ತುಮಕೂರು: ದೆವ್ವದ ಹೆಸರಿನ ಕುಚೇಷ್ಟೆಗೆ ಸ್ಥಳೀಯರು ಕಂಗಾಲಾಗಿರುವ ಘಟನೆ ತುಮಕೂರಿನ ತಿಪಟೂರು ತಾಲೂಕು ಮಡೆನೂರು ಭೋವಿ ಕಾಲೋನಿಯಲ್ಲಿ ನಡೆದಿದೆ. ಕಳೆದ ಏಳೆಂಟು ತಿಂಗಳಿಂದ ನಿರಂತರವಾಗಿ ಇಂಥ ಚೇಷ್ಟೆಗೆ ಸ್ಥಳೀಯರು ಬೆಚ್ಚಿಬಿದ್ದಿದ್ದಾರೆ. ಸಂಜೆ 6 ಗಂಟೆಯ ನಂತರ ಮನೆ ಮೇಲೆ ನಿರಂತರವಾಗಿ ಕಲ್ಲುಗಳು ಬೀಳುವುದು, ಶಿಳ್ಳೆ ಹೊಡೆದರೆ ಪ್ರತಿಯಾಗಿ ಶಿಳ್ಳೆ ಹೊಡೆಯುವುದು, ಮನೆ ಸುತ್ತಮುತ್ತಲ ಹುಲ್ಲಿನ ಬಣವೆಗೆ ಬೆಂಕಿ ಹಚ್ಚುವುದು ಎಂಬಿತ್ಯಾದಿ ಭೀತಿಯ ವಾತಾವರಣ ನಿರ್ಮಾಣವಾಗಿದೆ. ಈವರೆಗೂ ಎರಡು ಬಾರಿ ಬೆಂಕಿ ಹಚ್ಚಿರುವ ಘಟನೆ ನಡೆದಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.
ಮೊಬೈಲ್ ನಂಬರ್ ಹೇಳಿ ಕೇಕೆ ಹಾಕುವ ಘಟನೆಗಳೂ ನಡೆದಿವೆ. ಮೂರ್ನಾಲ್ಕು ದಿನದಿಂದ ಕತ್ತಲೆಯಿಂದ ಧ್ವನಿ ಕೇಳಿ ಬರುತ್ತಿದೆ. ನಾನು ಶಂಕರ್ ಉರುಫ್ ಇಡ್ಲಿ, ನಿಮ್ಮನ್ನೆಲ್ಲ ಕೊಲೆ ಮಾಡುತ್ತೇನೆ ಎನ್ನಲಾಗುತ್ತದೆ. 8 ತಿಂಗಳ ಹಿಂದಷ್ಟೇ ಇದೇ ಗ್ರಾಮದ ಶಂಕರ ಎಂಬವರು ಹೃದಯಾಘಾತದಿಂದ ಸಾವನ್ನಪ್ಪಿದ್ದರು. ಆತ ಸಾವಿಗೀಡಾದ ಬಳಿಕ ದಾಯಾದಿಗಳ ಮೇಲೆ ಹಗೆ ಸಾಧಿಸಲು ದೆವ್ವದ ರೀತಿ ಕಾಡಲಾಗುತ್ತಿದೆ. ಶಂಕರನ ದಾಯಾದಿಗಳಾದ ಗಂಗಾಧರ್, ಮೂರ್ತಿ ಹಾಗೂ ಹೆಂಡತಿ ಲಾವಣ್ಯ ವಾಸವಿರುವ ಮನೆ ಮೇಲೆ ಕಲ್ಲುಗಳು ಬೀಳುತ್ತಿವೆ. ಮನೆ ಮುಂದಿರುವ ಕುರಿಗಳು ಕಣ್ಮರೆಯಾಗುತ್ತಿವೆ ಎಂದು ಗ್ರಾಮಸ್ಥರು ಹೇಳಿದ್ದಾರೆ.
ಈ ವಿಚಾರ ತಿಳಿದು ಸ್ಥಳಕ್ಕೆ ಪವಾಡ ಭಂಜಕ ಹುಲಿಕಲ್ ನಟರಾಜು ಅವರು ಭೇಟಿ ನೀಡಿ ಇಡೀ ರಾತ್ರಿ ದೆವ್ವದ ಕಾಟದಿಂದ ಬೇಸತ್ತಿರುವ ಮನೆಗಳ ಸುತ್ತಲೂ ಪರಿಶೀಲನೆ ನಡೆಸಿದ್ದಾರೆ. ರಾತ್ರಿಯೆಲ್ಲ ಕಾದು ಕೂಗಿದರೂ, ಶಿಳ್ಳೆ ಹೊಡೆದರೂ ಪ್ರತಿಕ್ರಿಯೆ ಬಂದಿಲ್ಲ. ಮನೆ ಮೇಲೆ ಕಲ್ಲು ತೂರಾಟ ನಡೆಸಿದ ಘಟನೆಗಳು ನಡೆದಿಲ್ಲ. ಹಾಗಾಗಿ, ಇದು ಯಾರೋ ಅಪರಿಚಿತ ಕಿಡಿಗೇಡಿಗಳ ಕೃತ್ಯ ಎಂಬುದನ್ನು ಹುಲಿಕಲ್ ನಟರಾಜ್ ಸ್ಪಷ್ಟಪಡಿಸಿದ್ದು, ಭಯಗ್ರಸ್ತ ಕುಟುಂಬಕ್ಕೆ ಧೈರ್ಯ ತುಂಬಿದರು.
ಸ್ಥಳಕ್ಕೆ ತಿಪಟೂರು ಪೊಲೀಸರು ಕೂಡಾ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಜನರಲ್ಲಿ ಭಯ ಹುಟ್ಟು ಹಾಕುತ್ತಿರುವ ಕಿಡಿಗೇಡಿಯನ್ನು ಪತ್ತೆ ಹಚ್ಚುವ ಭರವಸೆ ನೀಡಿದ್ದಾರೆ.
ಇದನ್ನೂ ಓದಿ: ಮೂರು ದಿನದಲ್ಲಿ ಮೂರು ಮಕ್ಕಳ ಸಾವು.. ದೆವ್ವ-ಭೂತ ಕಾಟ ಎನ್ನುತ್ತಿರುವ ಕುಟುಂಬ!
