ಶಿವಮೊಗ್ಗ: ವಿಚ್ಛೇದನ ಬೇಕೆಂದು ಕೋರ್ಟ್ ಮೆಟ್ಟಿಲೇರಿದ್ದ ಎರಡು ಜೋಡಿಗಳನ್ನು ಹೊಸನಗರ ಕೋರ್ಟ್ನಲ್ಲಿ ಮತ್ತೆ ಒಂದು ಮಾಡಲಾಗಿದೆ.
ಶಿವಮೊಗ್ಗ ಜಿಲ್ಲೆ ಹೊಸನಗರದ ಕೋರ್ಟ್ನಲ್ಲಿ ಇಂದು ಲೋಕ ಅದಾಲತ್ ನಡೆಯಿತು. ಈ ಅದಾಲತ್ಗೆ ವಿಚ್ಛೇದನ ಪ್ರಕರಣಗಳು ಸಹ ಬಂದಿದ್ದವು. ಇದರಲ್ಲಿ ಹೊಸನಗರ ಪಟ್ಟಣದ ಚರ್ಚ್ ರಸ್ತೆಯ ನವೀದಾ ಎಂಬುವರು ಏಳು ವರ್ಷದ ಹಿಂದೆ ಸಿದ್ದಾಪುರದ ಇಲಿಯಾಸ್ ಎಂಬುವರ ಜೊತೆ ಮದುವೆ ಮಾಡಿಕೊಂಡಿದ್ದರು. ನಂತರ ಇಬ್ಬರು ಡೈವೋರ್ಸ್ ಬೇಕೆಂದು ಕೋರ್ಟ್ ಮೊರೆಹೋಗಿದ್ದರು. ಇಂದು ನಡೆದ ಅದಾಲತ್ನಲ್ಲಿ ನ್ಯಾಯಾಧೀಶರು ಮತ್ತೆ ಸಂಸಾರ ನಡೆಸಿಕೊಂಡು ಹೋಗಲು ಸಲಹೆ ನೀಡಿ ಕೋರ್ಟ್ ಹಾಲ್ನಲ್ಲಿಯೇ ಇಲಿಯಾಸ್ ಹಾಗೂ ನವೀದಾರವರಿಗೆ ಹಾರ ಬದಲಾಯಿಸಿ ಮನೆಗೆ ಕಳುಹಿಸಿ ಕೊಟ್ಟಿದ್ದಾರೆ.
ಇದೇ ಅದಾಲತ್ನಲ್ಲಿ ರಿಪ್ಪನಪೇಟೆಯ ದಿನೇಶ್ ಹಾಗೂ ಬೆನ್ಸಿ ಎಂಬುವರು ಸಹ ಮದುವೆಯಾಗಿ ನಂತರ ಜಗಳವಾಡಿ ವಿಚ್ಛೇದನಕ್ಕಾಗಿ ಕೋರ್ಟ್ ಮೆಟ್ಟಿಲೇರಿದ್ದರು. ಈ ದಂಪತಿಗೆ ಎರಡು ಮಕ್ಕಳಿದ್ದು, ಇವರಿಗೆ ನ್ಯಾಯಾಧೀಶರು ಬುದ್ದಿ ಹೇಳಿ, ವಕೀಲರ ಸಮ್ಮುಖದಲ್ಲಿ ಹಾರ ಬದಲಾಯಿಸಲು ಸೂಚನೆ ನೀಡಿ ಸುಖ ಸಂಸಾರ ನಡೆಸಲು ಮನೆಗೆ ಕಳುಹಿಸಿ ಕೊಟ್ಟಿದ್ದಾರೆ.
ಈ ವೇಳೆ ಹಿರಿಯ ನ್ಯಾಯಾಧೀಶರಾದ ಪುಷ್ಪಲತಾ, ಕೆ.ರವಿಕುಮಾರ್, ತಾಲೂಕು ವಕೀಲರ ಸಂಘದ ಅಧ್ಯಕ್ಷ ರಾಮಪ್ಪ, ವಕೀಲರುಗಳಾದ ಮಹೇಶ್, ಬಿ.ಎಸ್.ವಿನಾಯಕ ಸೇರಿ ಇತರೆ ವಕೀಲರಿದ್ದರು.
