ಶಿವಮೊಗ್ಗ: ರಾಜ್ಯದ ಪ್ರಸಿದ್ಧ ಪಕ್ಷಿಧಾಮಗಳ ಪೈಕಿ ಒಂದಾಗಿರುವ ಶಿವಮೊಗ್ಗ ಜಿಲ್ಲೆಯ ಸೊರಬ ತಾಲೂಕಿನ ಗುಡವಿ ಪಕ್ಷಿಧಾಮದಲ್ಲಿ ಮಳೆ ಕೊರತೆಯಿಂದ ವಲಸೆ ಪಕ್ಷಿಗಳು ತೀವ್ರ ಸಮಸ್ಯೆಗೆ ಸಿಲುಕಿವೆ. ಈ ಕುರಿತು ಕಾರ್ಗಲ್ ವನ್ಯಜೀವಿ ವಿಭಾಗದ ಎಸಿಎಫ್ ಯೋಗೀಶ್ ಈಟಿವಿ ಭಾರತ್‌ಗೆ ದೂರವಾಣಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ.
ಸುಮಾರು 180 ಎಕರೆ ವ್ಯಾಪ್ತಿಯಲ್ಲಿ ಗುಡವಿ ಪಕ್ಷಿಧಾಮವಿದ್ದು, 80 ಎಕರೆ ವಿಸ್ತೀರ್ಣದಲ್ಲಿ ಕೆರೆ ಕಂಡು ಬರುತ್ತದೆ. ಈ ವರ್ಷ ಮಳೆ ಕೊರತೆಯಿಂದಾಗಿ ಕೆರೆಯಲ್ಲಿ ಅಷ್ಟೇನು ನೀರು ಸಂಗ್ರಹವಾಗಿಲ್ಲ. ಹೀಗಾಗಿ ಪಕ್ಷಿಗಳಿಗೆ ಆಹಾರದ ಕೊರತೆ ಎದುರಾಗಿದೆ. ನಮ್ಮ ಇಲಾಖೆಯಿಂದ ಮೀನಿನ ಮರಿಗಳನ್ನು ಕೆರೆಗೆ ಬಿಡಲಾಗಿದೆ. ಇನ್ನೊಂದೆಡೆ ತಾಪಮಾನ ಹೆಚ್ಚಾಗಿ ಕೆರೆಯಲ್ಲಿ ನೀರು ಕಡಿಮೆಯಾಗುತ್ತಿದೆ. ಪಕ್ಷಿಧಾಮ ಕುರುಚಲ ಕಾಡಿನಂತಹ ಪ್ರದೇಶದಲ್ಲಿ ಇರುವುದರಿಂದ ಪಕ್ಷಿಗಳ ಸಣ್ಣಸಣ್ಣ ಮರ ಹಾಗೂ ಕುರುಚಲು ಗಿಡಗಳಲ್ಲಿ ಗೂಡು ಕಟ್ಟಿ ನಾಲ್ಕೈದು ಮರಿಗಳನ್ನು ಮಾಡಿಕೊಳ್ಳುತ್ತವೆ. ಈ ಸಂದರ್ಭದಲ್ಲಿ ಮರಿಗಳಿಗೆ ಆಹಾರದ ಕೊರತೆ ಉಂಟಾಗುವುದರಿಂದ ಸಹಜವಾಗಿ ಕೆಲವೊಮ್ಮೆ ಮರಿಗಳು ಸಾಯುತ್ತವೆ.
ಆದರೆ ಕೆರೆಯ ನೀರು ಕಲುಷಿತವಾಗಿ ಸಾವನ್ನಪ್ಪಿದೆ ಎಂಬುದು ಸರಿಯಲ್ಲ. ಇದರಿಂದ ಸತ್ತ ಪಕ್ಷಿಗಳ ದೇಹವನ್ನು ಶಿವಮೊಗ್ಗದ ಇನ್ಸ್ಟಿಟ್ಯೂಟ್ ಅನಿಮಲ್ ಹಲ್ತ್ ಅಂಡ್ ವೈಲ್ಡ್ ಲೈಫ್ ಲ್ಯಾಬೋರೇಟರಿಗೆ ತೆಗೆದುಕೊಂಡು ಹೋಗಲಾಗಿದ್ದುಮ, ಪರೀಕ್ಷೆಗೆ ಒಳಪಡಿಸಲಾಗಿದೆ. ಯಾವ ಕಾರಣಕ್ಕೆ ಇಲ್ಲಿ ಪಕ್ಷಿಗಳು ಸಾವನ್ನಪ್ಪಿವೆ ಎಂಬ ಮಾಹಿತಿ ನಾಲ್ಕೈದು ದಿನಗಳಲ್ಲಿ ಲಭ್ಯವಾಗುತ್ತದೆ. ಅಲ್ಲದೆ ಕೆರೆಯ ನೀರನ್ನು ಸಹ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.
ವಲಸೆ ಹಕ್ಕಿಗಳ ಮಳೆಗಾಲದ ತವರು ಮನೆ: ಗುಡವಿ ಪಕ್ಷಿಧಾಮ ವಲಸೆ ಹಕ್ಕಿಗಳಿಗೆ ಆಶ್ರಯತಾಣವಾಗಿದೆ. ವೈಟ್ ಐಬಿಸ್, ಲಿಟಲ್ ಕಾರ್ಮೊರೆಂಟ್, ಇಂಡಿಯನ್ ಕಾರ್ಮೊರೆಂಟ್, ಪರಿಯಾ, ಲಿಟಲ್ ಗ್ರೀಬ್, ಜಂಗಲ್ ಫೌಲ್ ಸೇರಿದಂತೆ ಹತ್ತಾರು ಜಾತಿಯ ಪಕ್ಷಿಗಳು ಇಲ್ಲಿಗೆ ಬರುತ್ತವೆ. ಮಳೆಗಾಲದಲ್ಲಿ ದೂರೂರಿನಿಂದ ತವರು ಮನೆಗೆ ಬರುವಂತೆ ಬರುವ ಪಕ್ಷಿಗಳು ಅಕ್ಟೋಬರ್‌ತನಕ ಇಲ್ಲಿಯೇ ಇದ್ದು, ಸಂತಾನೋತ್ಪತ್ತಿ ಮಾಡಿಕೊಂಡು ವಾಪಸ್ ತೆರಳುತ್ತವೆ.
ಮಳೆಗಾಲದಿಂದ ಚಳಿಗಾಲ ಪ್ರಾರಂಭವಾಗುವತನಕ ಇರುವ ವಲಸೆ ಪಕ್ಷಿಗಳು ತಮ್ಮ ಸಂತಾನೋತ್ಪತ್ತಿ ಮುಗಿದ ನಂತರ ತಮ್ಮ ತಮ್ಮ ಸ್ವಸ್ಥಾನಗಳಿಗೆ ವಾಪಸ್ ಆಗುತ್ತವೆ. ಇದರಿಂದ ಗುಡವಿ ಪಕ್ಷಿಧಾಮವು ಮಳೆಗಾಲದ ತವರು ಮನೆ ಎಂದೆ ಕರೆಯಲ್ಪಡುತ್ತದೆ. ಅರಣ್ಯ ಇಲಾಖೆಯು ಇಲ್ಲಿ ಬರ್ಡ್ಸ್ ವಾಚರ್‌ಗಳನ್ನು ಹಾಗೂ ಗೈಡ್‌ಗಳನ್ನು ನೇಮಕ ಮಾಡಿ ಪ್ರವಾಸಿಗರಿಗೆ ಪಕ್ಷಿಗಳ ಮಾಹಿತಿ ಒದಗಿಸುತ್ತಿದೆ.
ಇದನ್ನೂ ಓದಿ: Flamingo Birds: ಬಿಸಿಲೂರು ರಾಯಚೂರಲ್ಲಿ ಫ್ಲೆಮಿಂಗೋ ಕಲರವ: ಸಂತಾನೋತ್ಪತ್ತಿ ಬಳಿಕವೂ ಹಿಂತಿರುಗದ ವಿದೇಶಿ ಪಕ್ಷಿಗಳು!
