ಸುರಪುರ : ಯಾದಗಿರಿ ಜಿಲ್ಲೆಯಾದ್ಯಂತ ಸುರಿದ ಭಾರಿ ಮಳೆಗೆ ಅನೇಕ ಅನಾಹುತಗಳು ಸಂಭವಿಸಿ ಅಪಾರ ಪ್ರಮಾಣದ ಹಾನಿ ಉಂಟಾಗಿದೆ.
ನಗರಸಭೆಯ ಛಾವಣಿ ಕುಸಿತ! : ಬಿರುಗಾಳಿ ಸಹಿತ ಸುರಿದ ಮಳೆಗೆ ಯಾದಗಿರಿ ನಗರಸಭೆಯ ಮೇಲ್ಛಾವಣಿ ಕುಸಿದು ಕಾರ್ಯಾಲಯದಲ್ಲಿದ್ದ ಕುರ್ಚಿ, ಟೇಬಲ್ ಸೇರಿದಂತೆ ಅನೇಕ ವಸ್ತುಗಳು ಜಖಂಗೊಂಡಿವೆ.
ನೀರು ಪಾಲಾಯ್ತು ಶೇಂಗಾ! : ಯಾದಗಿರಿ ನಗರದ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಯಲ್ಲಿ ಮಾರಾಟ ಮಾಡಲೆಂದು ತಂದಿದ್ದ ರೈತರ ಸಾವಿರಾರು ಕ್ವಿಂಟಾಲ್ ಶೇಂಗಾ ಮಳೆಯಿಂದಾಗಿ ನೀರಲ್ಲಿ ಕೊಚ್ಚಿ ಹೋಗಿದ್ದು, ರೈತರಿಗೆ ಭಾರಿ ನಷ್ಟವಾಗಿದೆ.
ಓದಿ : ಕೋಸ್ಟಲ್ ಬರ್ತ್ ಯೋಜನೆ ಕಾಮಗಾರಿ ವಿರೋಧಿಸಿ ಬೆಂಗರೆ ಬಂದ್ ಬಹುತೇಕ ಯಶಸ್ವಿ..
ಸಿಡಿಲಿಗೆ ವ್ಯಕ್ತಿ ಬಲಿ! : ಯಾದಗಿರಿಯ ಬಸ್ ನಿಲ್ದಾಣದ ಬಳಿ ಗೋಡೆ ಕುಸಿದು ಹಲವು ಬೈಕ್‌ಗಳು ಗೋಡೆಯ ಅಡಿ ಸಿಲುಕಿ ಜಖಂಗೊಂಡಿವೆ. ಅಲ್ಲದೆ ವ್ಯಾಪಾರಿಗಳ ಹಣ್ಣು-ತರಕಾರಿ ಸಂಪೂರ್ಣ ಹಾಳಾಗಿವೆ. ಅಲ್ಲಿಪುರ ಗ್ರಾಮದಲ್ಲಿ ಸಿಡಿಲು ಬಡಿದು ಓರ್ವ ವ್ಯಕ್ತಿ ಮೃತಪಟ್ಟಿದ್ದಾನೆ.
ಮರಗಳು ಉರುಳಿ ಅವಾಂತರ! : ಯಾದಗಿರಿ-ಶಹಪುರ ಹೆದ್ದಾರಿಯಲ್ಲಿ ಮರಗಳು ಉರುಳಿ ಬಿದ್ದ ಪರಿಣಾಮ ಎರಡು ಗಂಟೆಗಳಿಗೂ ಹೆಚ್ಚು ಕಾಲ ರಸ್ತೆ ಸಂಚಾರ ಬಂದ್ ಆಗಿತ್ತು. ಇದರಿಂದ ಸಾವಿರಾರು ಸಂಖ್ಯೆಯಲ್ಲಿ ವಾಹನಗಳು ಸಾಲುಗಟ್ಟಿ ನಿಂತು ವಾಹನ ಸವಾರರು ಪರದಾಡುವಂತಾಯಿತು.
