೆ ನಡೆಸಿ, ಸೂಕ್ತ ಪರಿಹಾರ ನೀಡಬೇಕು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.