ಸೌಂದರ್ಯವರ್ಧಕಗಳ ಬಳಕೆ ಕೇವಲ ಹೆಣ್ಣು ಮಕ್ಕಳಿಗೆ ಮಾತ್ರ ಎಂಬ ಸೀಮಿತ ಕಲ್ಪನೆ ಈಗಿಲ್ಲ. ಇಂದು ಪುರುಷರು ಕೂಡ ಚರ್ಮದ ಆರೋಗ್ಯ ಕಾಳಜಿಯಲ್ಲಿ ಅಷ್ಟೇ ಪ್ರಮಾಣದ ಪ್ರಯತ್ನ ಮಾಡುತ್ತಿದ್ದಾರೆ. ಸಾಮಾನ್ಯವಾಗಿ ಮಹಿಳೆಯರು ತಮ್ಮ ತ್ವಚೆಯ ಅಂದ ಕಾಯ್ದುಕೊಳ್ಳಲು ಸಲೂನ್ ಅಥವಾ ಇನ್ನಿತರ ಚಿಕಿತ್ಸೆ, ನೈಸರ್ಗಿಕ ಉತ್ಪನ್ನ ಬಳಕೆ ಅಥವಾ ಮಾರುಕಟ್ಟೆಯಲ್ಲಿ ಲಭ್ಯವಾಗುವ ಸೌಂದರ್ಯ ವರ್ಧಕಗಳನ್ನು ಬಳಸುತ್ತಾರೆ. ಪುರುಷ ಮತ್ತು ಮಹಿಳೆಯರ ಚರ್ಮದ ಆರೋಗ್ಯವನ್ನು ಕಾಪಾಡುವಂತೆ ಅನೇಕ ಉತ್ಪನ್ನಗಳಿಂದು ಮಾರುಕಟ್ಟೆಯಲ್ಲಿ ಲಭ್ಯವಿದೆ.
ಅನೇಕ ಸ್ಕೀನ್ ಕೇರ್ ಉತ್ಪನ್ನಗಳು ಒಂದು ಮಾರುಕಟ್ಟೆಯಲ್ಲಿ ಲಭ್ಯವಿದ್ದರೂ, ಇದರಲ್ಲಿ ಕಳೆದ ಕೆಲವು ವರ್ಷದಿಂದ ಹೆಚ್ಚಾಗಿ ಜನರು ಆರಿಸುತ್ತಿರುವುದು ಶೀಟ್ ಮಾಸ್ಕ್. ಮುಖದ ತ್ವಚೆಯ ಆರೋಗ್ಯ ಮತ್ತು ಕಾಂತಿ ಕಾಪಾಡುವ ಈ ಶೀಟ್ ಮಾಸ್ಕ್ಗಳನ್ನು ಪುರುಷ ಮತ್ತು ಮಹಿಳೆಯರಿಬ್ಬರೂ ಬಳಕೆ ಮಾಡುತ್ತಿದ್ದಾರೆ. ಈ ಶೀಟ್ ಅನ್ನು ಸೆರಂನಲ್ಲಿ ನೆನೆಸಿಟ್ಟಿರುವುದರಿಂದ ಮುಖದ ಮೇಲೆ ಹೆಚ್ಚಿನ ಪರಿಣಾಮ ಬೀರುತ್ತದೆ. ಇದು ಚರ್ಮವನ್ನು ಮಾಶ್ಚರೈಸರ್ ಮಾಡುವ ಜೊತೆಗೆ ಕಾಂತಿ ಹೆಚ್ಚಿಸುತ್ತದೆ.
ಈ ಕುರಿತು ಮಾತನಾಡಿರುವ ಆರ್ಗನಿಕ್ ಸೌಂದರ್ಯ ಉತ್ಪನ್ನಗಳ ಸಂಸ್ಥೆಯ ಸಿಇಒ ಮತ್ತು ಸೌಂದರ್ಯ ತಜ್ಞೆ ನಂದಿತಾ, ಮಾರುಕಟ್ಟೆಯಲ್ಲಿ ಸ್ಕಿನ್ ಕೇರ್ ಉತ್ಪನ್ನಗಳು ಇನ್ನಿತರ ಉತ್ಪನ್ನಗಳಿಂದ ಪ್ರಗತಿದಾಯಕ. ಇದು ಜಾಗತೀಕರಣದ ಕಾಲಮಾನ. ಸ್ಕೀನ್ಕೇರ್ಗಳು ರಾಷ್ಟ್ರೀಯ, ಅಂತಾರಾಷ್ಟ್ರೀಯ ಮಟ್ಟದ ಮಹತ್ವ ಹೊಂದಿದೆ. ಒಂದು ದೇಶದ ಜನರು ಬಳಕೆ ಮಾಡುವ ಸೌಂದರ್ಯವರ್ಧಕದ ಕುರಿತು ಸಂಪೂರ್ಣ ಮಾಹಿತಿಯನ್ನು ಜಗತ್ತು ಹೊಂದಿದೆ. ಅದೇ ರೀತಿ ಶೀಟ್ ಮಾಸ್ಕ್. ಶೀಟ್ ಮಾಸ್ಕ್ ಇದು ಕೊರಿಯನ್- ಜಪಾನೀಸ್ ಸೌಂದರ್ಯ ಚಿಕಿತ್ಸೆಯಾಗಿದ್ದು, ಇದು ಇಂದು ಪ್ರಪಂಚಾದ್ಯಂತ ಜನಪ್ರಿಯಗೊಂಡಿದೆ.
ಏನಿದು ಶೀಟ್ ಮಾಸ್ಕ್?: ಶೀಟ್ ಮಾಸ್ಕ್ ಅನ್ನು ನಿರ್ದಿಷ್ಟ ರೀತಿಯ ಫೈಬರ್ ಅಥವಾ ಜೆಲ್ನಿಂದ ಮಾಡಲಾಗಿರುತ್ತದೆ. ಇದನ್ನು ಸೆರಂನಲ್ಲಿ ನೆನೆಸಿಡಲಾಗುವುದು. ಇದು ಮುಖದ ಆಕೃತಿಗೆ ಸರಿಹೊಂದುವ ರೀತಿಯಲ್ಲಿದೆ. ಈ ಸೆರಂ ಅಗತ್ಯ ಪ್ರಮುಖ ವಿಟಮಿನ್, ನೈಸರ್ಗಿಕ ಎಣ್ಣೆ ಮತ್ತು ಇನ್ನಿತರ ಚರ್ಮದ ಪೌಷ್ಟಿಕಾಂಶದ ಗುಣಗಳಿಂದ ಕೂಡಿರುತ್ತದೆ. ಚರ್ಮಕ್ಕೆ ಮಾಶ್ಚರೈಸರ್ ಜೊತೆಗೆ ಪೋಷಕಾಂಶವನ್ನು ಒದಗಿಸುತ್ತದೆ.
ಇದು ಏಕ ಬಳಕೆ ಮಾಸ್ಕ್ ಆಗಿರುತ್ತದೆ. ಒಮ್ಮೆ ಬಳಕೆ ಮಾಡಿದರೆ ಮರು ಬಳಕೆಗೆ ಬರುವುದಿಲ್ಲ. ಈ ರೀತಿಯ ಮಾಸ್ಕ್ಗಳನ್ನು ಮುಖದ ಮೇಲೆ 15 ನಿಮಿಷಗಳ ಕಾಲ ಹಾಗೆಯೇ ಬಿಡಗೇಕು. ಬಳಿಕ ಅದನ್ನು ತೆಗೆಯಬೇಕು. ಮಾಸ್ಕ್ ತೆಗೆದ ಬಳಿಕ ಮುಖ ತೊಳೆಯದೇ ಮುಖಕ್ಕೆ ಅಂಟಿಕೊಂಡಿರುವ ಸೆರಂ ಅನ್ನು ಚೆನ್ನಾಗಿ ಮಸಾಜ್ ಮಾಡಬೇಕು. ಇದರಿಂದ ಸೆರಂನ ಅತಿ ಹೆಚ್ಚಿನ ಲಾಭ ಪಡೆಯಬಹುದು. ಸದ್ಯ, ಮಾರುಕಟ್ಟೆಯಲ್ಲಿ ಎಲ್ಲಾ ಚರ್ಮದ ವಿಧಕ್ಕೆ ಅನುಗುಣವಾಗಿ ಈ ಶೀಟ್ ಮಾಸ್ಕ್ ಲಭ್ಯವಿದೆ.
ಈ ಶೀಟ್ ಮಾಸ್ಕ್ ಪ್ರಯೋಜನ ಕುರಿತು ಮಾತನಾಡಿರುವ ನಂದಿತ, ಇದು ಚರ್ಮದ ಮಾಶ್ಚರೈಸರ್ ಕಾಪಾಡುತ್ತದೆ. ಚರ್ಮಕ್ಕೆ ಮೆತ್ತುವ ಧೂಳಿನ ಸಮಸ್ಯೆ, ಅದರಲ್ಲೂ ಬೇಸಿಗೆಯ ಬಿಸಿಲಿನಿಂದ, ಹೆಚ್ಚು ಎಸಿ ಬಳಕೆಯಿಂದ ಆಗುವ ಚರ್ಮದ ಸಮಸ್ಯೆ ನಿವಾರಣೆ ಮಾಡುತ್ತದೆ. ಜೊತೆಗೆ ಮೇಕಪ್ ಬಳಕೆ ಮಾಡುವುದರಿಂದ ಚರ್ಮದಲ್ಲಿನ ನೈಸರ್ಗಿಕ ಮಾಶ್ಚರೈಸರ್ ಕಡಿಮೆ ಆಗುತ್ತದೆ. ಇದರಿಂದ ಚರ್ಮ ಮತ್ತಷ್ಟು ಒಣಗುತ್ತದೆ. ಇದರಿಂದ ಚರ್ಮದ ಕಾಂತಿ ಕಡಿಮೆಯಾಗಿ ಅವಧಿಗೆ ಮೊದಲು ಸುಕ್ಕು ಪ್ರಾರಂಭವಾಗುತ್ತದೆ. ಇದರಿಂದ ಮುಕ್ತಿಯನ್ನು ಫೇಸ್ ಮಾಸ್ಕ್ ನೀಡುತ್ತದೆ. ಇದು ಚರ್ಮವನ್ನು ಹೈಡ್ರೇಟ್ ಮಾಡಿ ಪೋಷಣೆ ಮಾಡುತ್ತದೆ.
ಕೇವಲ ತ್ವಚೆಯ ತೇವಾಂಶ ಕಾಪಾಡುವ ಮಾಸ್ಕ್ ಅಲ್ಲದೇ, ಡಿಟೊಕ್ಸಿಫೈಯಿಂಗ್ ಮತ್ತು ಟ್ಯಾನ್ ಚರ್ಮಕ್ಕೆ ಸೂಕ್ತವಾದ ಮಾಸ್ಕ್ ಅನ್ನು ಮಾರುಕಟ್ಟೆಯಲ್ಲಿ ಕಾಣಬಹುದು. ಇದು ಚರ್ಮವನ್ನು ಡಿಟೊಕ್ಸಿನ್ ಮಾಡುವುದರ ಜೊತೆಗೆ ಮೃದು ಮತ್ತು ಹೊಳಪು ನೀಡುತ್ತದೆ. ಚರ್ಮದ ಸುಕ್ಕು ಕಡಿಮೆ ಮಾಡಿ, ಚರ್ಮದಲ್ಲಿ ಒಂದೇ ಬಣ್ಣ ಕಾಪಾಡಲು ಸಹಾಯ ಮಾಡುತ್ತದೆ.
ಶೀಟ್ ಮಾಸ್ಕ್ ಬಳಕೆ ಮಾಡುವಾಗ ಈ ವಿಚಾರ ನೆನಪಿರಲಿ..: ಶೀಟ್ ಮಾಸ್ಕ್ ಬಳಕೆ ಮಾಡುವ ಮೊದಲು ಮುಖವನ್ನು ಚೆನ್ನಾಗಿ ತೊಳೆಯಬೇಕು. ಶೀಟ್ ಮಾಸ್ಕ್ನಲ್ಲಿ ಸ್ವಚ್ಛ ತ್ವಚೆಯ ಮೇಲೆ ಮಾತ್ರ ಬಳಕೆ ಮಾಡಬೇಕು. ನಿಮ್ಮ ತ್ವಚೆಯ ಗುಣಮಟ್ಟಕ್ಕೆ ಅನುಗುಣವಾಗಿ ಶೀಟ್ ಮಾಸ್ಕ್ ಬಳಸಿ. ಶೀಟ್ ಮಾಸ್ಕ್ ಅನ್ನು 15 ರಿಂದ 20 ನಿಮಿಷ ಮುಖದ ಮೇಲೆ ಬಿಡಬೇಕು. ಪ್ಯಾಕೆಟ್ನಲ್ಲಿರುವ ಸೆರಂನಿಂದ ಕತ್ತು ಮತ್ತು ಕೈಗಳಿಗೆ ಮಸಾಜ್ ಮಾಡಿ. ಮಾಸ್ಕ್ ತೆಗೆದ ಬಳಿಕ ವೃತ್ತಾಕಾರವಾಗಿ ಮಸಾಜ್ ಮಾಡಬೇಕು. ಇದರಿಂದ ಸೆರಂ ತ್ವಚೆಯ ಆಳಕ್ಕಿಳಿಯುತ್ತದೆ. ಶೀಟ್ ಮಾಸ್ಕ್ ತೆಗೆದ ನಂತರ ಮುಖ ತೊಳೆಯಬೇಡಿ. ಶೀಟ್ ಮಾಸ್ಕ್ ಹಾಕಿ ರಾತ್ರಿಯಿಡೀ ಮಲಗಬೇಡಿ.
ಇದನ್ನೂ ಓದಿ: ದೇಹದ ದಣಿವು ಜೊತೆಗೆ ಚರ್ಮದ ಅಂದ ಹೆಚ್ಚಿಸಲು ಸ್ನಾನದಲ್ಲಿ ಈ ವಸ್ತುಗಳನ್ನು ಸೇರಿಸಿ
