ವಾಷಿಂಗ್ಟನ್: ಅಮೆರಿಕದ ಫುಡ್ ಆ್ಯಂಡ್ ಡ್ರಗ್ ಆಡ್ಮಿನಿಸ್ಟ್ರೇಷನ್ (ಎಫ್ಡಿಎ) ಹೊಸ ಕೋವಿಡ್ ಲಸಿಕೆಗೆ ಅನುಮತಿಸಿದೆ. ಕೋವಿಡ್ನ ಹೊಸ ರೂಪಾಂತಗಳನ್ನು ಗುರಿಯಾಗಿಸಿ ಈ ಲಸಿಕೆಯನ್ನು ಫೈಜರ್ ಮತ್ತು ಮೊರ್ಡನಾ ಕಂಪನಿ ಅಭಿವೃದ್ಧಿಪಡಿಸಿದೆ.
ಈ ಲಸಿಕೆಯು ಎಕ್ಬಿಬಿ 1.5 ತಳಿಯನ್ನು ಗುರಿಯಾಗಿಸಿಕೊಂಡಿದೆ. ಪ್ರಸ್ತುತ ಈ ತಳಿ ಅಮೆರಿಕನ್ನರನ್ನು ಹೆಚ್ಚಾಗಿ ಕಾಡುತ್ತಿದೆ. ಇದರ ವಿರುದ್ಧ ಹೊಸ ಲಸಿಕೆಯನ್ನು ತಯಾರಿಸುವ ಜವಾಬ್ದಾರಿಯನ್ನು ಉತ್ಪಾದಕರಿಗೆ ನೀಡಲಾಗಿತ್ತು. ಇವು ಮೊನೊವಲೆಂಟ್ ಆಗಿದ್ದು, ಈ ಹಿಂದಿನ ಬೂಸ್ಟರ್ ಲಸಿಕೆಗಳಿಗಿಂತ ವಿಭಿನ್ನ. ಮೂರು ವರ್ಷದ ಹಿಂದೆ ಸೋಂಕಿಗೆ ಕಾರಣವಾದ ಮೂಲ ವೈರಸ್ನ ವಿರುದ್ಧದ ರಕ್ಷಣೆ ಹೊಂದಿಲ್ಲ ಎಂದು ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ.
ಅಮೆರಿಕದ ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರ, ಹೊಸ ಲಸಿಕೆಯನ್ನು ಯಾರು ಪಡೆಯಬೇಕು ಎಂಬ ಕುರಿತು ಸಲಹಾ ಸಭೆ ನಡೆಸುವ ಸಾಧ್ಯತೆ ಇದೆ. ಇದಾದ ಬಳಿಕ ಸಿಡಿಸಿ ನಿರ್ದೇಶಕರು ಅಂತಿಮ ನಿರ್ಧಾರ ತೆಗೆದುಕೊಳ್ಳಲಿದ್ದಾರೆ. ಆ ಬಳಿಕ ದೇಶಾದ್ಯಂತ ಲಸಿಕೆಗಳು ಔಷಧಾಲಯ, ಕ್ಲಿನಿಕ್ ಮತ್ತು ಆರೋಗ್ಯ ವಲಯಕ್ಕೆ ಕೆಲವೇ ದಿನಗಳಲ್ಲಿ ತಲುಪಲಿವೆ ಎಂದು ಮಾಧ್ಯಮ ವರದಿ ಮಾಡಿದೆ.
ಕೋವಿಡ್ ಪ್ರಸ್ತುತ ಅಮೆರಿಕದಲ್ಲಿ ಹೆಚ್ಚು ಜನರ ಸಾವಿಗೆ ಕಾರಣವಾಗುತ್ತಿದೆ. ಇದು ದುರ್ಬಲ ವರ್ಗದ ಜನಸಂಖ್ಯೆಯ ಮೇಲೆ ಗಮನಾರ್ಹ ಅಪಾಯ ಹೊಂದಿದೆ. ಅದರಲ್ಲೂ ಉಸಿರಾಟದ ವೈರಸ್ ಋತುಮಾನದಲ್ಲಿ ಇದರ ಪ್ರವೇಶ ಗರಿಷ್ಠ. ಈ ಋತುವಿನಲ್ಲಿ ಜನರನ್ನು ರಕ್ಷಿಸಲು ನವೀಕರಿಸಿದ ಲಸಿಕೆಗಳು ನಿರ್ಣಾಯಕ ಎಂದು ಮಾಡರ್ನಾ ಕಂಪನಿಯ ಸಿಇಒ ಸ್ಟೇಫನ್ ಬನ್ಸೆಲ್ ತಿಳಿಸಿದ್ದಾರೆ.
ಎಫ್ಡಿಎ ಸಮಯೋಚಿತ ನಿರ್ಧಾರವನ್ನು ನಾವು ಪ್ರಶಂಸಿಸುತ್ತೇವೆ. ಕೋವಿಡ್ ಲಸಿಕೆ ಪಡೆಯುವ ಉದ್ದೇಶ ಹೊಂದಿರುವ ಮಂದಿ ಇದೇ ಸಮಯದಲ್ಲಿ ಹೊಸ ಕೋವಿಡ್ ಲಸಿಕೆ ಪಡೆಯುವಂತೆ ನಾವು ಸಲಹೆ ನೀಡುತ್ತೇವೆ ಎಂದು ಹೇಳಿದ್ದಾರೆ.
ಅಭಿವೃದ್ಧಿ ಹೊಂದಿರುವ ಕೋವಿಡ್ ಲಸಿಕೆಯಲ್ಲಿ ಸಾರ್ಸ್ ಕೋವ್2ನ ಎಕ್ಸ್ಬಿಬಿ 1.5 ತಳಿಯ ವಿರುದ್ಧ ಹೋರಾಡುವ ಸ್ಪೈಕ್ ಪ್ರೋಟಿನ್ ಇದ್ದು, ಇದು 6 ತಿಂಗಳ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ವ್ಯಕ್ತಿಗಳಲ್ಲಿ ಕೋವಿಡ್ ತಡೆಗಟ್ಟಲು ಸಹಾಯ ಮಾಡುತ್ತದೆ ಎಂದಿದ್ದಾರೆ.
ಕೋವಿಡ್ ಪ್ರಕರಣಗಳು ಮತ್ತೊಮ್ಮೆ ಏರಿಕೆ ಕಾಣುತ್ತಿರುವ ಸಮಯದಲ್ಲಿ ಈ ನಿರ್ಧಾರ ಹೊರಬಂದಿದೆ. ಈ ಹಿಂದೆ ಕೋವಿಡ್ ಲಸಿಕೆ ಪಡೆಯದವರು, ಇದೀಗ ಆರು ತಿಂಗಳ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಅಮೆರಿಕ ಜನರು ಲಸಿಕೆ ಪಡೆಲು ಅರ್ಹರು ಎಂದು ಫೈಜರ್ ಸಿಇಒ ಅಲ್ಬರ್ಟ್ ಬೌರಿಯಾ ಮಾಹಿತಿ ನೀಡಿದ್ದಾರೆ. (ಐಎಎನ್ಎಸ್)
ಇದನ್ನೂ ಓದಿ: ಕೋವಿಡ್ ಸೋಂಕಿತ ವ್ಯಕ್ತಿ ವಾಸನೆ, ರುಚಿ ಕಳೆದುಕೊಳ್ಳುವುದೇಕೆ?
