ಭಟ್ಕಳ (ಉತ್ತರ ಕನ್ನಡ): ಯುವಜನತೆ ಈ ಲಾಕ್ಡೌನ್ ದಿನಗಳಲ್ಲಿ ಸುಮ್ಮನೆ ಕೂರದೆ ಸದುಪಯೋಗಪಡಿಸಿಕೊಂಡಿದೆ. ಕಳೆದ ಕೆಲವು ದಿನಗಳಿಂದ ಮನೆಯಲ್ಲೇ ಇರುವ ಕೆಲವರು ಕೊರೊನಾ ಜಾಗೃತಿ ಗೀತೆ, ಕಿರುಚಿತ್ರಗಳನ್ನು ತಯಾರಿಸಿ ಯೂಟ್ಯೂಬ್ನಲ್ಲಿ ಅಪ್ಲೋಡ್ ಮಾಡುತ್ತಿದ್ದಾರೆ.
ಪ್ರೀತಿಯ ಜೊತೆಗೆ ಸಸ್ಪೆನ್ಸ್, ಥ್ರಿಲ್ಲಿಂಗ್ ಅಂಶಗಳನ್ನು ಸೇರಿಸಿ ಸಂದೇಶವೊಂದನ್ನು ಹೊತ್ತು ಭಟ್ಕಳದ ಪುರವರ್ಗದ ಸುಮಾರು 15 ಮಂದಿ ಯುವಕರು ಕಿರುಚಿತ್ರವೊಂದನ್ನು ತಯಾರಿಸಿದ್ದಾರೆ. ವಿಶೇಷವೆಂದರೆ ಈ ಯುವಕರಲ್ಲಿ ಯಾರೂ, ಯಾವುದೇ ವಿಭಾಗದಲ್ಲಿ ನುರಿತವರಲ್ಲ. ಚಿತ್ರವನ್ನು ರೆಕಾರ್ಡ್ ಮಾಡುವವರಿಂದ ಹಿಡಿದು ಎಡಿಟ್ ಮಾಡಿದವರು ಎಲ್ಲರೂ ಹೊಸಬರೆ. ಈ ತಂಡ 'ಮೋಜಿನ ಬಲೆ' ಎಂಬ ಕಿರುಚಿತ್ರವನ್ನು ತಯಾರಿಸಿದೆ.
ಮೂಢನಂಬಿಕೆ, ಅತಿಯಾಸೆಗಳಿಗೆ ಬಹುತೇಕ ಜನರು ಬಲಿಯಾಗುತ್ತಾರೆ. ಈ ಅಂಶವನ್ನು ಆಧರಿಸಿ ಪ್ರೀತಿಯ ಬಲೆಯಲ್ಲಿರುವ ಯುವಕ ತನ್ನ ಸ್ನೇಹಿತರನ್ನು ದಾರಿ ತಪ್ಪಿಸಿ, ಮೋಜಿನ ಬಲೆಗೆ ಸಿಲುಕಿಸಲು ಯತ್ನಿಸುವುದೇ ಈ ಕಿರುಚಿತ್ರದ ಕಥಾವಸ್ತು. ಪುರವರ್ಗದ ರವಿ ನಾಯ್ಕ ಹಾಗೂ ಮಹೇಶ ನಾಯ್ಕ ಈ ಕಿರುಚಿತ್ರಕ್ಕೆ ಕಥೆ ಬರೆದಿದ್ದಾರೆ. ತಮ್ಮ ಊರಿನ ಯುವಕರ ತಂಡವನ್ನು ಬಳಸಿಕೊಂಡು ರವಿವರ್ಗ ನಿರ್ದೇಶನ ಮಾಡಿದ್ದಾರೆ.
ಲಾಕ್ಡೌನ್ಗೂ ಮೊದಲೇ ಈ ಕಿರುಚಿತ್ರವನ್ನು ರೆಕಾರ್ಡ್ ಮಾಡಲಾಗಿದ್ದು, ಈಗ ಎಡಿಟ್ ಮಾಡಲಾಗಿದೆ. ಹೊಸಬರೇ ಆಗಿರುವುದರಿಂದ ತಪ್ಪುಗಳು ಆಗುವುದು ಸಹಜ. ಆದರೆ ಈ ಯುವತಂಡ ಸಮಾಜಕ್ಕೆ ಒಂದು ಸಂದೇಶ ನೀಡಲು ಬಯಸಿರುವುದರಿಂದ ಇವರನ್ನು ಪ್ರೋತ್ಸಾಹಿಸಬೇಕಿದೆ. ಪುರವರ್ಗದ ಯುವಕರಾದ ರವಿ, ಚೇತನ್, ಮಂಜುನಾಥ, ರಾಜೇಶ, ಮಹೇಶ, ಜಗದೀಶ, ನವೀನ್, ವಾಮನ್, ವಿಜಯ್, ಲೋಕೇಶ, ಪುರುಷೋತ್ತಮ, ಸಂತೋಷ, ನಾಗರಾಜ್, ಮಂಜು ಗೊರಟೆ, ರಾಮ್ ತಲಾಂದ, ರತನ್ ಕಿರುಚಿತ್ರದಲ್ಲಿ ನಟಿಸಿದ್ದಾರೆ. ಕ್ಯಾಮರಾಮ್ಯಾನ್ ಆಗಿ ರತನ್ ಹಾಗೂ ಮಹೇಶ ಕೆಲಸ ನಿರ್ವಹಿಸಿದ್ದಾರೆ.
