ವಿಜಯಪುರ: ರೈತರು ಸರಳವಾಗಿ ವ್ಯವಹರಿಸಲು ಹಾಗೂ ಸಮಯ ಉಳಿಸಲು ವಿಜಯಪುರ ಡಿಸಿಸಿ ಬ್ಯಾಂಕ್ನಿಂದ 37 ಶಾಖೆಗಳಲ್ಲಿ ಮೈಕ್ರೋ ಎಟಿಎಂ ಸೌಲಭ್ಯ ಕಲ್ಪಿಸಲಾಗುತ್ತಿದೆ ಎಂದು ಶಾಸಕ ಹಾಗೂ ಡಿಸಿಸಿ ಬ್ಯಾಂಕ್ ಅಧ್ಯಕ್ಷ ಶಿವಾನಂದ ಪಾಟೀಲ ತಿಳಿಸಿದರು.
ನಗರದ ಡಿಸಿಸಿ ಬ್ಯಾಂಕ್‌ನಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ಜಿಲ್ಲೆಯ 1,56,680 ರೈತರಿಗೆ ಕ್ರೆಡಿಟ್ ಕಾರ್ಡ್ ವಿತರಿಸಲಾಗುತ್ತಿದೆ. ಜೊತೆಗೆ 5 ಲೀಪ್‌ನ ಚೆಕ್ ಬುಕ್ ಕೊಡಲಾಗುತ್ತಿದ್ದು, ರೈತರ ಅಲ್ಪಾವಧಿ ಬೆಳೆ ಸಾಲವನ್ನು ನೇರವಾಗಿ ರೈತರ ಖಾತೆಗೆ ಜಮಾ ಮಾಡಲಾಗುತ್ತದೆ. ಅಲ್ಲದೇ ಕ್ರೆಡಿಟ್ ಕಾರ್ಡ್ ಪಡೆದ ರೈತರಿಗೆ ಪಿನ್ ಕೋಡ್ ನೀಡಲಾಗುವುದು ಎಂದರು. ಬೆಳೆ ಸಾಲದ ಹಣ ಪಡೆಯಲು ದಿನವಿಡೀ ಸಮಯ ಕಳೆಯಬೇಕಾಗಿದ್ದ ರೈತರು ಈಗ ಮೈಕ್ರೋ ಎಟಿಎಂ ಬಳಸಿ ಬೆಳ ಸಾಲವನ್ನು ನೇರವಾಗಿ ಪಡೆಯಲು ಸಹಾಯಕವಾಗಿದೆ. ಹಾಗೂ ಈ ವ್ಯವಸ್ಥೆಯನ್ನು ಜಾರಿಗೆ ತಂದ ಕೀರ್ತಿ ವಿಜಯಪುರ ಡಿಸಿಸಿ ಬ್ಯಾಂಕ್ಗೆ ಸಲ್ಲುತ್ತದೆ ಎಂದು ಶಿವಾನಂದ ಪಾಟೀಲ ಹೇಳಿದರು.
ಬ್ಯಾಂಕ್‌‌ನ ವ್ಯವಸ್ಥಾಪಕ ನಿರ್ದೇಶಕ ಎಂ.ಜಿ.ಪಾಟೀಲ ಮಾತನಾಡಿ, ರಾಜ್ಯದಲ್ಲಿ ಅತಿ ಹೆಚ್ಚು ರೈತರಿಗೆ ಅಲ್ಪಾವಧಿ ಬೆಳೆ ಸಾಲ ನೀಡಿದ ಡಿಸಿಸಿ ಬ್ಯಾಂಕ್‌ಗಳ ಪೈಕಿ ನಮ್ಮ ಬ್ಯಾಂಕ್ 3ನೇ ಸ್ಥಾನ ಪಡೆದಿದೆ. ಒಟ್ಟು 37 ಶಾಖೆಗಳ ಪೈಕಿ 1,86,000 ರೈತರಿಗೆ 900 ಕೋಟಿ ಅಲ್ಪಾವಧಿ ಬೆಳೆ ಸಾಲ ನೀಡಲಾಗಿದೆ ಎಂದು ತಿಳಿಸಿದರು.
ಡಿಸಿಸಿ ಬ್ಯಾಂಕ್ ಸಿಇಒ ರಾಜಣ್ಣ ಮಾತನಾಡಿ, ರೈತರ ಬೆಳೆ ಸಾಲ ರೈತರ ಖಾತೆಗಳಿಗೆ ಜಮಾ ಮಾಡಲಾಗಿದೆ. ರೈತರು ಮೈಕ್ರೋ ಎಟಿಎಂ ಅಥವಾ ಚೆಕ್ ಬಳಸಿ ಹಣ ಪಡೆಯಲು ಅನುಕೂಲವಾಗಿದೆ. ಇದರಿಂದ ಬ್ಯಾಂಕ್ಗಳಲ್ಲಿ ರೈತರ ಅಲೆದಾಟ ಕಡಿಮೆಯಾಗುತ್ತದೆ, ಸಮಯ ಉಳಿಯುತ್ತದೆ. ರೈತರಿಗೆ ಆಗುವ ಮೋಸಗಳನ್ನು ತಡೆಗಟ್ಟಲು ಸಹಕಾರಿಯಾಗಿದೆ ಎಂದು ಹೇಳಿದರು.
