ಕೇಂದ್ರ ಬಜೆಟ್​ ಬಗ್ಗೆ ಮಾಜಿ ಪ್ರಧಾನಿ ಹೆಚ್​ಡಿ ದೇವೇಗೌಡ ಅಸಮಾಧಾನ: ವಿಡಿಯೋ

ಈ ಬಾರಿಯ ಕೇಂದ್ರ ಬಜೆಟ್​​ ಕುರಿತು ರಾಜ್ಯಸಭೆಯಲ್ಲಿ ಮಾಜಿ ಪ್ರಧಾನಿ ಹೆಚ್​.ಡಿ ದೇವೇಗೌಡರು ಮಾತನಾಡಿದ್ದು, ಕಳೆದ 50 ವರ್ಷಗಳಲ್ಲಿ ಕಂಡರಿಯದಂತಹ ನಿರುದ್ಯೋಗ ಸಮಸ್ಯೆ ಈಗ ಉದ್ಭವಿಸಿದೆ. ಬ್ಯಾಂಕಿಂಗ್​ ವಲಯ ಅತೀ ಹೆಚ್ಚು ಸಮಸ್ಯೆ ಎದುರಿಸುತ್ತಿದೆ. ಆರ್ಥಿಕತೆಗೆ ಬಹುದೊಡ್ಡ ಕೊಡುಗೆ ನೀಡುವ ಮನರೇಗಾ ಯೋಜನೆಯಡಿ ನೀಡಲಾಗುವ ವೇತನವನ್ನು ಕೇಂದ್ರ ಬಜೆಟ್​​ನಲ್ಲಿ ಶೇ.​ 34.5 ನಷ್ಟು ಕಡಿತಗೊಳಿಸಿದೆ. ನೋಟು ಅಮಾನ್ಯೀಕರಣವಾದ ಬಳಿಕ ನಿರಂತರವಾಗಿ ಭಾರತದ ಆರ್ಥಿಕತೆ ಕುಂಟುತ್ತಲೇ ಸಾಗಿದೆ. ಶೀಘ್ರ ಚೇತರಿಕೆ ಕಾಣಲು ಸಾಧ್ಯವಿಲ್ಲದಷ್ಟು ಆರ್ಥಿಕ ವ್ಯವಸ್ಥೆ ಹದಗೆಟ್ಟಿದೆ. ಕೋವಿಡ್​ -19 ಹೊಡೆತದಿಂದಾಗಿ ಅತೀ ಹೆಚ್ಚು ಹಾನಿಗೊಳಗಾಗಿರುವ ಮೂಲ ಸೌಕರ್ಯ ಕ್ಷೇತ್ರ ಸೇರಿದಂತೆ ಇತರ ಕ್ಷೇತ್ರಗಳಿಗೆ ಈ ಬಜೆಟ್​ನಲ್ಲಿ ಯಾವುದೇ ವಿಶೇಷ ಪ್ಯಾಕೇಜ್​ ಘೋಷಣೆಯಾಗಿಲ್ಲ. ಈ ಬಜೆಟ್​ ಕೃಷಿ ಸುಧಾರಣೆಗೆಂದೇ ರೂಪಿತವಾದ ಕೆಲವು ಕಾನೂನುಗಳಿಗೆ ಹೊಡೆತ ನೀಡಲಿದೆ. ಪಿಎಂ ಕಿಸಾನ್​ ಯೋಜನೆಯಡಿ ಅಲ್ಪಾವಧಿ ಬೆಳೆಗಳಿಗೆ ನೀಡುವ ಸಬ್ಸಿಡಿ ಪ್ರಮಾಣವನ್ನು ಈ ಬಾರಿಯ ಬಜೆಟ್​ನಲ್ಲಿ ಕಡಿತಗೊಳಿಸಲಾಗಿದೆ. ಕಳೆದ 2 ವರ್ಷಗಳಿಂದಲೂ ಪ್ರಧಾನಮಂತ್ರಿ ಅನ್ನದಾತ ಸಂರಕ್ಷಣಾ ಅಭಿಯಾನ ಯೋಜನೆಯಡಿ ನೀಡಲಾಗುವ ಬೆಂಬಲ ಬೆಲೆ ಕಡಿತಗೊಳಿಸುತ್ತಾ ಬಂದಿದೆ ಎಂದು ಹೆಚ್​​ಡಿ ದೇವೇಗೌಡರು ರಾಜ್ಯಸಭೆ ಕಲಾಪದ ವೇಳೆ ಹೇಳಿದ್ದಾರೆ.