ರಾಮನಗರ : ತಮ್ಮ ವಿರೋಧ ನಡುವೆ ಪ್ರೀತಿಸಿದ ಯುವಕನನ್ನ ಮದುವೆಯಾಗಿದ್ದಾಳೆಂಬ ಕಾರಣಕ್ಕೆ ಬೇಸತ್ತ ಅಪ್ಪ-ಅಮ್ಮ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಜಿಲ್ಲೆಯಲ್ಲಿ ನಡೆದಿದೆ.
ಚನ್ನಪಟ್ಟಣ ತಾಲೂಕಿನ ಗ್ರಾಮವೊಂದರಲ್ಲಿ ಮಾಜಿ ಅಧ್ಯಕ್ಷ ಮತ್ತು ಆತನ ಪತ್ನಿ ಆತ್ಮಹತ್ಯೆಗೆ ಶರಣಾದವರು. ಈ ದಂಪತಿಯ ಮಗಳು ಅದೇ ಗ್ರಾಮದ ಆಟೋ ಡ್ರೈವರ್ ಯುವಕನನ್ನ ಪ್ರೀತಿಸಿ ಮದುವೆಯಾಗಿದ್ದಳು. ಪ್ರೀತಿಯ ವಿಷಯ ಪೋಷಕರಿಗೆ ತಿಳಿದು ಹಲವು ಭಾರಿ ರಾಜಿ ಸಂಧಾನ ಕೂಡ ನಡೆಸಲಾಗಿತ್ತು. ಕಳೆದ ಮೂರು ದಿನಗಳ ಹಿಂದೆ ಈ ಪೋಷಕರ ಮಗಳು ಮನೆ ಬಿಟ್ಟು ಓಡಿ ಹೋಗಿದ್ದಳು ಎನ್ನಲಾಗ್ತಿದೆ.
ಸೋಮವಾರ ರಾತ್ರಿ ಆಟೋ ಡ್ರೈವರ್ ಜೊತೆ ಯುವತಿ ಮದುವೆಯಾಗಿದ್ದು, ವಿವಾಹದ ಫೋಟೋವೊಂದನ್ನ ವಾಟ್ಸಾಪ್ ಮೂಲಕ ಪೋಷಕರಿಗೆ ಕಳುಹಿಸಿದ್ದಾಳೆ. ವಿರೋಧದ ಮಧ್ಯೆಯೂ ಆಟೋ ಡ್ರೈವರ್ನನ್ನು ಮದುವೆ ಮಾಡಿಕೊಂಡಿರುವುದರಿಂದ ಪೋಷಕರು ಮನಸ್ತಾಪಕ್ಕೆ ಗುರಿಯಾಗಿದ್ದಾರೆ.
ಈ ವಿಷಯನ್ನು ಅರಗಿಸಿಕೊಳ್ಳದ ದಂಪತಿ ಬೆಳ್ಳಂಬೆಳಗ್ಗೆ ಆತ್ಮಹತ್ಯೆಗೆ ಶರಣಾಗಿದ್ದಾರೆ ಎಂಬುದು ಗ್ರಾಮಸ್ಥರ ಮಾತಾಗಿದೆ. ಆದ್ರೆ ಈ ಘಟನೆ ಬಗ್ಗೆ ಯಾವುದೇ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿಲ್ಲ.
