ತುಮಕೂರು: ವಿವಿಧ ಯೋಜನೆಯಡಿ ರೈತನ ಕೃಷಿ ಚಟುವಟಿಕೆಗಳಿಗೆ ಪೂರಕವಾಗಿ ಸರ್ಕಾರದಿಂದ ಹಲವು ಕೃಷಿ ಪರಿಕರಗಳನ್ನು ಪರಿಚಯಿಸಿ, ಸಬ್ಸಿಡಿ ದರದಲ್ಲಿ ಕೃಷಿ ಸಾಮಗ್ರಿಗಳನ್ನು ನೀಡಲಾಗುತ್ತಿದೆ. ಆದರೆ ಬಹುತೇಕ ಯೋಜನೆಗಳು ಅತಿ ಸಣ್ಣ ರೈತರಿಗೆ ತಲುಪುತ್ತಲೇ ಇಲ್ಲ ಎಂಬ ಆರೋಪಗಳಿವೆ.
ಈ ಆರೋಪಗಳಿಗೆ ಸಾಕ್ಷಿ ಎಂಬಂತೆ ಕೊರಟಗೆರೆ ತಾಲೂಕಿನ ಅಜ್ಜಿಹಳ್ಳಿ ಗ್ರಾಮದಲ್ಲಿ ಕೆಲ ಸಣ್ಣ ರೈತರು ಹೆಗಲ ಮೇಲೆ ನೊಗ ಹೊತ್ತು ಕೃಷಿ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿರುವುದು ಕಂಡುಬರುತ್ತಿದೆ. ಹೀಗಾಗಿ ಒಂದು ದಿನ ಪಕ್ಕದ ಹೊಲದಲ್ಲಿ ಹೋಗಿ ಕೆಲಸ ಮಾಡಿದರೆ ಇನ್ನೊಂದು ದಿನ ಅದೇ ಹೊಲದವರು ಬಂದು ಮತ್ತೊಂದು ಹೊಲದಲ್ಲಿ ಕೃಷಿ ಚಟುವಟಿಕೆಗೆ ಸಹಕಾರಿಯಾಗುತ್ತಿದ್ದಾರೆ. ಅದೇ ರೀತಿ ಹೆಗಲ ಮೇಲೆ ನೇಗಿಲು ರೂಪದಲ್ಲಿ ಕೃಷಿ ಪರಿಕರವನ್ನು ಇಟ್ಟುಕೊಂಡು ಭೂಮಿ ಹದ ಮಾಡುತ್ತಿರುವುದು ಕೊರಟಗೆರೆ ತಾಲೂಕಿನಲ್ಲಿ ಕಂಡುಬರುತ್ತಿದೆ.
ಇನ್ನೊಂದೆಡೆ ಇತ್ತೀಚಿನ ದಿನಗಳಲ್ಲಿ ಎತ್ತುಗಳು ಕೂಡ ಸಿಗದಿರುವುದು ರೈತರ ಕ್ಲಿಷ್ಟಕರ ಪರಿಸ್ಥಿತಿಗೆ ಕಾರಣವಾಗಿದೆ. ಸಣ್ಣ ಮತ್ತು ಅತಿ ಸಣ್ಣ ರೈತರು ಕೃಷಿ ಇಲಾಖೆಯನ್ನು ಸಂಪರ್ಕಿಸಿ ಅಗತ್ಯವಿರುವ ಪರಿಕರಗಳನ್ನು ಪಡೆಯುವ ಒಂದು ಮಾರ್ಗದರ್ಶನ ಇಲ್ಲದೇ ಇರುವುದನ್ನು ಕೂಡ ಇಲ್ಲಿ ಗಮನಿಸಬೇಕಿದೆ. ಅತಿ ಸಣ್ಣ ರೈತರು ಇಲ್ಲಿ ಅನಿವಾರ್ಯವಾಗಿ ಭುಜದ ಮೇಲೆ ನೇಗಿಲು ಹೊತ್ತು ಬೇಸಾಯ ಚಟುವಟಿಕೆಯಲ್ಲಿ ತೊಡಗಿದ್ದಾರೆ.
ನಮ್ಮ ಕೃಷಿ ಇಲಾಖೆಯಿಂದ ಸಾಕಷ್ಟು ಪರಿಕರಗಳು ಲಭ್ಯವಿದೆ. ಆದರೆ ಅಗತ್ಯವಿರುವ ರೈತರು ಮುಂದೆ ಬರುತ್ತಿಲ್ಲ. ಸಾಕಷ್ಟು ಪ್ರಚಾರವನ್ನು ಕೂಡ ಮಾಡುತ್ತಿದ್ದೇವೆ ಎನ್ನುತ್ತಾರೆ ಕೃಷಿ ಇಲಾಖೆ ಜಂಟಿ ನಿರ್ದೇಶಕ ಜಯಸ್ವಾಮಿ.
