ತೀರ್ಥಹಳ್ಳಿ ಬಳಿ ಕ್ಯಾಂಟರ್​ ಪಲ್ಟಿಯಾಗಿ 10 ಜಾನುವಾರುಗಳ ಸಾವು

ದಾವಣಗೆರೆಯಿಂದ ಮಂಗಳೂರು ಕಡೆ ಹೊರಟಿದ್ದ ಕ್ಯಾಂಟರ್ ಬೆಳಗಿನ ಜಾವ ಪಲ್ಟಿಯಾಗಿದೆ. ಪರಿಣಾಮ 10 ಜಾನುವಾರುಗಳು ಸ್ಥಳದಲ್ಲೇ ಸಾವಿಗೀಡಾಗಿವೆ.

ಶಿವಮೊಗ್ಗ: ಜಾನುವಾರು ಸಾಗಣೆ ಮಾಡುತ್ತಿದ್ದ ಕ್ಯಾಂಟರ್ ಪಲ್ಟಿಯಾಗಿ 10 ಜಾನುವಾರುಗಳು ಸ್ಥಳದಲ್ಲಿಯೇ ಸಾವಿಗೀಡಾಗಿವೆ.

ತೀರ್ಥಹಳ್ಳಿ ತಾಲೂಕು‌ ದಾನಸಾಲೆ ಬಳಿ ಈ ಘಟನೆ ಸಂಭವಿಸಿದೆ. ದಾವಣಗೆರೆಯಿಂದ ಮಂಗಳೂರು ಕಡೆ ಹೊರಟಿದ್ದ ಕ್ಯಾಂಟರ್ ಬೆಳಗಿನಜಾವ ಪಲ್ಟಿಯಾಗಿದೆ. ಕ್ಯಾಂಟರ್​ನಲ್ಲಿ 20 ಜಾನುವಾರುಗಳನ್ನು ಸಾಗಣೆ ಮಾಡಲಾಗುತ್ತಿತ್ತು. ಇದರಲ್ಲಿ‌ 10 ಸಾವಿಗೀಡಾಗಿದ್ದು, ಉಳಿದವು ಗಾಯಗಳಾಗಿವೆ.

ಕ್ಯಾಂಟರ್ ಚಾಲಕನಿಗೆ ಗಂಭೀರ ಗಾಯಗಳಾಗಿದ್ದು, ಆತನನ್ನು ತೀರ್ಥಹಳ್ಳಿ ಜೆ.ಸಿ. ಆಸ್ಪತ್ರೆಗೆ ದಾಖಲಿಸಲಾಗಿದೆ. ಕ್ಯಾಂಟರ್​ನಲ್ಲಿದ್ದ ಜಾನುವಾರುಗಳನ್ನು ಅಕ್ರಮವಾಗಿ ಸಾಗಣೆ ನಡೆಸಲಾಗುತ್ತಿತ್ತಾ ಎಂಬುದರ ಬಗ್ಗೆ ತನಿಖೆ ನಡೆಯಬೇಕು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ. ಈ ಕುರಿತು ಮಾಳೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.