ಕಾರವಾರ : ವ್ಯಕ್ತಿಯ ಹತ್ಯೆಗೆ ಸಂಚು ರೂಪಿಸಿದ್ದ ಎಂಟು ಮಂದಿ ಆರೋಪಿಗಳನ್ನು ಯಲ್ಲಾಪುರ ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಯಲ್ಲಾಪುರ ತಾಲೂಕಿನ ಸಬಗೇರಿಯ ಸುರೇಶ ಗಣಪತಿ ರೇವಣಕರ ಎಂಬುವರ ಮೇಲೆ ಜನವರಿ 11ರಂದು ತೀವ್ರವಾಗಿ ಹಲ್ಲೆ ನಡೆಸಿ, ಮೊಬೈಲ್ ಕದ್ದು ಕೊಲೆ ಮಾಡಲು ಆರೋಪಿಗಳು ಯತ್ನಿಸಿದ್ದರು.
ಈ ಕುರಿತು ಯಲ್ಲಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಎಸ್‌ಪಿ ಸುಮನ್ ಫೆನ್ನೆಕರ್ ಮಾರ್ಗದರ್ಶನದಲ್ಲಿ ಡಿವೈಎಸ್ಪಿ ರವಿ ನಾಯ್ಕ ನೇತೃತ್ವದ ತಂಡ ಕಾರ್ಯಚರಣೆ ನಡೆಸಿ 8 ಮಂದಿಯನ್ನು ಬಂಧಿಸಿದ್ದಾರೆ.
ಮಹಾಬಲೇಶ್ವರ ಭಟ್, ವಿನೋದ ಕಾಮತ್, ಗೋವಿಂದ ಸುತಾರ, ನಾಮದೇವ ಹಲಗೇಕರ, ಸುಶಾಂತ ಖಾನಾಪುರಿ, ಶ್ರೀಧರ ಉಪ್ಪರಿ, ರಾಘವೇಂದ್ರ ಸಿಣ್ಞೂರು, ಮಂಜುನಾಥ ದಂಡಗಲ್ ಬಂಧಿತರು. ಬಂಧಿತರಿಂದ ಎರಡು ಬೈಕ್, ಕಾರು, 9 ಮೊಬೈಲ್ ವಶಕ್ಕೆ ಪಡೆಯಲಾಗಿದ್ದು, ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.
