ಶಿವಮೊಗ್ಗ: ರಸ್ತೆಯಲ್ಲಿ ಮೊಬೈಲ್ನಲ್ಲಿ ಮಾತನಾಡುತ್ತಾ ಹೋಗುವಾಗ ಬೈಕ್ನಲ್ಲಿ ಬಂದ ಕಳ್ಳರು ಮೊಬೈಲ್ ಅನ್ನು ಕಿತ್ತು ಪರಾರಿಯಾಗಿರುವ ಘಟನೆ ಶಿವಮೊಗ್ಗ ನಗರದಲ್ಲಿ ನಡೆದಿದೆ.
ಇಂದು ರಾತ್ರಿ ಕರ್ತವ್ಯ ಮುಗಿಸಿ ಮನೆಗೆ ವಾಪಸ್ ಆಗುವಾಗ ಯುವತಿಯೊಬ್ಬರು ಮೊಬೈಲ್ನಲ್ಲಿ ಮಾತನಾಡುತ್ತಾ ಬರುತ್ತಿದ್ದ ವೇಳೆ ದುರ್ಗಿಗುಡಿಯ ದುರ್ಗಮ್ಮನ ಕೇರಿಯಲ್ಲಿ ಮೊಬೈಲ್ ರಾಬರಿಯಾಗಿದೆ. ಬಿಳಿ ಬಣ್ಣದ ಅಪಾಚೆ ಬೈಕ್ನಲ್ಲಿ ಬಂದ ಇಬ್ಬರು ಮೊಬೈಲ್ ಕಸಿದು ಪರಾರಿಯಾಗಿದ್ದಾರೆ.
ತಕ್ಷಣಕ್ಕೆ ಗಾಬರಿಗೆ ಬಿದ್ದ ಯುವತಿ ಮೊಬೈಲ್ ಎಂದು ಕೂಗಿ‌ಕೊಂಡಿದ್ದಾರೆ. ಅಷ್ಟರಲ್ಲಿ ಬೈಕ್ನಲ್ಲಿ ಬಂದ ಖದೀಮರು ಪರಾರಿಯಾಗಿದ್ದಾರೆ. ತಕ್ಷಣ ಸ್ಥಳೀಯರು ಬಂದು ಯುವತಿಯನ್ನು ಸಮಾಧಾನ ಮಾಡಿದ್ದಾರೆ. ಯುವತಿ ಸ್ಥಳೀಯರ ಸಹಾಯದಿಂದ ದೊಡ್ಡಪೇಟೆ ಪೊಲೀಸ್ ಠಾಣೆಗೆ ತೆರಳಿ ಮೊಬೈಲ್ ಕಳ್ಳತನದ ಬಗ್ಗೆ ದೂರು ನೀಡಿದ್ದಾರೆ. ಲಾವಾ ಕಂಪನಿಯ ಮೊಬೈಲ್ ಜೊತೆ ಎಟಿಎಂ ಕಾರ್ಡ್ ಸಹ ಇತ್ತು ಎಂದು ಯುವತಿ ತಿಳಿಸಿದ್ದಾಳೆ.
ಮೊಬೈಲ್ ರಾಬರಿ ಗ್ಯಾಂಗ್ ಆ್ಯಕ್ಟಿವ್ ಆಗಿದೆ:
ಕಳೆದ ಮೂರು ದಿನದ ಹಿಂದೆ ಅಚ್ಯುತ ರಾವ್ ಲೇಔಟ್ ನ ಸಾಗರ ನರ್ಸಿಂಗ್ ಹೋಂ ರಸ್ತೆಯಲ್ಲಿ ಮೊಬೈಲ್ನಲ್ಲಿ ಮಾತನಾಡುತ್ತಾ ಹೋಗುವಾಗ ಡಿಯೋ ಗಾಡಿಯಲ್ಲಿ ಬಂದ ಮೂವರು ಇದೇ ರೀತಿ ಗಿರೀಶ್ ಎಂಬುವರ ಮೊಬೈಲ್ ಕಸಿದು ಪರಾರಿಯಾಗಿದ್ದಾರೆ. ಈ ವೇಳೆ ಗಿರೀಶ್ ಡಿಯೋದಲ್ಲಿ ಹಿಂಬದಿ ಕುಳಿತವನ ಕೈ‌ಹಿಡಿದು ಎಳೆದ ಪರಿಣಾಮ ಬೈಕ್ ನಲ್ಲಿದ್ದವರು ಕೆಳಗೆ ಬಿದ್ದಿದ್ದಾರೆ. ಈ ವೇಳೆ ಮೊಬೈಲ್ ಕಳ್ಳರು ಬೈಕ್ ಹಾಗೂ ಅವರ ಮೊಬೈಲ್ ಬೀಳಿಸಿಕೊಂಡು ಪರಾರಿಯಾಗಿದ್ದಾರೆ. ಈ ಬೈಕ್ ಪುರಲೆ ಗ್ರಾಮದವರಿಗೆ ಸೇರಿದ್ದಾಗಿದೆ. ಈ ಕುರಿತು ಜಯನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.
