ಮುದ್ದೇಬಿಹಾಳ: ದಿನದಿಂದ ದಿನಕ್ಕೆ ಗ್ರಾಮ ಪಂಚಾಯಿತಿ ಪ್ರಚಾರದ ಭರಾಟೆ ಜೋರಾಗಿದೆ. ತಾಳಿಕೋಟೆ ತಾಲೂಕಿನ ಕೊಡಗಾನೂರ ಗ್ರಾ.ಪಂ. ವ್ಯಾಪ್ತಿಯ ಲಕ್ಕುಂಡಿ ಗ್ರಾಮದಲ್ಲಿ ಅತ್ತೆಗೆ ಸೊಸೆಯೇ ಸವಾಲು ಹಾಕಿದ್ದಾಳೆ.
ಲಕ್ಕುಂಡಿ ಗ್ರಾಮದ ವಾರ್ಡ್ ಸಂಖ್ಯೆ 6ರಲ್ಲಿ ಗಂಗಮ್ಮ ಪಾಟೀಲ್ ಅತ್ತೆ ಸ್ಪರ್ಧಿಸಿದ್ದರೆ, ಅದೇ ವಾರ್ಡ್ನಲ್ಲಿ ಸೊಸೆ ನಿರ್ಮಲಾ ಬಸನಗೌಡ ಪಾಟೀಲ್ ಕಣದಲ್ಲಿದ್ದಾರೆ. ಇಬ್ಬರೂ ಗೆಲುವಿನ ವಿಶ್ವಾಸ ಹೊಂದಿದ್ದಾರೆ.
ಪ್ರತ್ಯೇಕವಾಗಿ ಮತಯಾಚನೆ: ಲಕ್ಕುಂಡಿ ಗ್ರಾಮದ ಪ್ರತೀ ಮನೆಗೆ ಭೇಟಿ ಕೊಡುತ್ತಿರುವ ಅತ್ತೆ -ಸೊಸೆ ಪ್ರತ್ಯೇಕವಾಗಿ ಮತಬೇಟೆಯಲ್ಲಿ ತೊಡಗಿದ್ದಾರೆ. ಗ್ರಾಮದಲ್ಲಿ ಅಭಿವೃದ್ಧಿ ಕೆಲಸಗಳನ್ನು ಮಾಡಲು ತಮ್ಮನ್ನು ಚುನಾಯಿಸುವಂತೆ ಕೈ ಮುಗಿದು ಮನವೊಲಿಸುತ್ತಿದ್ದಾರೆ.
ಸದ್ಯಕ್ಕೆ ಬೇರೆ ಬೇರೆ ಮನೆಯಲ್ಲಿ ವಾಸಿಸುತ್ತಿರುವ ಅತ್ತೆ-ಸೊಸೆ ಈ ಚುನಾವಣೆಯಲ್ಲಿ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ. ವಿಶೇಷವೆಂದರೆ ನಿರ್ಮಲಾ ಪಾಟೀಲ್ ಕೊಡಗಾನೂರ ಗ್ರಾ.ಪಂ.ನಲ್ಲಿ ಐದು ವರ್ಷ ಅಧ್ಯಕ್ಷರಾಗಿ ಆಡಳಿತ ನಡೆಸಿದ್ದಾರೆ. ಅವರ ಪತಿ ಬಸನಗೌಡ ಅವರು ಕೂಡ ಐದು ವರ್ಷ ಸದಸ್ಯರಾಗಿ ಆಡಳಿತ ನಡೆಸಿದ್ದಾರೆ.
