ಶಿವಮೊಗ್ಗ: ನಾನು ಸಿಎಂ ಆಗಬೇಕು ಎಂದು ಸತೀಶ್ ಜಾರಕಿಹೊಳಿ ಅವರು ಎಲ್ಲೂ ಮಾತನಾಡಿಲ್ಲ. ಅವರ ಅಭಿಮಾನಿಯಾಗಿರುವ ಶಾಸಕರೊಬ್ಬರು ಆ ರೀತಿ ಮಾತನಾಡಿದ್ದಾರೆ. ಇದು ಅವರ ವೈಯಕ್ತಿಕ ಅಭಿಪ್ರಾಯವಾಗಿದೆ ಎಂದು ಸಚಿವ ಶಿವಾನಂದ ಪಾಟೀಲ್ ಹೇಳಿದ್ದಾರೆ.
ಶಿವಮೊಗ್ಗದಲ್ಲಿ ಮಾಧ್ಯಮದವರ ಜೊತೆ ಮಾತನಾಡಿದ ಅವರು, ಒಂದಿಬ್ಬರು ಶಾಸಕರು ಹೇಳಿದಾಕ್ಷಣ ಬದಲಾವಣೆ ಆಗಲ್ಲ. ಅದು ಶಾಸಕಾಂಗ ಸಭೆಯಲ್ಲಿ ತೀರ್ಮಾನವಾಗಬೇಕಿದೆ. ಒಬ್ಬ ಶಾಸಕರು ಹೇಳಿದಾಕ್ಷಣ ಅದನ್ನು ದೊಡ್ಡದು ಮಾಡುವ ಅವಶ್ಯಕತೆ ಇಲ್ಲ. ಈ ವಿಚಾರವನ್ನು ಬಿಟ್ಟು ಬಿಡಿ ಎಂದರು.
ಹೊಡೆತ ಬಿದ್ದ ಮೇಲೆ ಹೊಸ ಶಾಸಕರು ಸುಧಾರಿಸುತ್ತಾರೆ: ಈ ರೀತಿ ಹೇಳಿಕೆ ನೀಡುತ್ತಿರುವವರು ಹೊಸದಾಗಿ ಅಯ್ಕೆಯಾದ ಶಾಸಕರುಗಳು. ಅವರಿಗೆ ಇನ್ನೂ ಅನುಭವದ ಕೊರತೆ ಇದೆ. ಅವರಿಗೆ ಒಂದೆರಡು ಹೊಡೆತ ಬಿದ್ದ ಮೇಲೆ ಸುಮ್ಮನಾಗುತ್ತಾರೆ ಎಂದರು.
ಜಾತಿಗಣತಿ ಮೊದಲ ಕ್ಯಾಬಿನೆಟ್ನಲ್ಲಿ ಚರ್ಚೆ ಆಗುತ್ತದೆ: ಜಾತಿ ಜನಗಣತಿ ವಿಚಾರ ಕ್ಯಾಬಿನೆಟ್ನಲ್ಲಿ ನಿರ್ಣಯವಾಗುತ್ತದೆ. ಆಗ ಎಲ್ಲವೂ ತಿಳಿದು ಬರುತ್ತದೆ. ಮೊದಲು ಕ್ಯಾಬಿನೆಟ್ನಲ್ಲಿ ಚರ್ಚೆ ನಡೆಸಬೇಕು. ನಂತರ ಅದನ್ನು ವಿಧಾನಸಭೆಯಲ್ಲಿ ಚರ್ಚೆಗೆ ತರಲಾಗುವುದು. ಯಾವುದೇ ವರದಿ ಬರುವಾಗ ಅದರ ಬಗ್ಗೆ ಚರ್ಚೆ ಮಾಡುವುದರಲ್ಲಿ ತಪ್ಪಿಲ್ಲ. ಅದರ ಬಗ್ಗೆ ವೈಜ್ಞಾನಿಕ ಅಥವಾ ಅವೈಜ್ಞಾನಿಕ ಅಭಿಪ್ರಾಯ ವ್ಯಕ್ತಪಡಿಸುವುದರಲ್ಲಿ ತಪ್ಪೇನಿದೆ. ಈಗ ನಮ್ಮ ಎಪಿಎಂಸಿ ಕಾಯ್ದೆಯ ಬಗ್ಗೆ ವಿಧಾನಸಭೆಯ ಕೆಳಮನೆಯಲ್ಲಿ ಬಿಲ್ ಪಾಸಾಯಿತು. ಆದರೆ ಮೇಲ್ಮನೆಯಲ್ಲಿ ಅದಕ್ಕೆ ವಿರೋಧ ವ್ಯಕ್ತವಾಯಿತು. ಅದಕ್ಕೆ ಮೇಲ್ಮನೆ ಸದಸ್ಯರನ್ನು ಕರೆದುಕೊಂಡು ಪ್ರವಾಸ ನಡೆಸುತ್ತಿದ್ದೇವೆ. ಇದರ ಮೇಲೆಯೇ ಬಿಲ್ ಅನ್ನು ಪಾಸ್ ಮಾಡಬೇಕಾಗುತ್ತದೆ ಎಂದರು.
ನಿಗಮ ಮಂಡಳಿ ನೇಮಕದಲ್ಲಿ ಗೊಂದಲವಿಲ್ಲ: ನಿಗಮ ಮಂಡಳಿ ಅಧ್ಯಕ್ಷರ ನೇಮಕವನ್ನು ಮಾಡಲಾಗುವುದು. ಇದರಲ್ಲಿ ಯಾವುದೇ ಗೊಂದಲವಿಲ್ಲ. ನಿಗಮ ಮಂಡಳಿ ನೇಮಕಾತಿಯಲ್ಲಿ ಹಿರಿಯ ಶಾಸಕರನ್ನು ಹಾಗೂ ಪಕ್ಷದ ಕಾರ್ಯಕರ್ತರನ್ನು ಪರಿಗಣಿಸಲಾಗುತ್ತದೆ. ಶಾಸಕರನ್ನು ನೇಮಿಸುವುದರಲ್ಲಿ ತಪ್ಪೇನು ಇಲ್ಲ ಎಂದು ತಿಳಿಸಿದರು.
ಲೋಕಸಭಾ ಚುನಾವಣೆಗೆ ಸಚಿವರು ಯಾರೂ ಆಕಾಂಕ್ಷಿಗಳಿಲ್ಲ: ಲೋಕಸಭಾ ಚುನಾವಣೆಗೆ ಸಚಿವರು ಯಾರೂ ಆಕಾಂಕ್ಷಿಗಳಾಗಿಲ್ಲ. ಆದರೆ ಕೆಲವು ಕಡೆ ಸಚಿವರನ್ನು ಚುನಾವಣೆಗೆ ನಿಲ್ಲಿಸಿ ಎಂದು ಹೇಳುತ್ತಿದ್ದಾರೆ. ಕೆ.ಎನ್. ರಾಜಣ್ಣ ಅವರು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ನಾನು ಶಾಸಕನಾದಾಗ ನನಗೂ ಲೋಕಸಭಾ ಚುನಾವಣೆಗೆ ಸ್ಪಧಿಸುವಂತೆ ಹೇಳಿದ್ದರು ಎಂದರು. ಈ ವೇಳೆ ಸ್ಪೀಕರ್ ಸ್ಥಾನದ ಕುರಿತಂತೆ ಸಚಿವ ಜಮೀರ್ ಅಹಮದ್ ಹೇಳಿಕೆಗೆ ಪ್ರತಿಕ್ರಿಯಿಸಲು ನಿರಾಕರಿಸಿದರು.
ಎಪಿಎಂಸಿ ಬಿಲ್ಗಾಗಿ ಪ್ರವಾಸ: ಎಪಿಎಂಸಿ ಬಿಲ್ ಕುರಿತು ನಮ್ಮ ತಂಡ ಶಿವಮೊಗ್ಗಕ್ಕೆ ಬಂದಿದೆ. ಇಂದು ಒಂದು ಅಥವಾ ಎರಡು ಎಪಿಎಂಸಿಗಳಿಗೆ ಭೇಟಿ ನೀಡಬಹುದು. ಎಪಿಎಂಸಿ ಬಿಲ್ ಜಾರಿಗಾಗಿ ನಾವು ತಂಡ ರಚನೆ ಮಾಡಿಕೊಂಡು ರಾಜ್ಯ ಪ್ರವಾಸ ಮಾಡಿಕೊಂಡಿದ್ದೇವೆ. ಎಲ್ಲರ ಅಹವಾಲು ಸ್ವೀಕಾರ ಮಾಡಿ ಒಂದು ವರದಿಯನ್ನು ಕೊಡಬೇಕಾಗಿದೆ. ಎಲ್ಲರನ್ನೂ ಭೇಟಿ ಮಾಡಿ ವರದಿ ನೀಡುತ್ತೇವೆ. ಎಪಿಎಂಸಿ ಕಾಯ್ದೆ ಕುರಿತು ಇರುವ ಸಮಸ್ಯೆಯನ್ನು ಬಗೆಹರಿಸಬಹುದು. ಯಾಕೆಂದರೆ ಸಮಿತಿಯಲ್ಲಿ ಸರ್ವ ಪಕ್ಷದ ಸದಸ್ಯರು ಇದ್ದು, ಒಂದು ಪಾಸಿಟಿವ್ ವರದಿ ನೀಡಬಹುದು ಎಂದರು.
ಇದನ್ನೂ ಓದಿ: 'ಮುಂದಿನ ಸಿಎಂ ಸತೀಶ್ ಜಾರಕಿಹೊಳಿ': ಕಾಂಗ್ರೆಸ್ ಶಾಸಕ ವಿಶ್ವಾಸ ವೈದ್ಯ
