ಹಲ್ಲು, ಬಾಯಿಗೆ ಬರುವ ಆರೋಗ್ಯ ಸಮಸ್ಯೆಗಳಿಗೆ ವಂಶವಾಹಿಗಳೂ ಕಾರಣ!

ಜೀವನ ಶೈಲಿ, ಕೆಟ್ಟ ಆಹಾರ ಪದ್ಧತಿಯಿಂದ ಬಾಯಿಯ ಅನಾರೋಗ್ಯ ಕಾಣಿಸಿಕೊಳ್ಳುತ್ತದೆ ಎಂದು ಇತ್ತೀಚಿನವರೆಗೂ ನಂಬಲಾಗಿತ್ತು. ಆದರೀಗ ಬಾಯಿಯ ಅನಾರೋಗ್ಯಕ್ಕೆ ವಂಶವಾಹಿಗಳೂ ಕಾರಣ ಎಂದು ಸಂಶೋಧನೆಯೊಂದು ಹೇಳಿದೆ..

ಆರೋಗ್ಯ ಕ್ಷೇತ್ರದಲ್ಲಿ ಸಾಕಷ್ಟು ಸಂಶೋಧನೆಗಳು ಆಗುತ್ತಿವೆ. ಈಗ ಅಚ್ಚರಿಯಾಗುವಂತಹ ಸಂಶೋಧನೆಯೊಂದು ಬಹಿರಂಗವಾಗಿದೆ. ನಿಮಗೆ ಹಲ್ಲುಗಳ ಸಮಸ್ಯೆ ಇದೆಯೇ?, ಹಲ್ಲು ಹುಳುಕು ಇದೆಯೇ?.. ಯೋಚನೆ ಮಾಡಿ.. ಏನು ಕಾರಣವಿರಬಹುದು.? ನೀವೇನಾದರೂ ಯೋಚನೆ ಮಾಡಿದರೆ, ಜೀವನ ಶೈಲಿ, ಕೆಟ್ಟ ಆಹಾರ ಪದ್ಧತಿಯಿಂದ ಹಲ್ಲಿನ ತೊಂದರೆ ಕಾಣಿಸಿದೆ ಎಂದು ನಿಮಗೆ ಅನ್ನಿಸುತ್ತದೆ. ಆದರೆ, ಇಲ್ಲೊಂದು ಸಂಶೋಧನೆ ಹಲ್ಲುಗಳ ಅನಾರೋಗ್ಯಕ್ಕೆ ಜೀನ್​ಗಳು ಅಥವಾ ವಂಶವಾಹಿಗಳು ಕಾರಣವಾಗಬಹುದು ಎಂದಿದೆ.

ತಂದೆ-ತಾಯಿಯ ನಡವಳಿಕೆಗಳು ಮಕ್ಕಳಿಗೆ ರವಾನೆಯಾಗಲು ಜೀನ್​ಗಳು ಕಾರಣ ಎಂದು ಮೊದಲು ಸಂಶೋಧನೆ ಮಾಡಲಾಗಿತ್ತು. ಅದಾದ ಕೆಲವು ದಿನಗಳ ನಂತರ ಕೆಲ ರೋಗಗಳೂ ಜೀನ್​ಗಳಿಂದ ಬರುತ್ತವೆ ಎಂದು ಸಂಶೋಧನೆಗಳು ಹೇಳಿವೆ. ಇವುಗಳನ್ನು ಅನುವಂಶಿಕ ರೋಗಗಳು ಎಂದು ಗುರ್ತಿಸಲಾಗಿದೆ. ಆದರೀಗ ಹಲ್ಲಿಗೆ ಸಂಬಂಧಿಸಿದ ಸಮಸ್ಯೆಗಳು ಸೇರಿದಂತೆ ಬಾಯಿಗೆ ಬರುವ ರೋಗಗಳೂ ಜೀನ್​ ಕಾರಣದಿಂದ ಬರುತ್ತವೆ ಎಂದು ಸಂಶೋಧನೆಯೊಂದು ಹೇಳಿದೆ.

ಒಳ್ಳೆಯ ಮತ್ತು ಕೆಟ್ಟ ಬ್ಯಾಕ್ಟೀರಿಯಾಗಳು : ಬಾಯಿಯ ಕುರಿತು ಮತ್ತೊಂದು ಸಂಶೋಧನೆ ನಡೆದಿದೆ. ಆ ಸಂಶೋಧನೆ ಹೇಳುವಂತೆ ನಾವು ಬಾಯಿಯನ್ನು ಸ್ವಚ್ಛವಾಗಿ ಇಟ್ಟುಕೊಳ್ಳದಿದ್ದರೆ, ಬಾಯಿಯೊಳಗೆ ಗಮ್-ಡಿಸೀಸ್ ಬ್ಯಾಕ್ಟೀರಿಯಾ ಉತ್ಪಾದನೆಯಾಗುತ್ತದೆ ಇದು ಹಲ್ಲುಗಳನ್ನು ಕೊಳೆಯುವಂತೆ ಮಾಡುತ್ತದೆ. ಗಮ್ ಡಿಸೀಸ್ ಬ್ಯಾಕ್ಟೀರಿಯಾ ನಮ್ಮ ಬಾಯಿಗೆ ಅತ್ಯಂತ ಕೆಟ್ಟದು. ನಮ್ಮ ಬಾಯಿಯೊಳಗೆ ಒಳ್ಳೆಯ ಬ್ಯಾಕ್ಟೀರಿಯಾ ಕೂಡ ಇರುತ್ತದೆ.

ಚೈನೀಸ್ ಅಕಾಡೆಮಿ ಆಫ್ ಸೈನ್ಸಸ್ ಪ್ರಕಾರ, 24 ಗಂಟೆಯಿಂದ 72 ಗಂಟೆಗಳವರೆಗೆ ನಾವು ಬಾಯಿಯ ನೈರ್ಮಲ್ಯದ ಕಡೆಗೆ ಗಮನ ನೀಡದಿದ್ದರೆ, ಒಳ್ಳೆಯ ಬ್ಯಾಕ್ಟೀರಿಯಾಗಳ ಸಂಖ್ಯೆ ಕಡಿಮೆಯಾಗುತ್ತದೆ. ಒಳ್ಳೆಯ ಬ್ಯಾಕ್ಟೀರಿಯಾಗಳ ಸಂಖ್ಯೆ ಕಡಿಮೆಯಾಗುವ ಕಾರಣದಿಂದ ಬಾಯಿಯ ಆರೋಗ್ಯ ಅಥವಾ ಹಲ್ಲುಗಳ ಆರೋಗ್ಯ ಹಾಳಾಗುತ್ತದೆ.

ಪೆರಿಯೊಡಾಂಟಿಟಿಸ್ ಎಂಬ ಹೆಸರಿನ ರೋಗವೊಂದಿದೆ. ಇದೂ ಗಮ್ ಡಿಸೀಸ್ ಬ್ಯಾಕ್ಟೀರಿಯಾದಿಂದ ಉಂಟಾಗುತ್ತದೆ. ಈ ರೋಗ ಬಂದರೆ ಹಲ್ಲುಗಳಿಗೆ ಸಾಕಷ್ಟು ಹಾನಿಯಾಗುತ್ತದೆ. ಆದರೆ, ಈ ರೀತಿಯ ರೋಗವನ್ನು ತಡೆಯಬಹುದು. ಹಲ್ಲುಗಳ ನೈರ್ಮಲ್ಯ ಮತ್ತು ಆರೋಗ್ಯಕರ ಆಹಾರದ ಮೂಲಕ ಇದನ್ನು ತಡೆಯಬಹುದಾಗಿದೆ.

ವಸಡುಗಳಲ್ಲಿ ಉರಿ, ನೋವು ಕಾಣಿಸಲು ಕಾರಣವಾಗುವ ರೋಗವೊಂದಿದೆ. ಅದನ್ನು ಜಿಗ್ನಿವೈಟೀಸ್ ಎಂದು ಕರೆಯಲಾಗುತ್ತದೆ. ಇದೂ ಗಮ್ ಡಿಸೀಸ್ ಬ್ಯಾಕ್ಟೀರಿಯಾದಿಂದ ಉಂಟಾಗುವ ರೋಗವಾಗಿದೆ. ವಂಶವಾಹಿಗಳ ಮೂಲಕ ಒಂದು ತಲೆಮಾರಿನಿಂದ ಮತ್ತೊಂದು ತಲೆಮಾರಿಗೂ ವರ್ಗಾವಣೆಯಾಗುವ ಸಾಧ್ಯತೆ ಇದೆ ಎಂದು ಮೈ ಡೆಂಟಲ್ ​ಪ್ಲ್ಯಾನ್ ಹೆಲ್ತ್​ಕೇರ್​ನ ದಂತ ತಜ್ಞ ಮತ್ತು ಸಹಸಂಸ್ಥಾಪಕ ಡಾ. ಮೊಹೆಂದರ್ ನರುಲಾ ಹೇಳುವ ಮಾತು.

ಇದನ್ನೂ ಓದಿ: Work From Home.. ಮನೆಯಿಂದಲೇ ಕೆಲಸ ಮಾಡಿ ಸುಸ್ತಾದವರಿಗೆ ಹೆಲ್ತ್​ ಟಿಪ್ಸ್​

ಕನಿಷ್ಠ ಎರಡು ನಿಮಿಷಗಳ ಕಾಲ ದಿನಕ್ಕೆ ಎರಡು ಬಾರಿ ಹಲ್ಲುಜ್ಜುವುದರ ಜೊತೆಗೆ, ಬಾಯಿಯೊಳಗೆ ನೀರಿನಾಂಶವನ್ನು ನೋಡಿಕೊಳ್ಳಬೇಕು. ಇದು ಹಲ್ಲು ಮತ್ತು ದೇಹದ ಆರೋಗ್ಯಕ್ಕೂ ಉತ್ತಮ. ಎರಡು ವರ್ಷಕ್ಕೊಮ್ಮೆ ದಂತವೈದ್ಯರನ್ನು ಭೇಟಿ ಮಾಡುವುದು ಅತ್ಯಗತ್ಯ ಎಂದು ನರುಲಾ ಹೇಳಿದ್ದಾರೆ.

ಬಾಯಿಯ ಆರೋಗ್ಯದ ಮೇಲೆ ಪರಿಣಾಮ ಬೀರುವ ಇತರ ವಿಷಯಗಳು

1. ಹಲ್ಲುಗಳನ್ನು ಸ್ವಚ್ಛಗೊಳಿಸಲು ಟೂತ್​ಪಿಕ್ ಬಳಕೆ : ಹಲ್ಲುಗಳನ್ನು ಸ್ವಚ್ಛಗೊಳಿಸಲು ಅಥವಾ ಹಲ್ಲುಗಳಲ್ಲಿ ಸಿಲುಕಿರುವ ಆಹಾರವನ್ನು ತೆಗೆಯಲು ಜನರು ಸಾಮಾನ್ಯವಾಗಿ ಟೂತ್​ಪಿಕ್​ಗಳನ್ನು ಅಥವಾ ಮೊನಚಾದ ವಸ್ತುಗಳನ್ನು ಬಳಸುತ್ತಾರೆ.. ಇದು ತಪ್ಪು ಎಂದು ಪುಣೆ ಮೂಲದ ಆರ್ಥೊಡಾಂಟಿಸ್ಟ್ ಡಾ.ವಿಶಾಖ ನಾಯಕ್ ಹೇಳಿದ್ದಾರೆ. ಟೂತ್​ಪಿಕ್ ಬಳಸುವುದರಿಂದ ಹಲ್ಲು ಮತ್ತು ವಸಡುಗಳಲ್ಲಿ ಹಲವು ಸಮಸ್ಯೆಗಳು ಉಂಟಾಗಬಹುದು ಎಂದು ವಿಶಾಖ ಅವರ ಅಭಿಪ್ರಾಯ.

2. ಬಾಯಿ ತೆರೆದು ನಿದ್ರಿಸುವುದು : ಕೆಲವರಿಗೆ ಬಾಯಿ ತೆರೆದು ನಿದ್ರಿಸುವ ಅಭ್ಯಾಸವಿರುತ್ತದೆ. ಬಾಯಿ ತೆರೆದು ಮಲಗುವ ಅಭ್ಯಾಸವು ಹಲವಾರು ಸೋಂಕುಗಳಿಗೆ ಕಾರಣವಾಗಬಹುದು. ಬಾಯಿ ತೆರೆದು ಮಲಗುವುದಿಂದ ಬಾಯಿ ಒಣಗುತ್ತದೆ. ಇದರಿಂದ ಬಾಯಿಯಲ್ಲಿರುವ ಒಳ್ಳೆಯ ಬ್ಯಾಕ್ಟಿರೀಯಾಗಳು ಸಾಯುತ್ತವೆ. ಇದರಿಂದ ಬಾಯಿಸೋಂಕು ಜೊತೆಗೆ ಗಂಟಲು ಸೋಂಕು ಕೂಡ ಬರುವ ಸಾಧ್ಯತೆ ಇರುತ್ತದೆ.

3. ಸರಿಯಾಗಿ ಹಲ್ಲುಜ್ಜದಿರುವುದು : ಹಲ್ಲುಗಳನ್ನು ಸರಿಯಾಗಿ ಉಜ್ಜದೇ ಇದ್ದರೆ, ಕಾರ್ಬೋಹೈಡ್ರೇಟ್ ಬ್ಯಾಕ್ಟೀರಿಯಾದ ಶೇಖರಣೆಯಾಗುತ್ತದೆ. ಇದು ಹಲ್ಲುಗಳಲ್ಲಿ ಸ್ಟ್ರೆಪ್ಟೋಕೊಕಸ್ ಮ್ಯೂಟಾನ್ಸ್ ಎಂಬ ಆಮ್ಲವನ್ನು ಉತ್ಪಾದಿಸಲು ಪ್ರಾರಂಭಿಸುತ್ತದೆ. ಈ ಆಮ್ಲ ದಂತ ಕವಚಕ್ಕೆ ಹಾನಿಯನ್ನುಂಟು ಮಾಡುತ್ತದೆ. ವಸಡುಗಳು ಮತ್ತು ಹಲ್ಲುಗಳು ದುರ್ಬಲಗೊಳ್ಳುತ್ತವೆ.

4. ದೀರ್ಘಕಾಲದವರೆಗೆ ಒಂದೇ ಬ್ರಷ್ ಬಳಕೆ: ಹೆಚ್ಚಿನ ಜನರು ಬ್ರಷ್ ಹಾಳಾಗಿದ್ದರೂ ಸಹ ಅದೇ ಟೂತ್ ಬ್ರಷ್ ಅನ್ನು ತಿಂಗಳುಗಳವರೆಗೆ ಬಳಸುವ ಅಭ್ಯಾಸವನ್ನು ಹೊಂದಿರುತ್ತಾರೆ. ಹಳೆಯ ಬ್ರಷ್ ಅನ್ನು ಬಳಸುವುದರಿಂದ ನಿಮ್ಮ ಹಲ್ಲು ಮತ್ತು ವಸಡುಗಳಿಗೆ ಹಾನಿಯಾಗಬಹುದು ಮತ್ತು ಬಾಯಿಯಲ್ಲಿ ಬ್ಯಾಕ್ಟೀರಿಯಾದ ಬೆಳವಣಿಗೆಗೆ ಕಾರಣವಾಗಬಹುದು ಎಂದು ಡಾ.ವಿಶಾಖ ಹೇಳಿದ್ದು, ಪ್ರತಿ ಮೂರು ತಿಂಗಳಿಗೊಮ್ಮೆ ಹಲ್ಲುಜ್ಜುವ ಬ್ರಷ್ ಅನ್ನು ಬದಲಾಯಿಸಬೇಕು ಎಂದು ಸಲಹೆ ನೀಡಿದ್ದಾರೆ.