ವಿಜಯಪುರ: ತೀವ್ರ ಕುತೂಹಲ ಕೆರಳಿಸಿದ್ದ ಜೆಡಿಎಸ್ ಶಾಸಕರ ಸಹೋದರಿಯರ ಗ್ರಾಮ ಪಂಚಾಯಿತಿ ಚುನಾವಣಾ ಸ್ಪರ್ಧೆಯಲ್ಲಿ ತಂಗಿಯು ಅಕ್ಕಳನ್ನು ಸೋಲಿಸುವ ಮೂಲಕ ಜಯದ ನೆಗೆ ಬೀರಿದ್ದಾರೆ.
ದೇವರಹಿಪ್ಪರಗಿ ತಾಲೂಕಿನ ಹಿಟ್ಟಿನಹಳ್ಳಿ ಗ್ರಾಮ ಪಂಚಾಯಿತಿಗೆ ಜೆಡಿಎಸ್ ಶಾಸಕ ದೇವಾನಂದ ಚೌವ್ಹಾಣ್ ಸಹೋದರಿಯಾದ ಅಕ್ಕ ನೀಲಾ ಬಾಯಿ ಅಂಗಡಿ, ತಂಗಿ ಕಸ್ತೂರಿ ಬಾಯಿ ದೊಡಮನಿ ಸ್ಪರ್ಧೆ ಮಾಡಿದ್ದರು.
ತಂಗಿ ಕಸ್ತೂರಿ ಬಾಯಿ ದೊಡಮನಿ 342 ಮತಗಳನ್ನು ಪಡೆದುಕೊಂಡರೆ, ಅಕ್ಕ ನೀಲಾ ಬಾಯಿ ಅಂಗಡಿ 246 ಮತಗಳನ್ನು ಪಡೆದಿದ್ದಾರೆ. ಈ ಮೂಲಕ ತಂಗಿ 96 ಮತಗಳ ಅಂತರದಿಂದ ಗೆಲುವು ಸಾಧಿಸಿದರು.
ಇಬ್ಬರೂ ಜೆಡಿಎಸ್ ಶಾಸಕ ಡಾ. ದೇವಾನಂದ ಎಫ್. ಚೌವ್ಹಾಣ್ ಅಕ್ಕಂದಿರು ಅನ್ನೋದು ಇಲ್ಲಿ ಗಮನಾರ್ಹ ಸಂಗತಿ. ನೀಲಾ ಬಾಯಿ ಅಂಗಡಿ ಮೂರು ಬಾರಿ ಗ್ರಾಮ ಪಂಚಾಯಿತಿ ಸದಸ್ಯೆ, 2 ಬಾರಿ ಅಧ್ಯಕ್ಷೆಯಾಗಿದ್ದರು. ಕಸ್ತೂರಿ ಬಾಯಿ ದೊಡಮನಿ ಒಂದು ಬಾರಿ ಸಿಂದಗಿ ತಾಲೂಕು ಪಂಚಾಯಿತಿ ಉಪಾಧ್ಯಕ್ಷರಾಗಿದ್ದರು. ಈ ಬಾರಿ ತಂಗಿಗೆ ಮತದಾರರು ಜೈ ಎಂದಿದ್ದಾರೆ.
