ತುಮಕೂರು: ಮಧುಗಿರಿ ವಿಧಾನಸಭೆ ಕ್ಷೇತ್ರದಲ್ಲಿ ಅಭಿವೃದ್ಧಿ ಕಾರ್ಯಕ್ಕೆ ಸಂಬಂಧಿಸಿದಂತೆ ಸಂಸದ ಜಿ. ಎಸ್. ಬಸವರಾಜ್ ಮತ್ತು ಶಾಸಕ ವೀರಭದ್ರಯ್ಯ ನಡುವೆ ನಡೆಯುತ್ತಿರೋ ಆರೋಪ-ಪ್ರತ್ಯಾರೋಪ ಚರ್ಚೆಗೆ ಗ್ರಾಸವಾಗಿದೆ.
ಮಧುಗಿರಿ ಕ್ಷೇತ್ರದಲ್ಲಿನ ಅಭಿವೃದ್ಧಿ ವಿಷಯದಲ್ಲಿ ನನಗೆ ಸಹಕಾರ ನೀಡುತ್ತಿಲ್ಲ. ಹೀಗಾಗಿ ನಾನು ಕೂಡ ಅವನನ್ನು ದೂರವಿಟ್ಟಿದ್ದೇನೆ ಎಂದು ಸಂಸದ ಜಿ.ಎಸ್. ಬಸವರಾಜ್ ಅವರು ಶಾಸಕ ವೀರಭದ್ರಯ್ಯ ಅವರನ್ನು ಕಟುವಾಗಿ ಟೀಕಿಸಿದ್ದಾರೆ. ಅಲ್ಲದೆ, ಯಾರಿಂದ ಶಾಸಕನಾಗಿದ್ದೇನೆ ಎಂಬುದನ್ನು ಮರೆತಿದ್ದಾನೆ ಎಂದು ಗುಡುಗಿದ್ದಾರೆ.
ಕುಡಿಯುವ ನೀರಿನ ಸೌಲಭ್ಯಕ್ಕಾಗಿ ಪುರವರ ಕೆರೆ ಅಭಿವೃದ್ಧಿಗೆ ಶಾಸಕ ವೀರಭದ್ರಯ್ಯ ಸಹಕಾರ ನೀಡುತ್ತಿಲ್ಲ ಎಂದು ಗಂಭೀರ ಆರೋಪವನ್ನು ಸಂಸದ ಜಿ.ಎಸ್. ಬಸವರಾಜ್ ಮಾಡಿದರು. ಪಿಎಂಜಿಎಸ್ ವೈ ಯೋಜನೆ ಕೇಂದ್ರ ಸರ್ಕಾರದ್ದಾಗಿದ್ದು, ಅದನ್ನು ನಾನೇ ತಂದಿದ್ದೇನೆ ಎಂದು ಸುಳ್ಳು ಹೇಳುತ್ತಿದ್ದಾರೆ. ಬೋರ್ವೆಲ್ ಮತ್ತು ಜಾಕ್ವೆಲ್ ಎಲ್ಲಿದೆ ಎಂದು ಶಾಸಕ ವೀರಭದ್ರಯ್ಯರಿಗೆ ಗೊತ್ತಿಲ್ಲದಂತಾಗಿದೆ ಎಂದು ಸಂಸದರು ಟೀಕಿಸಿದ್ದಾರೆ.
ರಾಜಕಾರಣ ಮಾಡಬಾರದು: ಇನ್ನೊಂದೆಡೆ ಸಂಸದ ಬಸವರಾಜ್ ಅವರ ಬಹಿರಂಗ ಸಭೆಯಲ್ಲಿನ ಹೇಳಿಕೆಗೆ ಕೆಂಡಾಮಂಡಲರಾಗಿರೋ ಶಾಸಕ ವೀರಭದ್ರಯ್ಯ, ಏಕವಚನದಲ್ಲಿ ಹಿರಿಯ ರಾಜಕಾರಣಿ ಮಾತನಾಡಿರುವುದು ಸೌಜನ್ಯ ತರುವಂತಹದ್ದಲ್ಲ. ಇದು ಅವರ ಘನತೆಗೆ ತಕ್ಕುದಲ್ಲ. ಮಧುಗಿರಿ ಕ್ಷೇತ್ರದ ಅಭಿವೃದ್ಧಿ ವಿಷಯದಲ್ಲಿ ಸಹಕಾರ ನೀಡುತ್ತೇನೆ. ಆದ್ರೆ ಸಂಸದ ಬಸವರಾಜ್ ಅದರಲ್ಲಿ ರಾಜಕಾರಣ ಮಾಡಬಾರದು ಎಂದಿದ್ದಾರೆ.
ಮಧುಗಿರಿಯನ್ನು ಜಿಲ್ಲೆ ಮಾಡುವಂತೆ ಕರೆ: ಅಭಿವೃದ್ಧಿ ವಿಷಯದಲ್ಲಿ ಮಾತನಾಡಬೇಕು. ಪಕ್ಷಾತೀತವಾಗಿ ಕೆಲಸ ಮಾಡುತ್ತಿದ್ದೇನೆ. ಕಾಂಗ್ರೆಸ್, ಬಿಜೆಪಿ ನಾಯಕರನ್ನು ಜೊತೆಯಲ್ಲಿ ಕರೆದುಕೊಂಡು ಹೋಗುತ್ತಿದ್ದೇನೆ. ಒಗ್ಗಟ್ಟಾಗಿ ಕ್ಷೇತ್ರದ ಅಭಿವೃದ್ಧಿಯತ್ತ ಗಮನಹರಿಸಬೇಕಿದೆ. ಈಗ ಬಿಜೆಪಿ ಸರ್ಕಾರವಿದ್ದು, ಮಧುಗಿರಿಯನ್ನು ಜಿಲ್ಲೆಯನ್ನಾಗಿ ಮಾಡುವಂತೆ ಶಾಸಕ ವೀರಭದ್ರಯ್ಯ ಒತ್ತಾಯಿಸಿದರು.
ಓದಿ: 55 ಕೋವಿಡ್ ಕೇರ್ ಸೆಂಟರ್, ತಾತ್ಕಾಲಿಕ ಲಸಿಕಾ ಕ್ಯಾಂಪ್ ಬಂದ್: ಬಿಬಿಎಂಪಿ ಆಯುಕ್ತ
