ಶಿರಸಿ: ಕನ್ನಡ ಬಾವುಟ ಸುಟ್ಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎಲ್ಲವೂ ಸಾಕ್ಷಿ ಸಹಿತ ಸಿಕ್ಕಿದ್ದು, ತಪ್ಪಿತಸ್ಥರ ವಿರುದ್ಧ ನಿರ್ಧಾಕ್ಷಿಣ್ಯವಾಗಿ ಕ್ರಮ ಕೈಗೊಳ್ಳಲಾವುದು ಎಂದು ಕಾರ್ಮಿಕ ಸಚಿವ ಶಿವರಾಮ್‌ ಹೆಬ್ಬಾರ್ ತಿಳಿಸಿದರು.
ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಎಂಇಎಸ್ ಪುಂಡಾಟಿಕೆ ಸಹಿಸಿಕೊಳ್ಳಲು ಸರ್ಕಾರ ಸಿದ್ದವಿಲ್ಲ. ಈ ಹಿಂದೆ ಬೆಳಗಾವಿಯಲ್ಲಿದ್ದ ಕಾಲ ಈಗ ಬದಲಾವಣೆಯಾಗಿದೆ. ಕರ್ನಾಟಕದಲ್ಲಿ ಎಂಇಎಸ್ ಈಗಾಗಲೇ ನಿರ್ಣಾಮವಾಗಿದೆ. ಹಿಂದೆ 4-5 ಜನ ಎಂಇಎಸ್ ಎಂಎಲ್‌ಎಗಳು, ಬೆಳಗಾವಿ ನಗರ ಪಾಲಿಕೆಗಳಲ್ಲಿ ಸದಸ್ಯರು ಇರುತ್ತಿದ್ದರು. ಈಗ ಎಂಇಎಸ್ ಜನಪ್ರತಿನಿಧಿಗಳು ಒಬ್ಬರೂ ಇಲ್ಲ. ಇವರ ಪುಂಡಾಟಿಕೆಯಿಂದ ಜನರು ಬೇಸತ್ತಿದ್ದಾರೆ. ಇದರಿಂದ ಎಂಇಎಸ್ ತನ್ನ ಎಲ್ಲ ಅಸ್ಥಿತ್ವ ಕಳೆದುಕೊಂಡು ಹತಾಶರಾಗಿ ಇಂತಹ ಪುಂಡಾಟಿಕೆಯ ಕಾರ್ಯದಲ್ಲಿ ತೊಡಗಿದೆ. ಆ ಪುಂಡರನ್ನು ಹದ್ದಬಸ್ತಿಲ್ಲಿಡುವ ಕಾರ್ಯ ಸರ್ಕಾರ ಮಾಡಲಿದೆ ಎಂದರು. ಬೆಳಗಾವಿಯನ್ನು ಕರ್ನಾಟಕದಿಂದ ಬೇರ್ಪಡಿಸುವ ಯಾವ ದುಷ್ಟ ಶಕ್ತಿಗಳಿಗೂ ಅವಕಾಶ ಇಲ್ಲ ಎಂದು ತಿಳಿಸಿದರು.
ರಾಜ್ಯದ ಬುದ್ದಿವಂತ ರಾಜಕಾರಣಿ ಎಂದೆನಿಸಿರುವ ರಮೇಶ್ ಕುಮಾರ್‌ ಬೇಷರತ್ ಆಗಿ ಸದನದಲ್ಲೇ ಕ್ಷಮೆ ಕೇಳಿದ್ದಾರೆ. ಆದರೆ, ಇಂತಹ ಹೇಳಿಕೆ ನೀಡುವುದು ಒರ್ವ ಬುದ್ಧಿವಂತ ರಾಜಕಾರಣಿ ಎನಿಸಿಕೊಳ್ಳವವರಿಗೆ ಶೋಭೆ ತರುವಂತದ್ದಲ್ಲ. ತನ್ನ ಬುದ್ಧಿವಂತಿಗೆ ಪ್ರದರ್ಶನ ಮಾಡಲು ಹೋಗಿ ಇಡೀ ದೇಶವ್ಯಾಪಿ ಮಹಿಳೆಯರನ್ನು ಎದುರು ಹಾಕಿಕೊಳ್ಳುವ ದುಸ್ಥಿತಿ ಬಂದಿದೆ.
ಇದನ್ನೂ ಓದಿರಿ: ನಾನು ಯಾವುದೇ ತಪ್ಪು ಮಾಡಿಲ್ಲ, ರಾಜೀನಾಮೆ ನೀಡುವ ಪ್ರಶ್ನೆ ಇಲ್ಲ: ಭೈರತಿ ಬಸವರಾಜ್
ಯಾವುದೇ ರಾಜಕಾರಣಿ ಸದನದೊಳಗೆ ಅಥವಾ ಹೊರಗೆ ತಮ್ಮ ನಾಲಿಗೆಯ ಮೇಲೆ ಹಿಡಿತ ಹೊಂದಿರಬೇಕು. ನಮ್ಮ ನಡೆ ಮತ್ತು ನುಡಿ ಜವಾಬ್ದಾರಿಯುತವಾಗಿ ಇರಬೇಕು. ಹಾಗಿದ್ದರೆ ಮಾತ್ರ ಸಮಾಜ ನಮ್ಮನ್ನು ಗೌರವಿಸುತ್ತದೆ. ಇಂಥದನ್ನು ಮಾಡಿಕೊಂಡರೆ ಅದೇ ಸಮಾಜ ಹಿರಿಯ ರಾಜಕಾರಣಿಯಾದರೂ ಈ ಪರಿಸ್ಥಿತಿಗೆ ತಂದಿಡುತ್ತದೆ ಎಂದರು.
ಇನ್ನು ಸಚಿವ ಭೈರತಿ ಬಸವರಾಜ ಮೇಲೆ ಕೇಳಿ ಬಂದಿರುವ ಆರೋಪ ಸತ್ಯಕ್ಕೆ ದೂರವಾಗಿದೆ. ಹಿಂದಿನ ಡಿಎಸ್ಪಿ ಗಣಪತಿ ಕೊಲೆ ಕೇಸ್ಗೂ ಜಾರ್ಜ್ ರಾಜೀನಾಮೆಗೂ, ಭೈರತಿ ಬಸವರಾಜ ರಾಜೀನಾಮೆಗೆ ಹೋಲಿಕೆ ಮಾಡುವ ಪ್ರಶ್ನೆಯಿಲ್ಲ. ಭೈರತಿ ಬಸವರಾಜ ಕೇಸ್ನ್ನು ಜಾರ್ಜ್ರವರ ಪ್ರಕರಣಕ್ಕೆ ಹೋಲಿಕೆ ಮಾಡುವುದು ಸರಿಯಲ್ಲ. 20 ವರ್ಷಗಳ ಹಿಂದಿನ ಪ್ರಕರಣ ಇದಾಗಿದ್ದು, ರಾಜೀನಾಮೆ ವಿಷಯವೇ ಬರುವುದಿಲ್ಲ ಎಂದರು.
