ಶಿವಮೊಗ್ಗದಿಂದ ಓಡಲಿವೆ ಮತ್ತೆರಡು ಹೆಚ್ಚುವರಿ ಟ್ರೈನ್!

ಶಿವಮೊಗ್ಗ ಟೌನ್​ನಿಂದ ಬೆಂಗಳೂರು ಹಾಗೂ ತಿರುಪತಿಯ ರೇಣಿಗುಂಟಾ ತತ್ಕಾಲ್ ವಿಶೇಷ ಎಕ್ಸ್‌ಪ್ರೆಸ್‌ ರೈಲುಗಳು ಪ್ರಾರಂಭವಾಗಿದ್ದು, ಇಂದಿನಿಂದ ಶಿವಮೊಗ್ಗ - ಯಶವಂತಪುರ ರೈಲು ವಾರದಲ್ಲಿ ನಾಲ್ಕು ದಿನ ಓಡಾಡಲಿದೆ.

ಶಿವಮೊಗ್ಗ : ಟೌನ್​ನಿಂದ ಬೆಂಗಳೂರು ಹಾಗೂ ತಿರುಪತಿಯ ರೇಣಿಗುಂಟಾ ತತ್ಕಾಲ್ ವಿಶೇಷ ಎಕ್ಸ್‌ಪ್ರೆಸ್‌ ರೈಲುಗಳಿಗೆ ಸಂಸದ ಬಿ.ವೈ.ರಾಘವೇಂದ್ರ ಚಾಲನೆ ನೀಡಿದರು.

ನಗರದ ಮುಖ್ಯ ರೈಲು ನಿಲ್ದಾಣದಲ್ಲಿ ನಡೆದ ಸರಳ ಕಾರ್ಯಕ್ರಮದಲ್ಲಿ ವಿಶೇಷ ರೈಲುಗಳಿಗೆ ಚಾಲನೆ ನೀಡಿ ಮಾತನಾಡಿದ ಅವರು, ಇಂದಿನಿಂದ ಶಿವಮೊಗ್ಗ ಟೌನ್​ನಿಂದ - ಯಶವಂತಪುರ ರೈಲು ವಾರದಲ್ಲಿ ನಾಲ್ಕು ದಿನ ಓಡಾಡಲಿದೆ. ಶಿವಮೊಗ್ಗ ಟೌನ್- ರೇಣಿಗುಂಟಾ- ಶಿವಮೊಗ್ಗ ಟೌನ್ ರೈಲು ಇಷ್ಟು ದಿನ ವಾರದಲ್ಲಿ ಒಂದು ದಿನ ಮಾತ್ರ ಸಂಚರಿಸುತ್ತಿತ್ತು. ಇಂದಿನಿಂದ ರೈಲು ವಾರದಲ್ಲಿ ಎರಡು ದಿನ ಓಡಾಡಲಿದೆ. ಹೀಗಾಗಿ ಶಿವಮೊಗ್ಗದಿಂದ ಬೆಂಗಳೂರಿಗೆ ಹಾಗೂ ತಿರುಪತಿಯ ರೇಣಿಗುಂಟಾಗೆ ಹೆಚ್ಚುವರಿ ರೈಲು ಸಂಚರಿಸಲಿದ್ದು, ಪ್ರಯಾಣಿಕರಿಗೆ ಅನುಕೂಲವಾಗಲಿದೆ ಎಂದರು.

ಈ ವೇಳೆ, ಎಂಎಲ್ಸಿ ಆಯನೂರು ಮಂಜುನಾಥ್, ಎಸ್.ರುದ್ರೇಗೌಡ, ಡಿಸಿ ಕೆ.ಬಿ.ಶಿವಕುಮಾರ್, ಎಸ್ಪಿ ಶಾಂತರಾಜು ಸೇರಿದಂತೆ ರೈಲ್ವೆ ಅಧಿಕಾರಿಗಳು ಭಾಗಿಯಾಗಿದ್ದರು