ಕಾರವಾರ: ರಫೇಲ್ ಎಂದು ಎಲ್ಲರೂ ಹೇಳುತ್ತಿದ್ದರೆ ಅತ್ತ ರಾಹುಲ್ ಗಾಂಧಿ ಅದನ್ನು ತಾನು ಸಣ್ಣವನಿರುವಾಗ ಆಡಿದ ಮೂರು ಗಾಲಿಯ ಸೈಕಲ್ ಅಂದುಕೊಂಡಿದ್ದಾನೆ ಎಂದು ಕೇಂದ್ರ ಸಚಿವ ಅನಂತಕುಮಾರ್ ಹೆಗಡೆ ವ್ಯಂಗ್ಯವಾಡಿದ್ದಾರೆ.
ಹೊನ್ನಾವರದ ನಗರ ಬಸ್ತಿಕೇರಿಯಲ್ಲಿ ಬಿಜೆಪಿ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ ಅವರು, ರಾಹುಲ್ ಗಾಂಧಿ ಸಣ್ಣವರಿರಬೇಕಿದ್ದರೆ ಆಡಿದ ಸೈಕಲ್ಗೆ ಮೂರು ಚಕ್ರ ಇತ್ತು. ರಫೇಲ್ಗೂ ಮೂರು ಚಕ್ರ ಇದೆ. ಹೀಗಾಗಿ ಅದನ್ನೆ ರಫೇಲ್ ಅಂದುಕೊಂಡಿದ್ದಾರೆ ಎಂದು ವ್ಯಂಗ್ಯ ಮಾಡಿದ್ದಾರೆ.
ಸಣ್ಣ ಮಕ್ಕಳ ಕಿವಿಗೆ ಯಾವುದಾದರು ಒಂದು ವಿಷಯ ಬಿದ್ದಲ್ಲಿ ಅದನ್ನೆ ದಿನವೂ ಹೇಳುತ್ತಿರುತ್ತಾರೆ. ಅದೇ ರೀತಿ ರಾಹುಲ್ ಗಾಂಧಿಗೆ ಅವರ ಅಮ್ಮ ರಫೇಲ್ ಬಗ್ಗೆ ಹೇಳಿರಬೇಕು. ಅದನ್ನೆ ಎಲ್ಲ ಕಡೆ ಹೇಳುತ್ತಿದ್ದಾರೆ ಎಂದು ಅನಂತಕುಮಾರ್ ಹಾಸ್ಯ ಮಾಡಿದ್ದಾರೆ.
ಈ ಹಿಂದೆ ಗಾಂಧಿ ಕುಟುಂಬದವರನ್ನು ಮಾತನಾಡಿಸಬೇಕು ಅಂದ್ರೆ ಸಾಧ್ಯವೇ ಇರಲಿಲ್ಲ. ಎಷ್ಟೇ ದೊಡ್ಡ ಮುಖಂಡರಾಗಿದ್ದರು ಕಷ್ಟವಾಗುತ್ತಿತ್ತು. ಆದರೆ ಇದೀಗ ಎಂತಹ ಬೇನಾಮಿ ಪರಿಸ್ಥಿತಿ ಬಂದಿದೆ ಎಂದರೆ ರಾಹುಲ್ ಗಾಂಧಿಯೇ ಹೋಗಿ ಹೆಚ್.ಡಿ.ದೇವೇಗೌಡ ಅವರ ಮನೆಗೆ ಬಂದು ಕುಳಿತುಕೊಂಡು, ಒಪ್ಪಂದ ಮಾಡಿಕೊಳ್ಳುಂತೆ ಗೋಗರೆಯುತ್ತಿದ್ದಾರೆ ಎಂದು ಕುಟುಕಿದರು.
