ಆರಾಮದಾಯಕ ನಿದ್ರೆಗಾಗಿ ಇಲ್ಲಿವೆ ಟಿಪ್ಸ್: ಈ ಆಹಾರ ಪದ್ಧತಿ ಅಳವಡಿಸಿ..!

ಸುಖಕರವಾದ ಜೀವನ ನಿಮ್ಮದಾಗಬೇಕಾದರೆ ಆರೋಗ್ಯಕರ ನಿದ್ದೆ ನಿಮ್ಮದಾಗಿರಬೇಕು. ಒಳ್ಳೆಯ ಆರೋಗ್ಯಕರ ನಿದ್ರೆಯ ಅಭ್ಯಾಸದಿಂದ ಮನುಷ್ಯನ ದೇಹಕ್ಕೆ ಸಂಬಂಧ ಪಟ್ಟ ಅನೇಕ ಆರೋಗ್ಯ ಸಮಸ್ಯೆಗಳು ದೂರವಾಗುತ್ತವೆ. ಆದರೆ ಒಳ್ಳೆಯ ನಿದ್ರೆ ತಂದು ಕೊಡಲು ಹಲವಾರು ಅಂಶಗಳು ಗಣನೆಗೆ ಬರುತ್ತವೆ. ಉತ್ತಮ ಜೀವನ ಶೈಲಿ, ಒಳ್ಳೆಯ ಆಹಾರ ಶೈಲಿ ಹೀಗೆ ಹತ್ತು ಹಲವಾರು ಸಂಗತಿಗಳು ಮನುಷ್ಯನ ನಿದ್ರೆಯ ವಿಷಯಕ್ಕೆ ಸಂಬಂಧ ಪಟ್ಟಿರುತ್ತವೆ.

ಮನುಷ್ಯನಿಗೆ ಒಳ್ಳೆಯ ನಿದ್ರೆ ತಂದು ಕೊಡುವ ಈ ಆಹಾರಗಳನ್ನು ನೀವು ಆದಷ್ಟು ನಿಮ್ಮ ಜೀವನದಲ್ಲಿ ನಿದ್ರೆ ಮಾಡುವ ಮುಂಚೆ ಸೇವಿಸುವ ಅಭ್ಯಾಸ ಮಾಡಿಕೊಂಡು ಬಂದರೆ, ದಿನ ಕಳೆದಂತೆ ನಿಮ್ಮ ನಿದ್ರಾಹೀನತೆಯ ಸಮಸ್ಯೆ ದೂರಾಗಿ ಒಂದು ವೇಳೆ ಮಾನಸಿಕ ಒತ್ತಡ ಅಥವಾ ಖಿನ್ನತೆಯಿಂದ ಬಳಲುತ್ತಿದ್ದರೆ ಬಹಳ ಬೇಗನೆ ನಿಮಗೆ ಇದಕ್ಕೆ ಪರಿಹಾರ ಸಿಕ್ಕಂತಾಗುವುದು.

ಚಹಾ, ಕಾಫಿ ಅಥವಾ ಆಲ್ಕೋಹಾಲ್ ಇವುಗಳನ್ನು ನೀವು ನಿದ್ರೆ ಮಾಡುವ ಮುಂಚೆ ಸೇವಿಸಿದ್ರೆ, ಇದರಿಂದ ನಿಮ್ಮ ನಿದ್ರೆಗೆ ತೊಂದರೆಯಾಗುತ್ತದೆ. ಹಾಗಾಗಿ ಉತ್ತಮ ನಿದ್ರೆ ಮಾಡಲು ನಿಮಗೆ ಸಹಾಯ ಮಾಡುವ ಕೆಲವು ಆಹಾರ ಮತ್ತು ಪಾನೀಯಗಳ ಬಗ್ಗೆ ನಿಮಗೆ ತಿಳಿದಿರಬೇಕು. ರಾತ್ರಿ ಹೊತ್ತು ಚೆನ್ನಾಗಿ ನಿದ್ರೆ ಮಾಡಲು ಮತ್ತು ಶಾಂತ ಮನಸ್ಸಿನಿಂದ ಎಚ್ಚರಗೊಳ್ಳಲು ಈ ಕೆಳಗಿನ ಆಹಾರ ಪದ್ಧತಿಯನ್ನು ನೀವು ಅನುಸರಿಸಬಹುದಾಗಿದೆ.

ಬೆಚ್ಚಗಿನ ಹಾಲನ್ನು ಸೇವಿಸಿ:

ಮಲಗುವ ಮೊದಲು ಒಂದು ಲೋಟ ಬೆಚ್ಚಗಿನ ಹಾಲನ್ನು ಸೇವಿಸಿ. ಇದರ ಹಿಂದಿನ ನಿಜವಾದ ಕಾರಣವೆಂದರೆ ಹಾಲಿನಲ್ಲಿ ಟ್ರಿಪ್ಟೊಫಾನ್​​, ಕ್ಯಾಲ್ಸಿಯಂ, ಮೆಲಟೋನಿನ್ ಮತ್ತು ವಿಟಮಿನ್ ಡಿ ಇವೆ. ಈ ನಾಲ್ಕು ಅಂಶಗಳು ನಿದ್ರೆಯನ್ನು ಹೆಚ್ಚಿಸುತ್ತವೆ. ಸ್ವಲ್ಪ ಪರಿಮಳ ಮತ್ತು ಹೆಚ್ಚುವರಿ ಆರೋಗ್ಯ ಪ್ರಯೋಜನಗಳಿಗಾಗಿ, ನೀವು ಇದಕ್ಕೆ ಅರಿಶಿನವನ್ನು ಕೂಡ ಸೇರಿಸಬಹುದು.

ಕಿವಿ ಹಣ್ಣು

ಪೌಷ್ಟಿಕಾಂಶಯುಕ್ತ ಕಾಳುಗಳನ್ನು ಸೇವಿಸಿ:

ಎಲ್ಲ ರೀತಿಯ ಕಾಲಗಳು ಮೆಲಟೋನಿನ್ ಜೊತೆಗೆ ಮೆಗ್ನೀಸಿಯಮ್, ಟ್ರಿಪ್ಟೊಫಾನ್ ಮುಂತಾದ ಖನಿಜಗಳನ್ನು ಒಳಗೊಂಡಿರುತ್ತವೆ. ನಿದ್ರಾಹೀನತೆಯನ್ನು ಕೊನೆಗೊಳಿಸಲು ಇವು ಹೆಚ್ಚು ಸಹಾಯ ಮಾಡುತ್ತವೆ ಎಂದು ಕೆಲವು ಅಧ್ಯಯನಗಳು ತೋರಿಸಿವೆ.

ಕ್ಯಾಮೊಮೈಲ್ ಟೀ:

ಕ್ಯಾಮೊಮೈಲ್ ಒಂದು ಗಿಡಮೂಲಿಕೆಗೆ ಸಂಬಂಧ ಪಟ್ಟ ಆಹಾರ ಪದಾರ್ಥ ಆಗಿದ್ದು, ವಿಶ್ವದಾದ್ಯಂತ ಹಲವಾರು ಜನರು ನಮ್ಮ ಮನೆಯ ಸದಸ್ಯರ ಆರೋಗ್ಯದ ಹಿತ ದೃಷ್ಟಿಯಿಂದ ಇದನ್ನು ಸೇವಿಸುತ್ತಾರೆ. ತಮ್ಮ ಹೊಟ್ಟೆಯ ಸಮಸ್ಯೆಗಳನ್ನು ಜೊತೆಗೆ ತಮ್ಮ ಮನಸ್ಸಿನ ಆತಂಕವನ್ನು ನಿವಾರಣೆ ಮಾಡಿಕೊಳ್ಳಲು ಬಹಳಷ್ಟು ವರ್ಷಗಳ ಕಾಲ ಜನರು ಕ್ಯಾಮೊಮೈಲ್ ಚಹಾವನ್ನು ರೂಢಿ ಮಾಡಿಕೊಂಡಿದ್ದ ಉದಾಹರಣೆಗಳಿವೆ. ನಿದ್ರೆಯ ವಿಷಯಕ್ಕೆ ಬಂದಾಗ ಮನುಷ್ಯನ ಮನಸ್ಸಿನ ದುಗುಡ, ದುಮ್ಮಾನ, ಒತ್ತಡ ಮತ್ತು ಆತಂಕವನ್ನು ಕ್ಷಣ ಮಾತ್ರದಲ್ಲಿ ದೂರ ಮಾಡಿ ಮನಸ್ಸಿಗೆ ನೆಮ್ಮದಿ ಮತ್ತು ಶಾಂತಿ ಕೊಟ್ಟು ಒಳ್ಳೆಯ ನಿದ್ರೆ ಬರುವಂತೆ ಮಾಡುವ ಕೆಲಸ ಕ್ಯಾಮೊಮೈಲ್ ಚಹಾ ಮಾಡುತ್ತದೆ.

ಕಿವಿ ಹಣ್ಣು:

ಕಿವಿ ಹಣ್ಣು ವಿಟಮಿನ್ ಸಿಯನ್ನು ಹೊಂದಿದ್ದು, ಕಡಿಮೆ ಕ್ಯಾಲೋರಿ ಮತ್ತು ಹೆಚ್ಚಿನ ಪೋಷಕಾಂಶಗಳನ್ನು ಹೊಂದಿದೆ. ಅವುಗಳಲ್ಲಿ ಆ್ಯಂಟಿಆಕ್ಸಿಡೆಂಟ್‌ಗಳು, ಮೆಲಟೋನಿನ್, ಫೋಲೇಟ್, ಮೆಗ್ನೀಸಿಯಮ್ ಇತ್ಯಾದಿಗಳನ್ನು ಒಳಗೊಂಡಿರುತ್ತದೆ. ಇವೆಲ್ಲವೂ ನಿದ್ರೆಯನ್ನು ಉತ್ತೇಜಿಸಲು ಸಹಾಯ ಮಾಡುತ್ತದೆ.

ಟರ್ಕಿ ಪಕ್ಷಿಯ ಮಾಂಸ:

ಟರ್ಕಿ ಪಕ್ಷಿಯ ಮಾಂಸವನ್ನು ಸೇವಿಸಿದ ಬಳಿಕ ಜನರು ಉತ್ತಮ ನಿದ್ರೆಯನ್ನು ಪಡೆಯುತ್ತಾರೆ. ಏಕೆಂದರೆ ಇದರಲ್ಲಿ ಪ್ರೋಟೀನ್ ಮತ್ತು ಟ್ರಿಪ್ಟೊಫಾನ್ ಹೆಚ್ಚಿರುತ್ತದೆ. ಇದು ದಣಿವನ್ನು ನಿವಾರಿಸುತ್ತದೆ ಮತ್ತು ಇದರ ಪರಿಣಾಮವಾಗಿ ನೀವು ಉತ್ತಮವಾಗಿ ನಿದ್ರೆ ಮಾಡಲು ಸಹಾಯವಾಗುತ್ತದೆ.

ಕೊಬ್ಬಿನ ಮೀನು:

ವಿಟಮಿನ್ ಡಿ ಮತ್ತು ಒಮೆಗಾ -3 ಕೊಬ್ಬಿನಾಮ್ಲಗಳ ಉತ್ತಮ ಮೂಲವಾಗಿರುವುದರಿಂದ, ಸಾಲ್ಮನ್, ಟ್ಯೂನ, ಮ್ಯಾಕೆರೆಲ್ ಮುಂತಾದ ಕೊಬ್ಬಿನ ಮೀನುಗಳು ಸಿರೊಟೋನಿನ್ ಅನ್ನು ನಿಯಂತ್ರಿಸಲು ಸಹಾಯ ಮಾಡುತ್ತವೆ. ಇದು ನಿದ್ರೆಯ ಗುಣಮಟ್ಟ ಮತ್ತು ನಿದ್ರೆಯ ಚಕ್ರವನ್ನು ಸುಧಾರಿಸಲು ಸಹಾಯ ಮಾಡುತ್ತದೆ.

ಇತರ ಸಲಹೆಗಳು:

ಮಲಗುವ ಮುನ್ನ ಟಿವಿ ಮತ್ತು ಮೊಬೈಲ್​ ನೋಡುವುದನ್ನು ತಪ್ಪಿಸಿ.

ಕೆಫೀನ್ ಇರುವ ಯಾವುದೇ ರೀತಿಯ ಆಹಾರ ಅಥವಾ ಪಾನೀಯಗಳನ್ನು ಸೇವಿಸಬೇಡಿ.

ವಿಶೇಷವಾಗಿ ಮಲಗುವ ಮುನ್ನ ಧೂಮಪಾನವನ್ನು ತಪ್ಪಿಸಿ.

ಹೆಚ್ಚು ಭಾರವಾದ, ತುಂಬಾ ಮಸಾಲೆಯುಕ್ತ ಮತ್ತು ತುಂಬಾ ಸಕ್ಕರೆ ಆಹಾರವನ್ನು ಸೇವಿಸಬೇಡಿ.

ಹೆಚ್ಚು ನೀರು ಕುಡಿಯಿರಿ.

ನಿದ್ದೆ ಮಾಡುವ 2-3 ಗಂಟೆಗಳ ಮೊದಲೇ ಊಟ ಮಾಡಿ.

ನಿಮ್ಮ ಮನಸ್ಸನ್ನು ಶಾಂತವಾಗಿಡಲು ಧ್ಯಾನ ಮಾಡಿ

ಹಗಲಿನ ಸಮಯದಲ್ಲಿ ನಿದ್ದೆ ಮಾಡುವುದನ್ನು ತಪ್ಪಿಸಿ.ಮಾಡಲೇಬೇಕು ಎಂದರೆ 15-20 ನಿಮಿಷಗಳ ತ್ವರಿತ ಕಿರು ನಿದ್ರೆ ಮಾಡಿ.

ಆರೋಗ್ಯಕರ ದೇಹ ಮತ್ತು ಶಾಂತ ಮನಸ್ಸು ನಿಮಗೆ ಉತ್ತಮವಾಗಿ ಮಲಗಲು ಸಹಾಯ ಮಾಡುತ್ತದೆ, ನಿಮ್ಮ ನಿದ್ರೆಯ ಚಕ್ರವನ್ನು ಸುಧಾರಿಸುತ್ತದೆ ಮತ್ತು ನಿದ್ರೆಯ ಗುಣಮಟ್ಟವನ್ನು ನೀಡುತ್ತದೆ. ಮಧ್ಯರಾತ್ರಿಯಲ್ಲಿ ಹಾಸಿಗೆಯಲ್ಲಿ ತಿರುಗುವುದನ್ನು ತಪ್ಪಿಸಲು ಆರೋಗ್ಯಕರ ಆಹಾರ ಪದ್ಧತಿ ಮತ್ತು ಸರಿಯಾದ ಜೀವನಶೈಲಿಯನ್ನು ಕಾಪಾಡಿಕೊಳ್ಳಿ.