ಕಾರವಾರ: ರೋಗಿಗಳು, ತುರ್ತು ಅಪಘಾತಕ್ಕೊಳಗಾದವರ ಪಾಲಿಗೆ ಆಪತ್ಭಾಂಧವ ಅಂದ್ರೆ ಆ್ಯಂಬುಲೆನ್ಸ್ಗಳು. ಸುಸಜ್ಜಿತ ಆ್ಯಂಬುಲೆನ್ಸ್ಗಳಿದ್ದರೆ ಮಾತ್ರ ಜೀವವನ್ನು ರಕ್ಷಿಸಲು ಸಾಧ್ಯ. ಆದರೆ ಉತ್ತರ ಕನ್ನಡ ಜಿಲ್ಲೆಯಲ್ಲಿ ಮಾತ್ರ ಈ ಕೋವಿಡ್ ಕಾಲದಲ್ಲೂ ಆ್ಯಂಬುಲೆನ್ಸ್ ಸಮಸ್ಯೆ ಎದುರಾಗಿದೆ. ಆ್ಯಂಬುಲೆನ್ಸ್ಗಳಿದ್ದರೂ ಕೂಡ ಅವುಗಳೇ ರೋಗಗ್ರಸ್ಥವಾಗಿದ್ದು, ಸೂಕ್ತ ವೈದ್ಯಕೀಯ ಪರಿಕರಗಳಿಲ್ಲದೇ ರೋಗಿಗಳು ಪರದಾಟ ನಡೆಸುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಮಾತ್ರವಲ್ಲದೇ ಎರಡ್ಮೂರು ಪಟ್ಟು ಹಣ ತೆತ್ತು ಖಾಸಗಿ ಆ್ಯಂಬುಲೆನ್ಸ್ಗಳ ಮೊರೆ ಹೋಗಬೇಕಾದ ಅನಿವಾರ್ಯತೆ ಎದುರಾಗಿದೆ.
ಹೌದು, ರಾಜ್ಯದಲ್ಲಿಯೇ ಅತ್ಯಂತ ದೊಡ್ಡ ಜಿಲ್ಲೆಗಳಲ್ಲಿ ಒಂದಾದ ಉತ್ತರ ಕನ್ನಡ ಜಿಲ್ಲೆಯ ಬಹು ಭಾಗ ಅರಣ್ಯ ಪ್ರದೇಶದಿಂದಲೇ ಕೂಡಿದೆ. ಜಿಲ್ಲೆಯ ಬಹುತೇಕ ರಸ್ತೆಗಳು ಇಕ್ಕಟ್ಟಾಗಿದ್ದು, ತಿರುವು-ಮುರುವಿನಿಂದ ಮತ್ತು ದುರಸ್ತಿಗೆ ತಲುಪಿರುವ ಕಾರಣ ಅಪಘಾತಗಳ ಸಂಖ್ಯೆ ಕೂಡ ಹೆಚ್ಚಾಗಿದೆ. ಅಲ್ಲದೇ ಇದೀಗ ಕೊರೊನಾ ಪ್ರಕರಣಗಳು ಹೆಚ್ಚಾಗಿ ದೇಶಮಟ್ಟದಲ್ಲಿಯೇ ಉತ್ತರ ಕನ್ನಡ ಜಿಲ್ಲೆ ಪಾಸಿಟಿವಿಟಿ ರೇಟ್ ಹೆಚ್ಚಿರುವ ಪಟ್ಟಿಯಲ್ಲಿ ಗುರುತಿಸಿಕೊಂಡಿದೆ.
ಪ್ರತಿನಿತ್ಯ ಸಾವಿರದ ಗಡಿಯಲ್ಲಿ ಸೋಂಕಿತರು ಪತ್ತೆಯಾಗುತ್ತಿದ್ದಾರೆ. ಆದರೆ ಹೀಗೆ ಪತ್ತೆಯಾದ ಸೋಂಕಿತರನ್ನು ಈ ಮೊದಲಿನಂತೆ ಮನೆ ಬಾಗಿಲಿಗೆ ಬಂದು ಆ್ಯಂಬುಲೆನ್ಸ್ಗಳ ಮೂಲಕ ಕರೆದುಕೊಂಡು ಹೋಗುತ್ತಿಲ್ಲ. ಗಂಭೀರ ಪರಿಸ್ಥಿತಿ ಇದೆ, ಬೇಗ ಬನ್ನಿ ಅಂದ್ರು ಕೂಡ ಜಿಲ್ಲೆಯಲ್ಲಿ ಆ್ಯಂಬುಲೆನ್ಸ್ಗಾಗಿ ಎರಡು ಮೂರು ಗಂಟೆಗಳ ಕಾಲ ಕಾಯಬೇಕಾದ ಪರಿಸ್ಥಿತಿ ಇದೆ. ಜಿಲ್ಲೆಯಲ್ಲಿರುವ 20ಕ್ಕೂ ಹೆಚ್ಚು ಆ್ಯಂಬುಲೆನ್ಸ್ಗಳ ಪೈಕಿ ಅದೆಷ್ಟೋ 108 ಆ್ಯಂಬುಲೆನ್ಸ್ಗಳು ತುಕ್ಕು ಹಿಡಿದಿದ್ದು, ರಸ್ತೆಯ ಮಧ್ಯದಲ್ಲಿಯೇ ಕೆಟ್ಟು ನಿಂತ ಘಟನೆಗಳು ಕೂಡ ನಡೆದಿವೆ.
ಇದಲ್ಲದೆ ಜಿಲ್ಲೆಯಲ್ಲಿ ಒಂದೇ ಒಂದು ವೆಂಟಿಲೇಟರ್ ಆ್ಯಂಬುಲೆನ್ಸ್ಗಳಿಲ್ಲ. ತುರ್ತು ಅಗತ್ಯವಿದ್ದವರಿಗೆ ಈ ಆ್ಯಂಬುಲೆನ್ಸ್ ಬೇಕು ಅಂದ್ರೆ ಮಂಗಳೂರು ಇಲ್ಲವೇ ಉಡುಪಿಯಿಂದ ಎರಡ್ಮೂರು ಪಟ್ಟು ಹಣ ತೆತ್ತು ಕರೆಸಿಕೊಳ್ಳಬೇಕಾದ ಸ್ಥಿತಿ ಇದೆ. ಖಾಸಗಿ ಆ್ಯಂಬುಲೆನ್ಸ್ಗಳ ದರ, ಸರ್ಕಾರಿ ಸೇವೆಯ ಆ್ಯಂಬುಲೆನ್ಸ್ಗಳು ಸಮಯಕ್ಕೆ ಸರಿಯಾಗಿ ಬಾರದೆ ಇರುವುದರಿಂದ ರೋಗಿಗಳು ಪರದಾಡಬೇಕಾದ ಸ್ಥಿತಿ ಎದುರಾಗಿದೆ ಎನ್ನುತ್ತಾರೆ ಸ್ಥಳೀಯರು.
ಜಿಲ್ಲೆಯಲ್ಲಿ ಸುಮಾರು 20ಕ್ಕೂ ಹೆಚ್ಚು ಆ್ಯಂಬುಲೆನ್ಸ್ಗಳಿದ್ದು, ಅದರಲ್ಲಿ ಬಹುತೇಕ 108ರ ಆ್ಯಂಬ್ಯುಲೆನ್ಸ್ ವಾಹನಗಳಾಗಿವೆ. ಈ ಆ್ಯಂಬುಲೆನ್ಸ್ ಸಿಬ್ಬಂದಿಗೆ ಮೂರು ತಿಂಗಳಿನಿಂದ ಸರಿಯಾದ ಸಂಬಳ ಕೂಡ ನೀಡಿಲ್ಲವಂತೆ. ಕೆಲವೆಡೆ ಪಿಪಿಇ ಕಿಟ್ ಸೇರಿದಂತೆ ಇನ್ನಿತರೆ ಸುರಕ್ಷಾ ಸಾಮಗ್ರಿಗಳು ಇಲ್ಲದೇ ಕೆಲಸ ಮಾಡುವಂತಾಗಿದೆ. ಈ ಬಗ್ಗೆ ಗುತ್ತಿಗೆ ಪಡೆದ ಕಂಪನಿ ಇಲ್ಲವೇ ಅಧಿಕಾರಿಗಳಿಗೆ ತಿಳಿಸಿದರೆ ಕೆಲಸ ಕಳೆದುಕೊಳ್ಳುವ ಆತಂಕ ಇರುವುದರಿಂದ ಎಲ್ಲರು ಪರಿಸ್ಥಿತಿಗೆ ಹೊಂದಿಕೊಂಡು ಕೆಲಸ ನಿರ್ವಹಿಸುತ್ತಿದ್ದೇವೆ ಎನ್ನುತ್ತಾರೆ ಹೆಸರು ಹೇಳಲಿಚ್ಛಿಸದ ಆ್ಯಂಬುಲೆನ್ಸ್ ಚಾಲಕರು.
ಇದನ್ನೂ ಓದಿ: ವಯೋವೃದ್ಧರಿಗೆ ವರವಾದ ಲಸಿಕೆ : ವ್ಯಾಕ್ಸಿನ್ ಪಡೆದವರಲ್ಲಿ ಸಾವು ಕಡಿಮೆ
ಆದರೆ ಈ ಬಗ್ಗೆ ಅಧಿಕಾರಿಗಳನ್ನು ಕೇಳಿದ್ರೆ, ಜಿಲ್ಲೆಯ ಎಲ್ಲ ತಾಲೂಕುಗಳಲ್ಲಿ ಆ್ಯಂಬುಲೆನ್ಸ್ ವ್ಯವಸ್ಥೆ ಇದೆ. ಆದರೆ ಹಳೆಯ 108 ಆ್ಯಂಬುಲೆನ್ಸ್ಗಳಾಗಿದ್ದು ಸಣ್ಣ-ಪುಟ್ಟ ತೊಂದರೆಗಳಾಗುತ್ತಿದೆ. ಇದೀಗ ಎಲ್ಲ ತಾಲೂಕುಗಳಿಗೂ ಶಾಸಕರ ಅನುದಾನದ ಅಡಿಯಲ್ಲಿ ಸುಸಜ್ಜಿತ ಆ್ಯಂಬುಲೆನ್ಸ್ ಖರೀದಿ ಮಾಡುತ್ತಿದ್ದು, ಒಂದು ವಾರದಲ್ಲಿ ಸೇವೆಗೆ ಬರಲಿವೆ. 108 ಆ್ಯಂಬುಲೆನ್ಸ್ ವಾಹನದ ಚಾಲಕರ ಕೊರತೆ ಇದೆ. ಅದು ಕಂಪನಿಯೊಂದಕ್ಕೆ ಗುತ್ತಿಗೆ ನೀಡಿದ್ದು, ಅವರಿಗೆ ಸೂಚನೆ ನೀಡಲಾಗಿದೆ. ಈಗಾಗಲೇ ಪಿಪಿಇ ಕಿಟ್ ನೀಡಿದ್ದು, ಗ್ರಾಮೀಣ ಭಾಗಗಳ ಪಿಹೆಚ್ಸಿಗಳಿಗೂ ನೀಡಲು ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ.
