ಶಿವಮೊಗ್ಗ: ಕೊರೊನಾ ಲಾಕ್ಡೌನ್ನಿಂದ ಬಸ್ಗಳ ಸಂಚಾರ ಸಂಪೂರ್ಣ ಸ್ಥಗಿತಗೊಂಡಿದ್ದು, ಖಾಸಗಿ ಬಸ್ ಮಾಲೀಕರು ತಮ್ಮ ಬಸ್ಗಳನ್ನು ನಿಲ್ಲಿಸಲು ನಿಲ್ದಾಣದ ವ್ಯವಸ್ಥೆಯಿಲ್ಲದೆ ಸಾಕಷ್ಟು ಸಮಸ್ಯೆ ಎದುರಿಸುತ್ತಿದ್ದಾರೆ.
ಲಾಕ್ಡೌನ್ ಜಾರಿಯಾದಗಿನಿಂದ ಸಾರಿಗೆ ಇಲಾಖೆ ಬಂದ್ ಆಗಿದ್ದು, ಪರಿಣಾಮ ಬಸ್ಗಳು ನಿಲ್ದಾಣಗಳಲ್ಲೇ ನಿಂತಿವೆ. ಸರ್ಕಾರಿ ಬಸ್ಗಳಿಗೆ ನಿಲ್ದಾಣದ ವ್ಯವಸ್ಥೆಯಿದೆ. ಆದರೆ ಖಾಸಗಿ ಬಸ್ಗಳಿಗೆ ಯಾವುದೇ ಟರ್ಮಿನಲ್ ಸೌಲಭ್ಯವಿಲ್ಲದ ಕಾರಣ ಬಿಸಿಲಿನಲ್ಲೇ ನಿಂತು ಹಾಳಾಗುತ್ತಿವೆ.
ಸುಮಾರು ಒಂದು ತಿಂಗಳಿಂದ ಯಾವುದೇ ಬಸ್ಗಳು ರಸ್ತೆಗಿಳಿದಿಲ್ಲ. ಇದರಿಂದ ಬಸ್ ಮಾಲೀಕರು ಪರದಾಡುತ್ತಿದ್ದಾರೆ. ಇದರ ನಡುವೆ ಕಳ್ಳರಿಂದ ತಮ್ಮ ಬಸ್ಗಳನ್ನು ರಕ್ಷಣೆ ಮಾಡಿಕೊಳ್ಳುವುದು ದೊಡ್ಡ ಸವಾಲಾಗಿದೆ. ಬಸ್ಗಳು ಬಿಸಿಲಲ್ಲಿ ನಿಂತಿರುವ ಪರಿಣಾಮ ಟೈಯರ್ಗಳು ಹಾಳಾಗುತ್ತಿವೆ. ಇಂಜಿನ್ಗಳು ತುಕ್ಕು ಹಿಡಿಯುತ್ತಿವೆ. ಬಸ್ಗಳ ಪೇಂಯಿಂಟ್ ಕೂಡ ಹೋಗುತ್ತಿದ್ದು, ಲಾಕ್ಡೌನ್ ಮುಗಿದ ಮೇಲೆ ಬಸ್ಗಳು ರಸ್ತೆಗಿಳಿಯುವುದು ಡೌಟ್ ಅಂತಾನೆ ಹೇಳಬಹುದು.
ಸಂಕಷ್ಟದಲ್ಲಿ ಕಾರ್ಮಿಕರು:
ಜಿಲ್ಲೆಯಲ್ಲಿ ಸಾವಿರಾರು ಖಾಸಗಿ ಬಸ್ಗಳಿದ್ದು, ಡ್ರೈವರ್, ಕ್ಲೀನರ್, ಏಜೆಂಟ್, ಕಂಡಕ್ಟರ್ ಸೇರಿದಂತೆ ಸಾವಿರಾರು ಜನರು ಈ ಕಾಯಕವನ್ನು ಅವಲಂಬಿಸಿದ್ದಾರೆ. ಆದರೆ ಲಾಕ್ಡೌನ್ನಿಂದ ಕೆಲಸವಿಲ್ಲದೆ, ಸಂಬಳವಿಲ್ಲದೆ ಇವರೆಲ್ಲರ ಬದುಕು ಕಷ್ಟದಲ್ಲಿ ಸಿಲುಕಿದೆ.
ತೆರಿಗೆಯಲ್ಲಿ ವಿನಾಯಿತಿ ನೀಡಿ:
ಬ್ಯಾಂಕ್ ಹಾಗೂ ಖಾಸಗಿ ಸಂಸ್ಥೆಗಳಿಂದ ಸಾಲ ಪಡೆದು ಬಸ್ಗಳನ್ನು ಖರೀದಿಸಲಾಗಿದೆ. ಈಗ ಸರ್ಕಾರ ಮೂರು ತಿಂಗಳು ಸಾಲದ ಕಂತನ್ನು ಕಟ್ಟುವುದು ಬೇಡ ಅಂತಲೇ ಹೇಳಿದೆ. ಆದರೆ ಮುಂದಿನ ದಿನಗಳಲ್ಲಾದ್ರೂ ಆ ಸಾಲವನ್ನು ಮಾಲೀಕರು ಭರಿಸಬೇಕಾಗುತ್ತದೆ. ಹೀಗಾಗಿ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಬಸ್ ಮಾಲೀಕರ ನೆರವಿಗೆ ಬರಬೇಕಿದೆ ಎಂದು ಮನವಿ ಮಾಡಿದ್ದಾರೆ.
ಸಾರಿಗೆಯನ್ನೇ ನಂಬಿಕೊಂಡು ಜೀವನ ನಡೆಸುತ್ತಿರುವ ನೌಕರರಿಗೆ ಬಸ್ ಮಾಲೀಕರು ತಮ್ಮ ಕೈಲಾದಷ್ಟು ಸಂಬಳ ನೀಡಿದ್ದು, ಮುಂದೆ ಅವರಿಗೆ ಸಂಬಳ ನೀಡುವುದು ಹೇಗೆ ಎಂಬ ಚಿಂತೆ ಎದುರಾಗಿದೆ. ಸರ್ಕಾರ ತಮ್ಮ ಸಮಸ್ಯೆಗೆ ಸ್ಪಂದಿಸುವಂತೆ ಮನವಿ ಮಾಡಿದ್ದಾರೆ.
