ಬೆಂಗಳೂರು: ನಗರೀಕರಣವಾಗುತ್ತಿರುವ ಇಂದಿನ ಜಗತ್ತಿನಲ್ಲಿ ಜನರನ್ನು ಅತಿಯಾಗಿ ಕಾಡುತ್ತಿರುವ ಸಮಸ್ಯೆ ವಾಯು ಮಾಲಿನ್ಯ. ಇದು ಅತ್ಯಂತ ಕಾಳಜಿ ವಿಷಯವೂ ಆಗಿದೆ. ಶ್ವಾಸಕೋಶ ಸಮಸ್ಯೆ, ಹೃದಯ ರಕ್ತನಾಳ ಸಮಸ್ಯೆ ಹಾಗು ನಿರ್ದಿಷ್ಟ ಕ್ಯಾನ್ಸರ್ ಸೇರಿದಂತೆ ಹಲವು ಆರೋಗ್ಯ ಅಪಾಯವನ್ನು ವಾಯು ಮಾಲಿನ್ಯ ತಂದೊಡ್ಡುತ್ತದೆ. ಇಂತಹ ವಾಯು ಮಾಲಿನ್ಯವನ್ನು ಸಂಪೂರ್ಣವಾಗಿ ಹೋಗಲಾಡಿಸುವುದು ಅಸಾಧ್ಯ. ಆದರೆ, ಕೆಲವು ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಬಹುದು.
ಮಾಸ್ಕ್ ಧರಿಸಿ: ವಾಯು ಮಾಲಿನ್ಯವಿರುವ ಪ್ರದೇಶಗಳಲ್ಲಿ ಸಂಚರಿಸುವಾಗ ಅದರ ಸೂಕ್ಷ್ಮ ಕಣಗಳು ದೇಹದೊಳಗೆ ಸೇರದಂತೆ ಎನ್ 95 ಮತ್ತು ಎನ್ 99 ಮಾಸ್ಕ್ ಧರಿಸುವುದು ಅಗತ್ಯ. ಆದರೆ ಮಾಸ್ಕ್ ಅನ್ನು ಸರಿಯಾಗಿ ಧರಿಸುವುದು ಮುಖ್ಯ.
ಮನೆಯೊಳಗೆ ಇರಿ: ಮಾಲಿನ್ಯಕ್ಕೆ ಹೆಚ್ಚು ಒಳಗಾಗುವ ಬದಲು ಸಾಧ್ಯವಾದಷ್ಟು ಮನೆಯೊಳಗೆ ಇರಿ. ಮನೆಯ ಒಳಾಂಗಣವನ್ನು ಕೂಡ ಏರ್ ಪ್ಯೂರಿಫೈಯರ್‌ನಿಂದ ಶುಚಿಗೊಳಿಸಿ. ಮನೆಯೊಳಗೆ ಹೊರಗಿನ ಮಾಲಿನ್ಯಗಳು ಬಾರದಂತೆ ಕಿಟಕಿ, ಮನೆ ಬಾಗಿಲುಗಳನ್ನು ಮುಚ್ಚಿ.
ಹೈಡ್ರೇಟ್ ಆಗಿರಿ: ಚಳಿಗಾಲವಾದರೂ ಸಾಧ್ಯವಾದಷ್ಟು ನೀರು ಕುಡಿಯಿರಿ. ಇದರಿಂದ ದೇಹದ ವಿಷಕಾರಿ ಅಂಶ ಹೊರಹೋಗಲು ಸಾಧ್ಯವಾಗುತ್ತದೆ. ದೇಹದಲ್ಲಿ ಸರಿಯಾದ ಪ್ರಮಾಣದ ನೀರು ಇರುವುದರಿಂದ ಇದು ಮಾಲಿನ್ಯದ ವಿರುದ್ಧ ಪರಿಣಾಮಕಾರಿಯಾಗಿ ಹೋರಾಡಲು ಸಾಧ್ಯವಾಗುತ್ತದೆ.
ಹಣ್ಣು, ತರಕಾರಿ ಸೇವಿಸಿ: ಹಣ್ಣು ಮತ್ತು ತರಕಾರಿಗಳಲ್ಲಿ ಆ್ಯಂಟಿ ಆ್ಯಕ್ಸಿಡೆಂಟ್ ಗುಣಗಳು ಇರುತ್ತವೆ. ಇದು ಮಾಲಿನ್ಯದಿಂದ ಉಂಟಾಗುವ ಆ್ಯಕ್ಸಿಡೇವಿಟ್ ಒತ್ತಡದಿಂದ ಪಾರು ಮಾಡಿ, ದೇಹದ ರೋಗ ನಿರೋಧಕ ಶಕ್ತಿ ಹೆಚ್ಚಿಸುತ್ತದೆ.
ಧೂಮಪಾನ ಬೇಡ: ಮಾಲಿನ್ಯದ ಜೊತೆಗೆ ಧೂಮಪಾನವೂ ಶ್ವಾಸಕೋಶ ವ್ಯವಸ್ಥೆಯನ್ನು ಹಾಳು ಮಾಡುತ್ತದೆ. ಧೂಮಪಾನ ಮಾಡುತ್ತಿದ್ದರೆ, ಇದು ಉಸಿರಾಟದ ಮೇಲೆ ಕೆಟ್ಟ ಪರಿಣಾಮ ಬೀರುವ ಹಿನ್ನೆಲೆಯಲ್ಲಿ ಇದನ್ನು ತಪ್ಪಿಸಿ, ಸಾಧ್ಯವಾದಲ್ಲಿ ತ್ಯಜಿಸುವುದು ಉತ್ತಮ.
ಒಳಾಂಗಣ ವ್ಯಾಯಾಮ: ವಾಯು ಗುಣಮಟ್ಟ ಕಳಪೆಯಾಗಿದ್ದರೆ, ನಿಮ್ಮ ವ್ಯಾಯಾಮ ಚಟುವಟಿಕೆಯನ್ನು ಮನೆಯೊಳಗೆ ಮಾಡುವುದು ಒಳಿತು. ಜಿಮ್ ಸೇರಿದಂತೆ ಹೊರಗಿನ ವರ್ಕೌಟ್‌ಗಳಿಂದ ನೀವು ಮಾಲಿನ್ಯಕ್ಕೆ ತೆರೆದುಕೊಳ್ಳುವ ಸಾಧ್ಯತೆ ಹೆಚ್ಚಿರುತ್ತದೆ.
ವಾಯುಗುಣಮಟ್ಟ ನಿರ್ವಹಣೆ: ಸುತ್ತಮುತ್ತಲ ಪ್ರದೇಶದ ವಾಯು ಗುಣಮಟ್ಟವನ್ನು ಸದಾ ನಿರ್ವಹಣೆ ಮಾಡಿ. ಇದರಿಂದ ಹೊರಗಿನ ಚಟುವಟಿಕೆ ಕುರಿತು ನಿರ್ಧರಿಸಲು ಸಾಧ್ಯವಿದೆ. ಎಕ್ಯೂಐ ಹೆಚ್ಚಿದ್ದ ದಿನದಲ್ಲಿ ಮನೆಯಿಂದ ಹೊರ ಹೋಗದಿರುವುದು ಒಳ್ಳೆಯದು. (ಎಎನ್ಐ)
ಇದನ್ನೂ ಓದಿ: ಮುಂಬೈಯಲ್ಲೂ ಹೆಚ್ಚುತ್ತಿದೆ ವಾಯು ಮಾಲಿನ್ಯ; ಜೆ.ಜೆ.ಆಸ್ಪತ್ರೆಯಲ್ಲಿ ರೋಗಿಗಳಿಗೆ ಪ್ರತ್ಯೇಕ ಒಪಿಡಿ
