ಮಂಗಳೂರು (ದ.ಕ): ತಮ್ಮ ಕ್ರಾಂತಿಕಾರಿ ನುಡಿಗಳಿಂದಲೇ ಯುವಕರಲ್ಲಿ ಸ್ಪೂರ್ತಿಯ ಸೆಲೆಯನ್ನು ಬಿತ್ತಿದವರು ಸ್ವಾಮಿ ವಿವೇಕಾನಂದರು. ಸ್ವಾಮಿ ವಿವೇಕಾನಂದರ ಇಂತಹ ಸ್ಪೂರ್ತಿಯ ನುಡಿಗಳನ್ನೇ ಇರಿಸಿ ‘ಸೋಲ್ಸ್ ರಿದಂ’ ಎಂಬ ಮಂಗಳೂರಿನ ಯುವಕರ ತಂಡವೊಂದು 4 ಭಾಷೆಗಳಲ್ಲಿ ರಾಕ್ ಬ್ಯಾಂಡ್ ಮ್ಯೂಸಿಕ್ ಆಲ್ಬಂನ್ನು ತಯಾರಿಸಿದೆ.
ಕನ್ನಡ, ಇಂಗ್ಲಿಷ್, ಹಿಂದಿ ಹಾಗೂ ತುಳು ಭಾಷೆಯಲ್ಲಿ ಬಿಡುಗಡೆಯಾದ ಈ 'ಜೈಜೈ ಸ್ವಾಮಿ ವಿವೇಕಾನಂದ' ಮ್ಯೂಸಿಕ್ ಆಲ್ಬಂ ಮೆಚ್ಚುಗೆ ಗಳಿಸುತ್ತಿದೆ. ಜಯಪ್ರಕಾಶ್ ಸಿ.ಎಸ್. ಅವರ ಅವಿರತ ಶ್ರಮದಿಂದ ಈ ಮ್ಯೂಸಿಕ್ ಆಲ್ಬಂ ಬಿಡುಗಡೆಗೊಂಡಿದೆ. ಸ್ವಾತಂತ್ರ್ಯ ದಿನಾಾಚರಣೆಯ ದಿನವಾದ ಯುವ ಮನಸುಗಳಿಗೆ ಸ್ಪೂರ್ತಿಯ ಕಿಡಿ ಹಚ್ಚುವ ಉದ್ದೇಶದಿಂದ ಈ ಮ್ಯೂಸಿಕ್ ಆಲ್ಬಂ ಅನ್ನು ಬಿಡುಗಡೆ ಮಾಡಲಾಗಿದೆ.
ವಿವೇಕಾನಂದರ ಸ್ಪೂರ್ತಿಯ ನುಡಿಗಳಿಗೆ ತಕ್ಕಂತೆ ಹಾಡನ್ನು ಹೈಪಿಚ್ನಲ್ಲಿ ಸಂಯೋಜಿಸಲಾಗಿದೆ. 'ಕೆಜಿಎಫ್' ಸಿನಿಮಾ ಖ್ಯಾತಿಯ ಐರಾ ಉಡುಪಿ 4 ಭಾಷೆಯ ಹಾಡುಗಳನ್ನು ಅದ್ಭುತವಾಗಿ ಹಾಡಿದ್ದಾರೆ.
ನಾಲ್ಕು ಭಾಷೆಯಲ್ಲಿನ ಸಾಹಿತ್ಯದಲ್ಲಿ ಬದಲಾವಣೆ ಇದ್ದರೂ, ಸಂಗೀತ ಸಂಯೋಜನೆಯಲ್ಲಿ ಯಾವುದೇ ವ್ಯತ್ಯಾಸವಿಲ್ಲ. ಈ ಮ್ಯೂಸಿಕ್ ಆಲ್ಬಂಗೆ ಪ್ರತಿಭಾವಂತ ಸಂಗೀತ ನಿರ್ದೇಶಕ ಸಂದೇಶ್ ಬಾಬು ಅವರ ಸಂಗೀತ ಸಂಯೋಜನೆ ಇದ್ದರೆ, ಯುವ ಸಾಹಿತಿ ವಿಜೇಶ್ ದೇವಾಡಿಗ ಮಂಗಳಾದೇವಿ ತುಳು ಹಾಗೂ ಕನ್ನಡ ಭಾಷೆಯ ಹಾಡಿಗೆ ಸಾಹಿತ್ಯ ರಚಿಸಿದ್ದಾರೆ. ಹಿಂದಿ ಹಾಡಿಗೆ ಮೆಲ್ವಿನ್ ಆಂಟೋನಿ ಡಿಸೋಜ ಸಾಹಿತ್ಯ ರಚಿಸಿದ್ದಾರೆ.
ಇನ್ನು ಇಂಗ್ಲಿಷ್ ಹಾಡಿಗೆ ಜಯಪ್ರಕಾಶ್ ಸಿ.ಎಸ್. ಸಾಹಿತ್ಯ ರಚಿಸಿ ಮ್ಯೂಸಿಕ್ ಆಲ್ಬಂನ ನಿರ್ದೇಶನದ ಜವಾಬ್ದಾರಿ ವಹಿಸಿದ್ದಾರೆ. ದೇರಳಕಟ್ಟೆ ಸುರೇಶ್ ಛಾಯಾಗ್ರಹಣದ ಜವಾಬ್ದಾರಿ ವಹಿಸಿದ್ದರೆ, ಸುಹಾಸ್ ಸಂಕಲನ ಮಾಡಿದ್ದಾರೆ.
ವಿಶೇಷವೆಂದರೆ ಈ 'ಜೈ ಜೈ ಸ್ವಾಮಿ ವಿವೇಕಾನಂದ' ಕನ್ನಡ ಮ್ಯೂಸಿಕ್ ಆಲ್ಬಂ ಏಕಕಾಲದಲ್ಲಿ ಕರ್ನಾಟಕದ 12 ಆಕಾಶವಾಣಿ ಕೇಂದ್ರಗಳಲ್ಲಿ ಪ್ರಸಾರಗೊಂಡಿದೆ. ಯೂಟ್ಯೂಬ್ನಲ್ಲಿ ಸಾಕಷ್ಟು ಜನರು ಈ ಮ್ಯೂಸಿಕ್ ಆಲ್ಬಂ ಅನ್ನು ವೀಕ್ಷಿಸಿದ್ದು, ಉತ್ತಮ ಅಭಿಪ್ರಾಯ ವ್ಯಕ್ತವಾಗಿದೆ.
