ತುಮಕೂರು: ದೇವಸ್ಥಾನಗಳ ಹುಂಡಿ ಹಣ ಹಾಗೂ ಚಿನ್ನಾಭರಣ ದೋಚುತ್ತಿದ್ದ ಇಬ್ಬರು ಕಳ್ಳರನ್ನು ತುಮಕೂರು ಪೊಲೀಸರು ಬಂಧಿಸಿದ್ದಾರೆ.
ಕೊರಟಗೆರೆ ತಾಲೂಕಿನ ಬೈರಗೊಂಡಲು ಗ್ರಾಮದ ನಾಗರಾಜ ಮತ್ತು ರಮೇಶ ಬಂಧಿತ ಆರೋಪಿಗಳು.
ಗುಬ್ಬಿ ತಾಲೂಕಿನ ಸಿ.ಎಸ್.ಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿನ ಅಂಕಳ ಕೊಪ್ಪ ಗ್ರಾಮದ ಮಾರಮ್ಮನ ದೇವಸ್ಥಾನದ ಹುಂಡಿ, ವೀರಣ್ಣ ಗುಡಿ ದೇವಸ್ಥಾನದ ಭದ್ರ ಕಾಳಮ್ಮ ಮತ್ತು ಲಕ್ಷ್ಮೀ ದೇವಸ್ಥಾನದಲ್ಲಿ ಆಭರಣ ಹಾಗೂ ಹುಂಡಿ, ಬೋರಪ್ಪನಹಳ್ಳಿ ಕೆಂಪಮ್ಮ ದೇವಿ ದೇವಸ್ಥಾನದಲ್ಲಿನ ದೇವರ ಆಭರಣ ಹಾಗೂ ಹುಂಡಿ ಕಳ್ಳತನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರ ಮೇಲೆ ಆರೋಪಗಳಿವೆ.
ಬಂಧಿತ ಆರೋಪಿಗಳಿಂದ ದೇವರ ತಾಳಿ, ಬೆಳ್ಳಿಯ ಕವಚಗಳು, ಕಾಲಿನ ಕವಚಗಳು, ಚಿನ್ನದ ಗುಂಡುಗಳು, ಲಕ್ಷ್ಮೀದೇವಿಯ ಮುಖವಾಡ, ಪ್ರಭಾವಳಿ ಸೇರಿದಂತೆ ವಿವಿಧ ಚಿನ್ನಾಭರಣಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಗುಬ್ಬಿ, ತುರುವೇಕೆರೆ, ಕುಣಿಗಲ್ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಂತಹ ಪ್ರಮುಖವಾಗಿ ದೇವಸ್ಥಾನದಲ್ಲಿನ ಕಳ್ಳತನ ಪ್ರಕರಣಗಳಲ್ಲಿ ಆರೋಪಿಗಳು ಭಾಗಿಯಾಗಿರುವುದು ವಿಚಾರಣೆ ವೇಳೆ ಬೆಳಕಿಗೆ ಬಂದಿದೆ.
